Izuzetno vrijedan članak o japleničarima (ljudi koji proizvode vapno) objavljen u najnovijem broju ( listopad 2017. br 73) Glasa kastavskog na stranicama od 28 do 30.
(Glas kastavski je u PDF-u pa sam nekako skinuo tekst, a
slike će Elvis, jerbo ja ne znam.
)
TRBUHON ZA KRUHON – JAPLENIČARI
Kastafci po Kranjcehtekst ARSEN JARDAS
Zemja ni bila dosta za preživet pak se j’ moralo i z drugen mučit, a Kućani su najviše
delali japlenice. Okol domi ni bilo jako kade, delalo se je po Lužine, a za malo
više zaslužit moralo se j’ poć va Kranjci kako su naši judi rekli za Sloveniju.
Danas se smiron govori kako mladi judi hode vanka
delat, trbuhon za kruhon. Vaveki je tako bilo, judi su
hodili po svete aš je bila čuda veća mizerija nego j’ danas,
a hodilo se j’ najveć va Meriki. Va oveh krajeh se j’
živelo od zemji ke ni bilo preveć, a familije velike. Na
stalnen dele je bil malo ki Kastavac.
Zemja ni bila dosta za preživet pak se j’ moralo i z
drugen mučit. Kućani su najviše delali japlenice (negde
reču i japnenice, ča je morda ispravneje, ma pul nas su
japlenice). Okol domi ni bilo jako kade delat, ako se je
ka storila, storile su je najveć same familije va svojen i
to pozime. Delalo se je i po Lužine.
Za malo više zaslužit moralo se j’ poć va Kranjci kako
su naši judi rekli za Sloveniju. Delalo se j’ šumske cesti
kamo su hodile veće kumpanije, ma Kastafci su bili najveć
poznati kod dobri japleničari i paleri.
Zahvalil bin se gospodinu Božidaru Premrlu z Ljubljani
ki istražuje naši judi ki su delali po Slovenije. Rad
san mu va ten pomogal pak smo prišli do interesantneh
podatki.
Japlenica Mateta Dukića
Prvi put se va dokumenteh općini Kopriva na Krasu
spominje japlenica Mateta Dukića – Jenkotovega od
Žegota, već 1869. leta. Z drugeh dokumenti je videt da
su do Prvega svetskega rata po ten kraje delali najveć
kastavski japleničari. Va marče mesece 1883. leta se je
za japlenicu va Koprive dogovaral i kastavski japleničer
Andre Jelovica – Maričićev od Brnčić. Tamo je delal
više let za redon. Za svoji sini storil je dve nove kuće na
Krajevce 1909. i 1913. leta.
Japleničar Ivan Orban – Zvane Juretov od Martić, sin
Mateta i Marije rojene Jardas, ki je bil rojen 1859. leta,
jedan je od prveh ki je onuda deleval. Na japlenicah su
pomogle i ženske, pak je tako spoznal Franciku Grgič z
Velikega Dola. Va nju se je namoral aš da je imela lepe
nogi, pak su se i oženili 1888. leta. Tamo je ustal za zeta,
dok ni umrl 1929. leta. Tega Zvaneta su domaći zvali
Urban z Kastva i čuda jih je navadil od japlenic. Va njihu
familiju Martićen je kašneje prišla i nevesta Kranjica
pak jih i dan danas doma zovu Kranjičini.
Još je i danas živeh nevest va našen kraje ke su se spoznale i oženile
za naši judi na dele po Slovenije. Za raton su ženske najveć
kuhale delavcon.
Postoji pismo Josipa Brnčića – Martinčićevega od Brnčić ko je
pisal županu va Koprivu 1914. leta kada te prit delat i koliko dreva
za kolci i punteli trebe parićat. Spominje i svojga kumpanjona
i kujina Josipa Srdoča – Pepića Martinčića od Jelovičan ki je od
zasluška storil novu kuću pul Žegota.
Naši judi su delali po soj Slovenije, od Pivki, Postojne, Rakeka,
Logateca, va Loškoj doline, na Blokah se do Kočevja, va Maribore,
Staren trge...
Za Slovenki, dve sestri su se oženili dva kujini ki su tamo delevali,
Cvetko Jardas – Paronov od Jelovičan i Dušo Jelušić – Črnićev od
Jelušić ki je svojni povedal od teškega dela po Slovenije....
Va marče mesece kad se je okol domi skopalo, obdelalo grunat,
posadilo, muški od dvajset let pak dokle su bili vredni, to judi va
najbojeh leteh su šli va Sloveniju. Doma su grunat i blago nastale
ženske i starci.
Va kompanije je bilo osan judi, to se je već po zime dogovorilo
ki će bit s ken va kumpanije. Jedan je bil proto ki je pogajal i vodil
delo. Ako je va kumpanije bilo manje od osan judi je bila čuda
veća muka, a ako je bilo više judi je bilo preveć. Na delo se j’ šlo
hodeć. Saki je va rucak zel koser za štrpat, špag za butori veževat,
dve ponjavi, jaketu za pod glavu. Kumpanija je morala zet šejst
kopanjic, četire sekiri, veli bat, dva srednji batići, dve, tri punti
i jenu macolu, četire matiki, četiri pet krampi i lopatu. Pul sega
tega nesli su velu pinjatu za palentu, saki svoju zdelicu, pirun i
žlicu, još i barilu od trejset litar za vodu.
Baraka za dve ure
Kad su prišli na mesto već jušto dosti trudni, su šli nać spodoban
dolčić va ken je dosti zemji za japlenicu, okole pak dosti kamena
i šumi. Prvo delo njin je bilo storit baraku za spat. Morala j’ bit
storena va dve ure.
Storili su je od dasak ke su bile naprvo parićane z krovon na
jenu vodu. Za ležat su od zadrugi dobili dve bali slami ka je morala
durat dva meseca.
Stavili su je okol deset centimetar, a kad su šli ća, sa je bila zničena,
a fanj put i puna buh. Jeno deset metar od baraki se je storila
kuhinja. Saki dan za rušnju, obed i večeru se je kuhala palenta
i režnji od špeha. Kuhar je delal kot i drugi, okol jedanajste ure je
šal netit oganj i kuhat palentu da bude na uru zapolne obed gotov.
Po vodu se j’ hodilo na kakov potok ako je bil blizu, a ako ne,
saki drugi dan su njin pripejali kakovu bačvicu vodi. Bila je za pit
i za kuhat, prat se ni bilo kade.
Kad su kuhinju storili se j’ šlo drevo seć da se ča boje osuši aš
je tako rajo gorelo. Pet jih je šlo seć, a tri su počeli jamu kopat
za japlenicu. Najpro se j’ moralo senjat. Merilo se j na nogi, jena
noga je dva pedja, a tri nogi su metar. Ako je bila japlenica za jeno
1200 kvintali japna, morali su skopat škuju promjera šesnajst nog
ale okol pet metar. Duboka j’ bila pet nog ale okol metar i pol. Na
sredinu su zabili kolac, a okol njega su z drugen kolcen ki je bil za
meru z kranpon senjali do kuda rabi kopat. Kopali su z kranpon,
skopanu zemju su z matikun vukli va kopanjice i nosili na kup.
Kad je bila jama skopana počelo se j’ zidat. Moralo se j’ zidat
jušto va flajbu i na vrhe je morala imet jenak promjer kot i va
jame. Zid va jame je bil debel samo 25 – 30 cm. Va njoj su zidali
najviše dva delavci, a drugi su podavali kamene va jamu. Kad su
prišli zidon do vrh jami morali su storit vrata kuda te japlenicu
netit. Za prag su položili ploču široku metar, duboku 80 i debelu
najmanje 30 centimetar. Na nju su stavili dva vrat- njaki, a zgora
dve ploče ke su zvali laluki uprte jena va drugu.
Vrata su morala bit ča manja, široka okol 35 cm, a visoka okol pol
metra. Z dna jami su van spejali odušnik kega su na kraje zaprli.
Ako su imeli debja drva je bilo više popela, ako se ga je preveć
nabralo odprlo se je odušnik pak je zrak pojil popel.
Nad jamun su zidali voltu z velikemi podugastemi kamiki keh su
zvali kjuči. Saki red kjuči je bil jeno 10 – 15 cm više nutar dokle
volta ni prišla skupa. Volta se je zaprla z pločasten kamikon ki
ni smel bit lagji od 50 kil. Ta kamik su zvali baba. Babu je moral
prnest najmlaji japleničar i zato platit pet litar vina. Neki stareji
je na ta kamik zaklesal križić za sreću.
Okol pol metra od ruba uzidanega kamena se j’ skopal kanal za
širinu matiki, a dubok malo više od pol metra.
Va njega su posadili kolci za plot. Kolci su bili najviše je- lovi,
smrekovi al grabrovi visoki najmanje sedan metar i pol. Stavjani
su na razmak od dve nogi ale okol 70 cm jedan od drugega.
Rabilo je 25 al 27 kolac, glavno da je neparan broj radi pletenja.
Morali su bit stavni va ajbu, ma iskusni japle- ničari su to već od
oka umeli. Kanal se je zaten zasul i nabil z drvenen baton.
Saki drugi kolac su puntali na višine okol šejst nog z mi- ćemi
puntelami, a onda opet saki drugi na višine od šesnajst nog z
velemi puntelami. Mej kolci se j’ oplelo z ploton najviše z leskoven
ki će držat zemju. Nad voltun se j’ daje zidalo po sredine z
debelen kamenen ko su zvali srce, a okole se je kla- dalo tanjo. Za
na japlenicu se je storilo armaduru po koj se jehodilo gore. Storili
su i podići preko keh su dodavali kopanjice zemjun zgorun.
Junačko breme
Najvećo kamene su gore navajali, većo su nosli na čiverah, ono
manjo su podavali jedan drugemu, a brušku su nosili va kopanjicah.
Med kamenen i ploton se je sprotu nasipala zemja. Zemja
se je nosila i va vrećah va ku su zisuli četire pet kopanjic. Takovu
vreću ka je bila teška okol 80 kil su zvali junačko breme.
Kad su japlenicu uzidali do vrha su na vrh nasuli desetak kopanjic
bruški, to su zvali posipač. Va njega se j’ zabil maj, najviše
šmrika.
Za netit su znesli k japlenice okol 3.000 bremen drv, najviše
prašća. Bremena su bila duga okol dva metra, retko lagja od 80 kg
keh su vezali špagon i na hrte znašali do japlenice.
Kad su zapalili japlenicu su je palili dva do pol noći, a drugi dva
od pol noći naprvo. Cele butori se j’ z jenen kolcen z rogi kega
zovu ožig rivalo va japlenicu. Prvu i drugu noć su palili po četiri
skupa. Po dneve su znašali drva. Japlenica od 1200 kvintali je
gorela osan dan i moral si dobro znat ako je pečena. Kad njin se
j’ videlo da je prišlo japno na vrh su vrh japlenice pokrili z dobro
namočenun zemjun tako da oganj gre va stran i speče boki. Pečen
kamik za kvarat ure moreš prijet v ruki, a ako ni pečen i do tri
ure je gorak.
Kad je gotovo gre se šturat, vozit japno ća, sada od vrha do dna.
Sprotu se znimje plot i zemja.
Za japlenicu od 1200 – 1300 kvintali japna se je storilo do 400
žurnad ale skoro dva meseca dela. Računalo se je da jedan težak
mora na dan storit 250 kil japna.
Delalo se je i veće japlenice, ke su se pekle i po dvanajst dan i
dvanajst noći. Se je bilo dobro ako je dobro vreme, ako je daš
pekla se je i čuda više. Užala se je i zarušit, al pak zamuknut pak
je sa muka bila za niš. Ma, z japlenicami su se neke familije va Kastavšćine
fanj zabogatele, a neki su i zemju kupovali po Kranjceh.
Danas za sreću ni već takove muki, mlaji judi to ne moru ni zamislet.
Sada su neka druga dela i drugačija muka.
