Priča # 2 o dilavnim, šparnin, pobožnin, neporočnin, divnim... "starin juden"
Moj pranono se je zvav kako va ki državi. Biv je Antonio ili Anton a si su ga zvali Tone, kot ča je i red. Kad san napisav ovo Tone zajno mi je sila na tipkovnicu ćaćina priča kad da je Tone kopav kamike (krčiv) za prezid va Šeraji. Dok je Tone kopav moj tata Ive, ki je onda imev 3-4 lita kako mi je povidav, da je ležav na travi i napov kantajuć, se z nožicami tukuć vatla, zijav:
- Kopaj, kopaj bedasti Tone; kopaj, kopaj bedasti Tone...!
A Tone da je spustiv kranp, zgrabiv Ivića, presviv ga prik kolina i udri po riti. Ali da mu ju je napjoškav.
No, Tone je imev još slabosti a ne samo ča je tukav po riti dite ko ga je zajebavalo. Tone je voliv igrat na harte. Ča bi se danas reklo, biv je kockar a onda se timu reklo hartašina. A ni samo to biv njigov grih nigo još veći problem je biv to ča je biv loš hartašina.
Povidala mi je nona Mare da je kockarnica bila va kući kadi sad biva Jože Binin. Tamo da se je hartalo i hartalo. Ne znan ku igru su igrali ni ki je se hartav ali Tone da je fanj grunta zgubiv na hartah.
Jedanput, opet po nonini priči, Tone se je zaigrav i ni ga bilo civ dan i cilu noć. Drugo jutro da se je moja pranona, Ane ji je bilo ime, šla nazrit je li živ, ča misli i to. "Ta čovičina ni niš rekav nigo je zajev vrč z vinon i pošiniv va nju." (Beside moje none). Još ta dan i tu noć da ga ni bilo doma, komać drugo jutro da se je doma privukav.
Moj nono File se je oženiv za nonu Maretu (Margareta joj je bilo pravo ime, Tonetovu hćer) iz ljubavi, tako je on govoriv. A morda i iz jubavi prama Bavdinimu gruntu aš Mare je bila samica a grunat velik.
Kad su se užali pokarat nona bi mu odbrusila:
- Tamo hoj i komandiraj na onimu ča si si od Šestanovih prnesav!
- Jeben ti sunce! Nisan prišav na bogatiju nigo na veli dug! - ji je on zijajuć na punu kuću odgovoriv i pobigav va šumu kadi mu je bilo najlipje.
Taj dug je zgleda File namiriv aš je sad videt da va suckih knjigah "tereta nema".
Ovo je samo još jedna crtica iz obiteljske riznice aš moji predki su bili dilavni, šparni, pobožni... Ali su bili i pravi pravcati judi, od krvi i mesa. I zato jih volin aš hm...
