Tako, tuširam se i mislim o svemu i svačemu. I padne mi na pamet jazbacova predstava Koze diši prč. Pa si malo mislim. Ma gdje je on našao Merikana povratnika oko 1960. Pa ja se ne mogu nikoga sjetiti iz moje okolice. Ma valjda je tamo, va Rukavce bilo drugačije.
I sve tako misleći moralo se doći do Andreta Puža.
Najme, ča.
Negdere va maje 1982. leta ja san po prvi put ležal va sušačke bolnice na nekakoveh pretragah. I va iste kamare na nefrologije ležal je i spomenuti Andre. Bil je dosta star i izrauban. Zmišjan se da je imel kilu pa san mislel da će mu to operirat. Al nisu.
No , ja san bil najmlaji va kamare pa kako san smiron hojeval van iz bolnice šećat okolo to san sprotu drugen se neč kupjeval. Pa tako i barbe Andretu.
- Milić, pliz, kupi mi malo kukise /cookies po engleski/ ja ću ti dat samting.
I tako iz dana va dan, bilo ih je desetak, ja kupujen barbe Andretu kukise i sečagod. I pomalo se zbliževamo. Pa mi je govoril kade je bil, ča je delal, kega ima od roda. I se tako naprvo.
Puno tega san pozabil, a dosta san i zapametil.
Teh let se je vrnul z Merike. Bival je, me par, pul Matuj z neken rodon. Ni bil oženjen, ni dece ni imel. Tako da mi se čini da je došal va " neprijateljsko okruženje". Bez puno beči, star i bolan.
Ali neke stvari san zapametil. Jako je volel govoret od "oneh stvari" pa san tako zapametil jednu Poljakinju ka je, kad su delali điđimiđi, smiron držala jednu nogu vajer, kot pal joj je stala, kako je barba Andre govorel.
Imel je dva kujina, ja mislin va Merike, ke je zval bukvići. Zač? Aš da samo sede, kot bukvići, pred televizijun, pred njimi da je kašeta biri pak da samo loču i va škatulu gledaju.
Da je delal negdere va šume. Po par meseci da nisu va civilizaciju prihajali.
No, uglavno to bi bilo to o barbe Andretu.
I jednega lepega, sunčanega dana ja, a i on smo otpušćeni z bolnice. On nebog, onako sam z nekemi boršami stoji, žalostan.
- Barba Andre ću vas doma zapejat?
- Ča biš?
I tako san ja njega zapejal doma. Popili smo pijaču va Turiste.
I on će mane.
-Evo , san ti rekal da ću te nagradit.
I rine mane papirnatu novčanicu od jednega dolara.
Ja san ga pogledal spod oka da vidin dal me zajebava ili.. I vidin va okicah radost, zadovoljstvo ča me more nagradit.
Toliko mi se ta njegov poklon pijažal da san ga stavil va takujin. I od onda ga vavek držin nutre.
Neki govore da ki ima dolar va žepe da će vavek imet soldi. Ja san živa potvrda da je to tako. Baren do sada.
Čul san da je Andre Puž brzo za ten i umrl. Nisan znal aš bin mu na sprogod šal.
Ali barba Andre je ipak doma došal umret i zakopan je va zemljice ku je jako volel. Počivajte va mire barba Andre!
Evo i tega dolara ki je pul mane negdere od maja 1982. Bil san zapisal i datum na margine , al se zbrisalo.
