Zač...

[Daluka]

ZBORNIK ZA NARODNI ŽIVOT I OBIČAJE JUŽNIH SLAVENA
IVO JARDAS: KASTAVSTINA
Katrida ale Kantrida
Dole pod Zamet do reškega kunfina pul more se zove Kantrida, a Halubjani zovu Katrida. Halubjani zovu stolicu, na koj se sedi »ka­trida«, a Smokvari i Zamećani reču »kantrida«. Taj kraj je pak spodoban na katridu, zato ga zovu Katrida ale Kan­trida. Jedanput san šal dol kmoru s pokojnen barbun Jožinun Mar­cejun. On je bil paron od Brgudi i Marčejeve Dragi. Pital san ga: »Barba Jože, zač temu kraju govore Katrida?« »Vis malo«, rekal je barba Jožina Brgujan, »da on neki veli Krajević Marko sede tu na železnicu, nogi bi mu se močile va more, a s hrton bi bil nagnjen na Zamet ale na Kunfin. Pa ča ni to spodobno posensega jenoj velikoj katride?« Kunfin se pak zove on kraj na Plasah, kade se j mejila ale kunfinala Kastafšćina i Reka. Na jenen velen kamene kunfina bilo j zakjesano: L. R. H. To kade j bil kodabi kunfin Ungarije. Naši stari bili su pametni, pak su sakemu kraju dali ime kakovo mu pristoji. 0v kraj pak spodabja na katridu, pak su mu dali ime Katrida. Sa ta lepa kastafska Katrida j z on kraj žice. Spala j pod Taliju.

[milić]

U zaleđu Rijeke na malom prostoru postoji više verzija čakavskog govora.

Ja govorim od rođenja po studenski

Ča se va Studene ne reče kariga?

Kako mi čakavci rečemo kantrida za stolicu

Čakavski izraz za stolicu: katrida, kantrida, kariga, katriga,

Ne, va Studene se reče kantrida. Ma to ni bitno uvde. Ja bin otel da pišen na pehinarskoj čakavice a za to iman lektora ki će na kraje, ako bude rabilo, ispravjat.
Isto tako, Jardasov rečnik je zastarel i ja san ga, kad san ga čital 90-eh, komać razumel. Zajik se menja.
Ovo, ča pišeš za izraze čakavske za stolicu je ok. Neprecizno san se izrazil. Trebalo je stavit neki čakavci, ili mene poznati izraz...
Sad mi na pamet pada fusherova (naš zamrli član) primjedba na Gervaisov rečmik. npr. Gervais piše - vrapčići kantaju a fusher ima primjedbu da je trebalo napisat orepčići. Sako selo, saka kuća svoj zajik njeguje kuliko more.

[milić]

Katrida ale Kantrida
...

Ovo je dobra, bitna primjedba i ukomponirat ću je u tekst.
Neki dan san iskal kade piše da je Marčeljeva Draga nekad bila marčejska ali nisan našal. Morat ću Jardasa još malo proučit. Hvala!

[Daluka]

Jardasov rečnik je zastarel i ja san ga, ... komać razumel.

Riječnik nemože zastariti, on uvijek vrijedi za neki period.

Neki dan san iskal kade piše da je Marčeljeva Draga nekad bila marčejska ali nisan našal.

Stvar izgovora, hrvatski Marčelji, čakavski Marčeji.
ZBORNIK ZA NARODNI ŽIVOT I OBIČAJE JUŽNIH SLAVENA
IVO JARDAS: KASTAVSTINA
 "Povedal barba Ivić Antonov od Marčeji br. 3
Tako san čul povedat od pokojneg barbi Ivica Antonovega. On je to znal, aš Antonovi su bili od carevini kupili Brgudi i Dragu. Zato se Draga i dan danas zove Marčejeva Draga. Ta Draga j potla bila podejena mej bratju. Ale i danas se si gospodari Marčejeve Dragi i Brgudi zovu Marčeja."

[milić]

Hrvatski jezični portal:

rjȇčnīk

rjȇčnīk m 〈V -īče, N mn -īci〉


Definicija
1.    skupljene riječi i sklopovi riječi jednog ili više jezika uz objašnjenja njihove upotrebe i značenja [frazeološki rječnik; etimološki rječnik]

2.    a. ukupnost riječi jednog jezika; leksik, rječništvo, vokabular b. jezična izražajna sredstva, riječi i način izražavanja određenog područja, osobe, kruga ljudi ili sl. [ulični rječnik; dječji rječnik; krležijanski rječnik; prostački rječnik]
-----------------------------------

Na ovo pod 2. sam mislio

[Daluka]

Zač volin Kantridu

Bi neki rekli aš voliš puno sedet.

Dr. M. Laginja, Kastav Grad i obćina:
"Zametaka je županija na jugu Kastva baš uz rečku medju. ... Sela ili vasi i zaselci te županije jesu: Trampi, Pužići, Mulci, Tići, Dmjevići, Mamići, Ći­kovići, Selinari, Stctrci, Pilepići, Malonji, Lenci, Rude, Pavinići, dolnji Blečići, Ka­trida. Dve državne ceste protiču tom župa­nijom, a to "nova cesta" iz Reke prema sv. Petru, koja dolazi na Kastavski kraj upravo kod vasi Rude, i starija cesta uz more iz Reke preko Voloskoga na Lovran, Mošćenice, Berseč i dalje do Pazina. Iz Reke dolazi na Kastavski kraj upravo u selu Katrida, gde je i financijalna straža od naše strane.
... Na Katridi je kamenik, gde se kopa kamenje za zasipe rečke luke. ..."

[Daluka]

... va Studene se reče kantrida.

[milić]

... va Studene se reče kantrida.

Ma kade si ovo našal? Moj stari je bil 1920. a mat 1928. godište i nikad od njih ni od drugeh Studenjci nisan čul tu besedu.
Kad san propićeval o besedi kantrida jedan, sudeć po prezomene, Talijan mi je rekal da morda kantrida dohaja od besede karega ča znamo iz brodogradnje da je potklada. To san "primio na znanje" i šal dalje.

[Daluka]

Kad san propićeval o besedi kantrida jedan, sudeć po prezomene, Talijan mi je rekal da morda kantrida dohaja od besede karega

karega od mletačke riječi carega, dalmatinske katriga, stolica

[elvis]

Riječnik nemože zastariti, on uvijek vrijedi za neki period.

Nije li to upravo definicija zastarjevanja - nešto što je nekada (u nekom periodu) vrijedilo a danas više ne?

[milić]

Riječnik nemože zastariti, on uvijek vrijedi za neki period.

Nije li to upravo definicija zastarjevanja - nešto što je nekada (u nekom periodu) vrijedilo a danas više ne?

zàstarjeti

zàstarjeti (zàstariti) () svrš. 〈prez. zàstarīm, pril. pr. -ēvši (-īvši), prid. rad. zàstario/zàstarjela ž〉

Definicija
1.    izići iz upotrebe (mode itd.), ne važiti više, ne biti suvremen
2.    izgubiti pravnu i sudsku snagu

[milić]

Zač obožavan Kastav

Već fanj put san, va društve, rekal da je jedino drugo mesto van Reke va ken bin proval bivat Kastav. I to ne va nekoj veloj kuće leh va centre Grada pa kad ki poznat pasa lepo pokuca na poneštru i pita te kako si a ne uvde kad va lifte gledaš judi ke ni ne poznaš a čuješ da bivaju va zgrade već 5-6 let. Kastavci reku Grad za mesto na bregu visokemu 365 metar i ko je već 1400. imelo statut ki je napisan na glagoljice a puno ime mu je bilo Zakoni grada Kastva zapisani po rojstvu Isusa Krista let gospodnjeh tisuće četira sto. Judi ki bivaju va Grade su Grajani a van nekadašnjeh zidin su Kastavci. Znan da će se neki name jadit zač ne pišen Kastafci ma ja san navadan ovako a kemu pači neka ne čita.
Mislin da ta moja jubav prama Kastve ni nastala slučajno leh to valda saki Kastavac posiše z materinen mlekon. Magari su moji mat i otac Studenjci, ča bi se reklo - nisu pravi Kastavci, vavek su lepo i z puno jubavi govorili od Kastva i Kastavci. Pa i kad su mi, kot mićemu, povedali smešice o temu kako su Kastavci sadili srdelice, kravu na turanj dizali da pobrsti bršjan, crekvu na drugo mesto rivali...
Otac mi je povedal kako je z nonoton a i svojen ocon užal poć va Kastav. Z nonoton najveć puti za Belu nedeju a z ocon po sakidanji dan, kad je ov imel kakov sastanak aš je trejseteh let pasanega stoleća bil odbornik al tako neč va kastavske općine.
I tako san ja najprvo z familiju a kašneje i sam počel prihajat va Kastav. Priden do Šporove jami, kade je oštariju držala moja prerano umrla kujina S., pa pomalo nazgoru do grobja ko rado obajden i poćakulan z poznatemi, najveć trećemajci, ki tuka počivaju. Hitin oko na školu i čuvaricu grobja - crekvicu sv. Lucije. Na križanju za va Grad se domislin da je tu negdere bila i Prašćarija kade su moji prašćiće kupjevali za gojit. Pasan pul Belvedera, pogjedan prama Dukićon i na hodeć pozdravin kastavski trolist ki kot stražari hrvatstva stoje pul Fortice.
Zavijen na Forticu, hitin oko na Opatiju i Lovran pak se zmislin kako su Kastavci z kanula od bazga tukli po Lovrane. Nasmejen se na vas glas va sebe i pomalićo, korak na korak, daje. Zdesna pride crekva sv. Fabijana i Sebastjana a onputa još malo, pa smo pred Ložun. Stojin i mislin kakove su se odluke tu prinašale. I se mislin zač Kastav, ki je bil rasadnik artižani, imel Delavsku školu nikada ni storil zidi na Lože. I, me par da san odgovoril zač. Zato da judi ne ćanpaju ča je je leh da na brzinu reku ča je glavno, odluče ča je trebe i gredu doma al va oštariju kade je tepleje i ne puše bura al pada daž.
Pasan kroz Volticu nad kun da je grb ježuviti od kamika storen.
I tu, nutre, mane počne lepota. Te napeštane kuće ka saka svoju priču poveda i saka svoje živjenje živi. Va jednoj je, va noveje vreme, atelje a va drugoj muzej. I Vilkotova bačvarija je tu negdere. Va njoj za Beli pundejak z društvon kantan i mlado pijen a mlade i stare naslišan kako lepo kantaju i gjedan one z lahkemi petami kako tancaju.
Od tuda trebe daje poć, prama Lokvine kade je na sredine šterna. Tuka da je bila lokva va koj su 1666. utopili zločestega kapitana Frana Morellija. Tuka je i kaštel va ken su kapitani kastavski bivali i z kega su komandali z Kastavsku gospošćijun. Na kantune je stara crekvica Svete Trojice. Malo zgora kaštela je župna crekva svete Jelene spred ke se lepo vidi Kvarner. Zada crekve je Žudika, kula va koj se nekada sudilo za nedela a i štrigan.
Na istočnemu delu Grada su mirine crekve sv. Marije, ostanki vele crekve ku je narod nazval Crekvina ne samo zaradi velikosti leh i zato aš ju je jena sirota dovica prokjela zaradi tega ča je morala pesak na rabotu nosit se od Preluka namesto da doma dečicu redi. Nikad da ni finjena zarad tega prokjestva.
Od Crekvine se daje gre va šumu Lozu i Lužinu po koj je još tragi od Rapalske meje i Šparožna jama ča su moji prijateli z Udruge 051 se previžitali i opisali a ja san par put prošećal po urejeneh šetnic ke su nazvali Puž i Zec, a onu najdaju - Srnu nisan pasal.
Lepi su ti puti za prošećat, jušto da ti počinu oči i duša. Prošećeš, prideš na Vidikovac (zovu ga i Šikićeva fortica) sedeš va kakov kafić, keh je koš i još, popiješ biru i partiš doma z punemi baterijami.
Tako nekako zgjeda pasat po sakidanji dan. Ma kad je Bela nedeja onputa je fanj drugačeje. Na tisuće judi se pešta iščuć neč a nač, potla par žmujići vinića, pozabe. Ma zato ne pozabe srest dragi prijateli, kolege z dela i oniste s kemi su va škole klupi brusili. Mlaji i zatancaju na Fortice al Crekvine a stareji se drže šanka al žmuja da ne padu potloh.
Mane gužva već let ne paše pa ren raje na posajmicu, kako se reče za pundejak potla Bele nedeje. Ta dan zovu i Beli pundejak. Na ta dan moj kompanjo D. i ja gremo Kastve va pohod. Tu nas dočeka V. pa malo obajdemo šanke ke drže naši poznati kastavski vinari, prošećemo semo-tamo, pojimo čagod va Fortice al na Crekvine pul lovci i finimo va Bačvarije pul I. Tamo pridu mnoge grupe kanturi pa i mi šnjimi zakantamo, ako se to tako sme nazvat. Evo na, Bela nedeja je jutra i ni ča leh postoli naluštrat za Beli pundejak.
Lepi moj Kastav, evo me pundejak po navade, kot i sako leto!

[Daluka]

Katrida, Petar Skok

[milić]

Odlično, hvala! 

[elvis]

Kantrida od cathedra - vrlo slično 
Turan od turris  -vrlo slično 

Brgud(i) od virgultum   -