Klana i okolica

[milić]

Evo, dosta je bilo ljetnoga sna. Milić ponovo jaše, ili kako kaže u priči,  milić je "na konjiću".
Ova pričica je, ustvari, prva u kronološkom smislu samo šta danom početka objavljivanja ovih pričica nije bila u potpunosti gotova. Sada je to - to. I mogu vam reći da sam s ovom pričicom dosta zadovoljan. Isčeprkali smo još poneku riječ: bogovica, rezgat pa i botra je u sasvim drugačijem značenju nego što se inače upotrebljava po Kastavštini.
Nadam se da ću opet moći uhvatiti ritam od jedne pričice tjedno. To si od svega srca želim.

[milić]

Kako je počelo

     No, dragi moj sinak, tutu lipo sidi i naslišaj ča ću ti jast povidat od mojiga živjenja.
Rojen san jedanajstiga januara hijadu devet stote. Mat  Johana mi je bila z Škalnice, a oća  Studenjac – Ive Šestanov. I jast san se rodiv puli Šestanovih. I to doma, va kući, aš se onda doma rajalo. Pomagala je babica, ko je arivala na vrime. Dite, kiga je porodila, je babicu ili ku drugu žensku ka ga je prijela na porodu, kašnje zvalo botra.  A te babice su ti bile, tako, više privajene nigo školane za takovo, delikato dilo. I moja pokojna mat je bila babica. Va to vrime su mnoga dičica umirala. Ili zajno kad su se rodila ili malo kašnje od kakove boli. Najveć od proliva. Dite se brzo, kako se rodilo, neslo na krst aš ne daj bog da je umrlo bez krsta. Govorilo se da bi onda postav fudlak i da bi po noći strašiv. Sa grobja su imela div kadi su ta, neboga dičica zakapana. Nika i bez krsta. Tu dičicu, ku nisu arivali krstit, bi se zakopalo va posebnu jamu i nisu imela svoj grobić. Po mojmu mišjenju, ta veli pomor med dičicu se dogajav najveć zato aš su judi onda živili va nesnažnih prilikah. Danas ne moreš ni zamislit da se tako moglo živit. 
     Ja san biv prvo muško dite mojin. Kumpar na krstu mi je biv ćaćin brat Tone, a kuma, veruj mi, ne znan ka je bila. Bila je navada da kumpar stavi otroku va njedra kakov solad. Ne znan je li moj meni ča staviv, ali se kumpar onda jako poštovav. A danas, vidin, da ga poštuju ako in da kakov boji dar. Meni moj kumpar ni nikad neč veliga kupiv, kot na primer uru ili tako ča, ali vavik bi mi, kad bi šav v Riku ili kamo drugamo, prnesav kakov bonbonić, orih, suhih smokav, ali ča takoviga. Potla krsta se šlo doma i bila je navada da se, onin ki su bili na krstu, ponude frite i bilo kafe.
     Dite je po noći bilo va zibeli, puli matere va kamari, a prik dana va kuhinji, da ga mat ili ki drugi ma na oku. Pofašalo bi ga se tako da mu se med noge dilo kakovu krpu i onda ga se z fašon zamotalo kot pinku do pod pazuhe. Nike ženske su otroka zamatale tako da su mu i ruke pofašale pa nebogo dite se ni moglo ni od muh obranit. Zgora tiga se stavila kot nika stomanjica, ka je bila prez rukavi, i odzada se veživala z plenicu. Zvali smo ju bogovica. Kašnje, tamo već pedesetih, su se dica počela fašat naširoko tako da su in nogice bile raširene.
     Z dicu se ni puno bacilalo aš ni baš bilo vrimena. Ki se tev puli onoliko dila još z dicu igrat. Ako je va familiji bila stara mat još kako tako. Tr znaš kakove su stare matere. Vavik najdu vrimena za svojga nuka ili nučicu. Ona bi ga prijela i posila va krilo pa bi ga šagatala i kakove pesmice kantala. Jast se domišjan jedne ku mi je stara mat kantala prvo nigo bin zaspav:
                            Nanaj, nanaj
                            Anđelić moj.
                            Nanaj, nanaj
                            Anđelić moj…
I se tako potiše dok ne bin zaspav.
     Zmišjan se da me je stari ćaća užav, kad san već malo poodrasav, posist na « konjića» kako je on zvav. On bi siv na klup pa bi prekriživ noge. Ja bin mu siv na kolino obrnjen prama njimu. Prijev bi me za ruke i dizav tu nogu. Pomalo, pa se brže. A ja bin vriskav od veseja. Znav me je i nest, onako okoli vrata, ča smo zvali «na krkač». I onda bi vragav zmanu i rezgav kot konj.
    No i tako san ti ja rastav. Pa je prišlo vrime i za poć va školu.  Onda je pučka škola bila va Klani i durala je tri lita. Va to vrime je bilo malo hoj va školu, malo va šumu, malo z ćaću v Riku. A kako smo živili ne moreš ni zamislit. Više lačni nigo siti. Dok se nisu stari najili mi dičina nismo smili ni sist za stov. Kad bi oća odmakav sklidu, z ke je jiv, i obrisav z prsti brke, komać onda smo mi mogli sist i pojist ono ča je ostalo. No, da ne biš misliv da ti, stari, judi nisu volili svoju dicu, ali pak da su bili sebični. Ne, to ne. Nigo morav je tako storit da bi se magari on najiv da bi mogav trdo dilat. Aš ako on ni mogav dilat ki će ni dicu prehranit.
     A, kot dica, obučeni smo bili više va krpe nigo va spodobnu robu. Onda su ti po kućah šle šilice pa bi prekrajale robu. Nikad su bile va kući i po više dan. Nan dičini bi kakovu stomanju rasparanu ili pak brageše od oće prekrojile i zašile. Saki komadić robe se skoristiv. No, doduše, one su najveć dila imele va kući kad se kakova mlada spravjala ženit pa ji se šila dota. Bosi smo najveć bili magari je bilo postolari i va selu. Pa i gromiški postolari su pohajali po selu i nudili postole i papuče.
     Šli smo Klano va školu, a so drugo vrime smo dilali se ča smo mogli. I po doma i po poju i po šumi. I z oću san drva pejav v Riku aš mu je tribalo sanit za nazdolu. Malo je bilo vrimena za igrat se, kot ča se daju današnja dica. Jedino kad bin krave zagnav i biv puli anje onda smo se znali igrat. I se tako vadeć se, ča va školi ča doma, prišav je Prvi svecki rat . Poćera su ga zvali Veli rat aš nisu znali da će za njin prit još jedan i to još veći.

bogovica – dječja pregača
botra – žena koja je prva prihvatila novorođenče
brageše - hlače
frite – posebno pripremljen kruh
fudlak - vukodlak
krst – krštenje
kumpar – kum
lačan – gladan
magari – iako, premda
nesnažno – nečisto, neuredno
nest – nositi
pofašat – poviti, omotati u povoj
pohajat – hodati, obilaziti
privajena – priučena
prnest – donijeti
puli anje – pokraj njih
rezgat – rzati, glasati se kao konj
roba – odjeća
sanit - kočiti
sklida – zdjela
spodobno – slično, nalik
spravjat - spremati
stara mat – baka
stari ćaća – djed
stomanja - košulja
šagatat – škakljati
tutu – ovdje
vadit - učiti
zagnat – stjerati  /krave na pašu/
zajno – odmah
zibela – kolijevka



 Kamara i zibela va Rebičini kiši
Preuzeto s http://povjesnicaklana.com/slike/Galerije/Rebicina_kisa/rebicina_kisa.html

[jazbac]

 

[Sabina]

Lijepa pričica...zanimljivo je da je još do mog djetinjstva ostalo "na konjića" i "na krkače"  sve drugo se izgubilo.
A meni je svekrva koja je rodom bila iz Bribira pričala kako ona nije do druge godine hodala zato jer su odrasli išli na polje a djete bi se umotalo u zipku, malo šećera se stavilo u krpicu i zavezalo te bi se to djetetu dalo umjesto dude da bude mirno.
A svoje prve cipele (tj.prije bih ja rekla neke kožne papučice) je dobila sa sedam godina...Pričala mi je i kako su se djeca veselila bilo kakvom sezonskom voću ili povrću (smokvama, mrkvi, grožđu, kupinama)...više su bili gladni no siti.......a opet su ispali dobri ljudi.

[milić]

Još od 1847. lita Studeno je pridružena općini Kastav i službeno je ime bilo Općina Studena pridružena Općini Kastav. Tako je bilo i posle Prviga sveckiga rata. Takova situacija je ostala se do 1941. lita i okupacije od Talije.
Potle Drugiga rata je Studeno potpalo pod općinu Jurdani pa Matuji  i sada pod općinu Riku.

Jazbac, fusher ova zadnja rečenica je dobra? Ča je bila potla rata općina Jurdani?

Lijepa pričica...zanimljivo je da je još do mog djetinjstva ostalo "na konjića" i "na krkače"  sve drugo se izgubilo.

Jasno je i zašto je to ostalo. Vrlo jeftina i lijepa zabava.
Jučer čitam u NL izjavu jednog sedmogodišnjaka da je najsretniji bio kad je dobio na poklon helikopter koji leti pred 2-3 godine, ali da se pokvario pa više ne leti. Komentar suvišan.
A ovo sve ostalo je isto. Svi smo jednaki u siromaštvu, je li?

[milić]

Zokxy zaboravio si zalijepiti zadnju priču u Milićeve priče...

No, no i sad vidim da je broj hitova Priča prešao 2,000. Bravo ja
Zadovoljan sam brojem čitača obzirom na malo područje zainteresiranih pa i jezik.
Hvala svima koji čitaju. Ali još više bih volio da se jave, ovdje na forum. Može i meni doma, osobno s konkretnim kritikama. Ma dajte nešto što ja nisam isčačkao. Možda sam negdje u jeziku pogriješio? Javite se molim vas.

[zokxy]

 
Jučer sam, a i prije, umoran ko pas, a imam i drugih obaveza, pa zaboravih, ali hoću prvom prilikom. Sada na Rabu uživam u lignjama. I crnjaku. 

[milić]

Zavidim ti.

[jazbac]

Zokxy zaboravio si zalijepiti zadnju priču u Milićeve priče...

No, no i sad vidim da je broj hitova Priča prešao 2,000. Bravo ja
Zadovoljan sam brojem čitača obzirom na malo područje zainteresiranih pa i jezik.
Hvala svima koji čitaju. Ali još više bih volio da se jave, ovdje na forum. Može i meni doma, osobno s konkretnim kritikama. Ma dajte nešto što ja nisam isčačkao. Možda sam negdje u jeziku pogriješio? Javite se molim vas.

Ča se zajika tiče, po keh pismeh da te mi ispravljamo? Mane je odlično i puno besed san naučil. Inače san alergičan kad mi "stručnjaki" ki spred imena imaju 2-3 titule korigiraju texti za festivalske pjesmi potpuno krivo, a samo zato da neč napišu i opravdaju honorar.
A ča se sadržaja tiče ovo zaslužuje bit va debjeh koricah od ovega našega dragega foruma

[milić]

Lepo je to ča pišeš, al ja to znan. Tr si mi to već par puti napisal. Želin reć da se to ne odnosi nate leh na oni ča čitaju, a ne reagiraju. Ja bin ih nazval pasivisti.
A ča ovo nisi videl? Jurdani, Jurdani mane muče.

Još od 1847. lita Studeno je pridruženo općini Kastav i službeno je ime bilo Općina Studena pridružena Općini Kastav. Tako je bilo i posle Prviga sveckiga rata. Takova situacija je ostala se do 1941. lita i okupacije od Talije.
Potle Drugiga rata je Studeno potpalo pod općinu Jurdani pa Matuji  i sada pod općinu Riku.

Jazbac, fusher ova zadnja rečenica je dobra? Ča je bila potla rata općina Jurdani?

[jazbac]

Ja mislin da je. Jurdani su imeli (i još imaju) svoju poštu, štacion, dve kasarni i poljoprivrednu zadrugu. Moran poiskat va "Liburnijskeh temah" koliko je postojala i koliki teritorij je pokrivala

[milić]

O Prvom svjetskom ratu od mojih sugovornika malo se da izvući. Sjećaju se nešto, jasno po priči, ali to je sve šturo. Ali evo ova imena, odnosno identitet poginulih i ranjenih, su ipak tu.
Sve ostalo je moje mutno sjećanje na priče, u mome domu, o tome ratu.
Ovo o avionima i zračnom balonu je izvučeno iz knjižice I. Blečić Gržićev Srdoči nekad.
Predugo se ovo već kuha u mojim mislima očekujući još poneku informaciju. 
Već sam u tom silnom tramakanju počeo gubiti pasuse. Imam na nekolko mjesta iste stvari pa...
Pozdrav svima koji čitaju.

[milić]

Prvi svecki rat i nova država

      Kako misliš kuliko se domišjan Prviga sveckiga rata  Ti biš otev da ti ja se povin, a ne moren se siga spametit. Lita su već pasala. Ja ne znan ča san čera jiv, a ne ča je bilo pred tulikimi liti.
    Imev san 14 lit kad je to zlo počelo. Još prvo su pobrali mnoge za pušku parićane va rezervu, kako su to onda govorili. Bilo nas je dvanajst va familiji - mat i oća, stari ćaća i mat i nas osmera dica: jast i Ive i sestre Marica, Anica, Rozina, Milka,  Katica i Bina. Sidili smo za stolon kad je oća rekav:
     - Čujte dico! Judi govore po Riki, sigutra dok san drva raspejivav, da je Austrija
zaratila z Srbiju. To ni dobro. Ča će daje bit ćemo videt. Ali siguro će mene pobrat va rat. Ti ćeš File pomagat materi kuliko buš mogav. Se ča san jast dilav moraš i ti.
     Ča san jast mogav drugo nigo reć da se ne pojida i da ću storit se ča najboje znan.
Ta dan san dobro zapametiv. Biv je 28.7.1914-iga lita. Si rezervisti su morali poć na zborna mista, a kašnje i si muški od osavnajst do pedeset lit. A da znaš sinak, kako mi je teško bilo.
     Oću su brzo zeli va vojsku i poćera  je povidav da su, on i još niki z sela, bili va Galiciji i Karpatih pak da su ratovali z Rusi. Govoriv je da je tuliko sniga bilo da je jedanput čez dimjak pav vuk va oganj aš su se grili va niki baraki. Komać da su ga čez  vrata van zagnali. A koliko gladi da je potrpiv. I zime. I šenci. Po cile dane da su šence ubijali. No ipak se je vrniv čitovat doma. Mnogi nisu bili te sriće. Tako je na primer va Rusiji poginiv Pave Brmalj Buzgoć kot i oća Marije  Matačeve, kimu se ne moren imena spametit. Stric Lazarov je ostav prez noge, a Ive Brmalj Krajev je biv ranjen va nogu i do smrti je šepav. Ne moren se domislit je li još ki nastradav, ali siguro je. Morda biš to našav va kakovih knjigah zapisano.
     Tvoj bižnono Mate Puhov je pak biv na Soški fronti kadi su se peštali z Talijani. Kad su Talijani prišli do Trsta čulo se, puli nas, kot da grmi. A to su kanuli grmili. Bože moj, kako je tamo moralo grmit kad smo mi ovdi čuli.
Ma sagder su ti nebogi judi bili. Tamo, kadi su oni bili, siguro ni bilo dobra. Ma kot i va sakin ratu vavik sirota nastrada. Neće, ne boj se, bogatuni. Oni na vrime pobignu od takove nevoje.
     Govoriv mi je poćera Mate kako su bili tamo, okoli Kobarida va Sloveniji i da su bili va nikih kavernah. To da su škuje va živin kamiku skopane. Tako isto da su i Talijani bili ukopani pa artilerija ni niš mogla. Kad bi generalon, vaja, bilo dosadno onda bi teli prik Soče pa bi komandirali juriš. I judi su padali kot zrile fruške.
     Va selu su ostali samo dica, ženske i starci. Ja san, kot ča san i obećav oći, dilav se ča je tribalo. Jasno da su mi i brat i sestre pomogli. Ali falilo nan je prakse. Nismo puno tiga znali.
     Kad san jedanput pejav drva v Riku povidali su da je nikak balon hitav bombe po Riki i da je jedna ženska poginila. Jedan dan, bilo je to jušto 1. 8. 1915. lita, šav san z Rike doma z koli kad se na Pehinu spustiv jedan talijanski avijon. Posle san čuv da je protivavijonska artilerija zrušila još dva avijona, tako da to pametin aš mi nisu baš saki dan avijoni padali pred noson. Ja, i još se spamećujen da su povidali da su cilu Tvornicu  torped, ka se onda zvala Fundarija, preselili nikamo va Austriju. Za nju su šli i si dilavci.
     No, i to zlo je finilo. Mislili smo glavno da smo ostali čitovati pa ćemo već nikako daje. Kad su se judi počeli vraćat z rata bilo je veseja. Ali niki su prišli doma prez ruke, oka, noge… Ali su ipak prišli.  Kad je pasalo fanj vrimena nike familije su videle da njihov sin, muž i oća neće ni prit. Da je ostav nigdi va Galiciji, Tirolu, Karpati… Se va misti za ka ni, prvo rata, ni znav da postoje.
     Kad je rat finiv finila je i Austrp-Ugarska. Raspala se kot tikva. Malo su ju šćipnili ovdi, malo ondi. Nove države su se storile na njejin teritoriju. Okoli Rike, pa tako i oviga kraja, je bilo povuci - potegni par lit. Simo su prišle mednarodne snage pa drž i nedaj. Pa cirkusant D'Anunzio. I, da bi, na kraju Rika spala pod Taliju.
     Ča se tiče Studene ona je po Rapalskimu ugovoru pripala va Krajevinu Srbi, Hrvati i Slovenci. Državu ka je storena kako bi Slaveni  na jugu Evrope živili va jedni državi. Mnogi su bili protiv tiga udruživanja, ali pobidila je ova pulitika. Znači, si južni Slaveni va jedni državi.
Kako je Klano po timu Ugovoru potpalo pod Taliju Studeno je va novi državi postalo slipo črivo aš je ostalo prez škole, grobja, župe…
     A ča je najvažnije, vaja, tri kvarti šume je potpalo pod Taliju. Pa i dobar div poja. Ma život su nan nove meje šundrale. Imeli smo «laša pasare» i mi i blago za poć  prik meje . Ali kadgod bi zafrkavali graničari, i naši i talijanski. Kakova je bila politička situacija tako su zafrkavali. Nikad manje, nikad više. Tako da si ti do svojga  parta morav pasat dvi granične vižite.
     Jast ne znan ko znaš, ali kot ča san rekav, Klano je bilo pod Taliju. Isto tako i Lisac, Škavnica, Briza , Ružići i Matuji. Z druge strane  je bila granica Ričina aš je prik Ričine biv Sušak. Spod Grohova ti je šla meja pa na Drinovu pa zdola Pehina na Zamet  i daje prik Srdoči na Matuje. Pod Taliju su, znači, ostale luka i železnica.
Kad se ta situacija malo smirila počeli su judi razmišjat ča i kako daje. Se je falilo.
Počelo se raznišjat o novi školi, cisti, grobju i se ča god.
     Još od 1847. lita Studeno je pridružena općini Kastav i službeno je ime bilo Općina Studena pridružena Općini Kastav. Tako je bilo i posle Prviga sveckiga rata .Takova situacija je ostala se do 1941. lita i okupacije od Talije.
     Potle Drugiga rata je potpala pod općinu Jurdani pa Matuji, a sad je pod Općinu Riku

Bižnono - pradjed
Čez – kroz                                                     
Čitovat – čitav     
Črivo - crijevo                                                 
Fruške – kruške   
Grit - grijati
Jast – ja     
Grit - grijati
Jast – ja     
Kanul- top
Meja – granica
Neč – nešto     
Oća - otac
Otet - htjeti 
Parićan – spreman, sposoban
Pasat - proći         
Peštat – gnječiti
Pojidat – uzrujavati
Povidat – kazati, reći
Sagder – svugdje
Siga – svega
Sigutra - jutros
Sovdi - novci
Storit - učiniti
Šenci – nametnici - uši
Škuje - rupe
Šundrat - uništiti
Vižita – pregled
Vrnit- vratiti
Zagnat – izgnat
Zdola – odozdo, ispod





Izvor mapa granice: lokalpatrioti-rijeka.com  by ozren

[Rijeka]

A gdje su se zakapali mrtvi dok je bila granica? Isto u Klani? 

[milić]

Do 1918.-19. u Klani, nakon toga župa sv. Matej groblje Sveti Matej ,  od 1945. opet Klana.