Ekskluzivno: Milićeve priče o Studeni

[zokxy]

ČA SU JUDI DILALI

    Od čiga su judi živili? Od zemje, od grunta se živilo. Živilo se od poljoprivrede , od stočarstva i šume. Neč se posadilo pa bi bilo za jist juden i blagu. Pa se mliko neslo prodat i dobilo se neč sovdi . Va šumi se posiklo ko drvo pa se i zotin  neč zaslužilo. No uglavno od tiga smo živili. Jasno , bilo je i drugih načini , na ki su judi dohajali do zasluška, ali ovi su glavni.
    Prvo Drugiga rata malo ki je imev dilo va kakovin poduzeću ili pak državnu službu. Mate Vardijankin i Jože Matetićev su dilali kot balotari v Riki , a Jože Frankin je biv žandar i ja ne znan je li još ki imev stalno dilo. No , ovi dva ča su dilali v Riki , saki dan su zrana šli hodeć v Riku i nazad škurin prišli. Samo bi prespali i nazad šli. Ali imeli su dilo.
    Ljudi su se mučili kot blaga , ali teško se prihajalo do sovdi. Zarad tiga su mnogi šli dilat va druge države. Tako su mnogi šli va Meriku. Niki su , pak , bili va Francuski . I kamo god su , naši judi , prišli morali su trdo dilat da bi kakov solad doma prnesli . Uglavno su nakon par lit doma prišli . Z timi sovdi se storila kuća , kupiv kakov komad zemje. ..Niki su i više puti šli.
    Niki judi su dilali z Kastavci po šumah. Bilo kot japneničari bilo kot paleri pa su krbun dilali. Dilalo se i va šumah po Hrvackimu . Hrvacko smo zvali se od Ogulina prama zgoru. Va šumah se i grede tesalo i pililo . Dilali su i jarbole i vesla za brode. I švejari su se dilali za železnicu.
    Mnogi muški . pa i ženska , su dilali na žurnadu . Saki dinar je dobro prišav. Kad je snig zapav čistilo se cistu, a i v Riku se šlo čistit ulice.od sniga
    Va selu su trejsetih lit bili tri postolari . Jože Piković je , va jedni baračici puli Bregarove kuće , popravjav postole.  Tamo ni bila samo radionica nigo misto kadi su se judi okupjali. Jerbo va oštariji nisi mogav bit ako ne piješ čagod , a uvdi si. Tako bi malo poćakulali  i šli daje saki za svojin dilon. Puli gradišće je Ive Vardoć va svoji kući držav postolariju. Na Ravni je Mate Požarov , isto , imev radionu va ki je popravjav i dilav postole.
    Vavik je va selu biv i kakov butiger i oštar . Tako da su nike familije od tiga mogle živit. Kovač je biv Jače  Buzgoć ki je imev kovačiju va Blatnin Klancu. Potla rata je, sin mu, Štefan nastaviv dilat va kovačiji. Košare je plev Jože Vardoć i to sih veličin. Po njimu se reklo , kad biš va košari puno čiga nesav , da maš Vardoću košaru. Krepku i velu. Kašnje je i Dušan Banašerin plev košare.
    Kako smo bili , tako reć , odvojeni od svita morali smo se snalazit kako smo znali i umili pa su se niki judi navadili strić . I to bi dilali za miće sovde. Jedan od bricoti biv je Ive Vlašeć ki je znav i tako lipo povidat ot Kraljevića Marka i Musi Kesedžiji. Ako nisi imev sovdi mogav si mu dat par cigareti i biv je zadovojan . I Tone Banašerin je isto strigav muške. Ženske se , do Drtugiga rata , nisu ni strigle nigo su plele lase va kite. Starije ženske su splele jednu kitu , a divojčice i divojke obično dvi . Kašnje , tamo pedesetih , su počele dilat frizure po Riki.
    Posle Drugiga rata mlaji su se počeli školat pa su dilali po fabrikah kot mehaničari , letričari , tišjari, varijoci i slična zanimanja ka su tribala va industriji ka se razvila v Riki i okoli nje. Ženske su postale butigerice , šilice , konobarice…
    I va Klani , na Pilani , su mnogi dilo našli. I va Šumariji. A, hvala bogu,  bilo je dila. Samo ki je tev . Ćeš va građevini, ćeš va luki, ćeš va brodogradilištu, pomorstvu…No, va to vrime se , ipak , lagje prihajalo do dinara nigo prvo.
Nigdi šezdesetih počeli su judi , opet, poć dilat va druge zemlje. Sad su najveć šli va Njemačku , ali i va Francusku , Švicarsku i druguda.
    Jast san ostav vavik tu , va naši Studeni . I ni mi žav. Dilav san se ono ča san znav i ča su naši stari dilali. Malo san , pedesetih lit , dilav i va Čistoći do penzije. Bimo rekli va državni službi. Za plaću. Pometav san ulice , najveć po Sušaku. I ni mi bilo teško.  Aš , kad bin doma prišav z dila , komać onda san morav trdo dilat.

balotar – pometač ulica
čagod – bilo što, išta
japneničar – vapnar, proizvođač vapna
jast – ja
jerbo - jer
judi – ljudi
krbun - ugljen
krepka - jaka
lagje – lakše
najveć – najviše
nest - nositi
paler – proizvođač  drvenog ugljena
posić- posjeći
povidat - pričati
puli – pokraj , pored
storit – napraviti, učiniti
strić - šišati
škuro - tamno
švejar – željeznički prag
trdo – tvrdo
zaslužak - zarada
žurnada – dnevna zarada



Pometač ulica u Benkovcu

Izvor fotografije :benkovackoguvno.

[zokxy]

KOŠNJA

    Joh , kad se zmislin na košnju zajno mi se želudac obrne. Nisan voliv kosit pa bog. Niki ne voli ovo niki ono , a jast nis voliv kosit. Ja san više voliv dilat z drvi. Ali, ča reku,   ča se mora ni teško .
    Najprvo bi se kosilo okoli domi , po poji . Onda bi se šlo prama zgoru va Ravno pa daje na Pišćine , Gumance…Ma se bi se kosilo, saki laz . Blaga je bilo čuda , a sinokoš malo. Kad ni bilo dosti sena na svojimi sinokošami moralo se kosit i tuje. Te sinokoše se zakupjivalo od privatih vlasniki ili od Šumarije.
    Kosit se šlo zarana. Prvo zore .Tako da si , dok se dan stori , već trudan.   
Počelo se kosit kad je trava zrila za kosit.  A baš va to vrime počnu  i vrućine. Zato se  i šlo rano , dok ni tako vruće. Kosiv biš do jedno devete ure kad bi ti ki prnesav ručnju. Za ručnju se jilo obično kompir na cilo kuhan i ofriganiga špeha i pršuta. Popiv biš malo vina pa biš malo predahniv dok si naklepješ kosu. Ta , ki bi prnesav jist , obično kakov otrok, bi rastresav rede i lovnice ,  ako su dan prvo zdivene. Onda sopeta udri po travi  do povdan, kad bi prišla južina . Za južinu je obično bila palenta kompirica i zeje z kakovin meson. To biš pojiv i zavukav se va kakov hlad i malo zažmav ako bi se moglo  od muh. Oni ki prnese jist rashita rede , ča su pokošeni do tada , i obrne z grabjami seno ča se z jedne strane već osušilo. To bi obično bila ka ženska. Ako je ča trave med grmi ta ženska je požanje z srpon i znese na ravan da se boje osuši .
    Kad pasa najveća vrućina onda , ni druge nigo opet , primi se kose i kosi . Okoli pete ti prnesu kafe . Pa  malo predahneš i udri opet dok sunce ne zapade .
    Pred večer, a to kad ti kafe prnesu, bi prišav još ki , ako je biv doma. Seno ko ni bilo još suho bi zdili na lovnice , a drugo, ko je bilo suho, se doma zelo .
    Saki kosac mora imet sobun , jasno , kosu i brus za nabrusit je. Brus drži va osovniku, a njiga navrze na pas ili špag tako da je vavik š njin. Još mora imet i želiza i batić za klepat kosu.
    Nigdi, kadi su bili veći komadi, kosilo je više kosci. Kosilo se na žurnadu , ali i na način danas ja tebi jutra ti meni. Najveći mah z kosu , ča ja pamtin, je imev Mate Marajski stariji. Prik dva metra.
    Seno bi se doma zneslo na brimena  ako ga je bilo manje i bliže domi.
Ako ga je pak bilo više i daje od domi onda se pejalo z vozon. Na kola bi se dilo štrame i va nje shitalo seno. To se dilalo tako da bi se najprvo seno prigrabilo do voza i onda z vilami hitalo va štrame. Tu je seno niki slagav i klačiv tako da bude dobro naloženo . Za hitat seno najnarednije su bile one vile z tri roga. Nikad su bile drvene, a kašnje želizne. Ove drvene smo i sami dilali od jesena. Još dok je biv mladica  opazilo bi se jesen , ki je imev takove vije, da se moglo storit vile. Ako vije i nisu bile baš kako rabi , uz pomoć špaga i kakoviga kolca,  storilo se da rasu kako rabi.
    Kad se voz nahitav  na vrh bi se stavilo žrt i z verugami nategnilo da seno bude dobro stišnjeno. Voz bi se dobro ograbjav da se , po putu doma , čin manje sena zgubi.
    Kad bi se doma prišlo voz bi se shitalo na parićano misto. Mi smo imeli nad štalu prostor za seno spravit. Seno se nagnjelo da ga čin više stane. Med štalu i senon je biv jedan otvor ki smo zvali kotorata . Čez nju smo seno hitali blagu.  Ki ni imev dosti mista ,    za seno stavit pod krov , je zdiv kopu.
     Kašnje, kad su prišle motorne kosilice i traktori, bilo je lagje za kosit i doma seno   zapejat . Ali z senon je vavik vražjiga dila i jako ovisi od lipiga vrimena. Zato je košnja jako štimano dilo. Do kosci se  drži kot do najbojih majstri. Da jin se jist i pit najboje ča se more.
    No, još ću ti neč povidat od košnje.
Kako ja nis voliv kosit to su vaja i drugi videli . Tako je jedanput prišla naša Mare i prnesla Ivetu i meni ručnju. Pa govori :
- File , ča si se vas zgobiv? Kosiš kot da frušviće treseš. To ča si ti dosada pokosiv jast bin z palicu bila potukla. A glej Iveta . Kosi kot da plava.
Ja, naš Ive je biv med najbojimi kosci va selu. Lipo ga je bilo videt kako kosi.


batić - čekić
boje - bolje
brime - breme, sijeno težine oko 50 kg omotano konopcem i nošeno na leđima.
čuda - mnogo
dilat - raditi
frušvić - divlja kruška
hitat - bacati
jast - ja
južina – glavni obrok , ručak
klačit – nogama  tiskati
kopa – veća količina sijena složena u obliku stošca oko stupa
laz – livada u šumi
lovnica – sijeno složeno u obliku stošca / puno manja od kope/
mah - zamah
med – između, među
more - može
nagnjest - natiskati
najnarednije - najprikladnije
naloženo – natovareno
navrst - provući
nigdi – negdje
niki - netko
obrnit - okrenuti
ograbjat – grabljama pripremiti teret za transport
osovnik – drveni tuljac za nošenje brusa u kosca
palica - štap
parićano –pripremljen
pas – pojas, remen
pasat - proći
plavat - plivati
prnest - donijeti
poje - polje
prvo - prije
rabit – trebati
ravan – livada
ručnja – užina , marenda
se - sve
sopeta - opet
spravit - spremiti
storit - učiniti
štimano – poštovano , cijenjeno
štrame – dio zaprežnih kola namijenjen prijevozu sijena
tuje - tuđe
trudan – umoran
vas - sav
veruge – lanci
zajno - odmah
zažmat - zažmiriti
zdit – donošenje sijena za stog
zeje – kupus kiseli
zet - uzeti
zgobit - zgrbiti
zgubit - izgubiti
znest – iznijeti
želiza – željeza , čelična naprava u obliku klina na kojoj se klepa kosa
žrt – drvo na vrhu voza za pritiskanje sijena
žurnada – dnevna zarada






Izvor fotografije: http://www.senj.hr



PS

Dok sam ovo pisao sjetio sam se jedne dogodovštine kad sam imao 5-6 godina. Tada sam živio na Pehlinu . Moj tata , obzirom da je bio dobar kosac , mnogima je po Pehlinu kosio za kravicu ili pak kozicu. Da , da tada /početkom 1960-ih/ su po Pehlinu još pasle kravice i kozice. Malo ih je još bilo , ali ipak...Ja sam mu nosio marendu. Pomarendao je , zapalio cigaretu / niška Morava - zelena kutija / i počeo klepati kosu. Odjednom , mene , kao da je osa ugrizla za prst. Pogledam , a ono krv na desnom kažiprstu . To se komadić kose velićine 1-2 mm  zabio meni u prst.Taj komadić se odvojio od kose prilikom klepanja. Isto tako mogao se , taj komadić , zabiti i u oko.  Dakle , osim što je košnja naporan posao , uz to je i opasan.

[zokxy]

DILO Z DRVI

    Ovako ti je to bilo , mali moj. Prodaja drv je biv jedan od načini kako zaslužit kakov solad za preživit. Kako je naše selo okruženo z šumun to je do drv bilo blizu . Ali je biv dug put do sovdi . Najveć je bukve, grabra biliga i črniga , malo hrasta i cera. Daje od sela , još višje,  počne i crnogorica. Bukovine je ipak najveć .
    Prvo nigo ča si tev poć va šumu sić , morav si zvat lugara da ti bula drva ka smiš rušit.
Lugara smo, kot i zogara, sami plaćali prik zemjišne zajednice. Lugar je trejsetih lit biv Ive Matešin. Biv je jako strog. Povida se da je svoji ženi Joži multu naplativ. Potla Drugiga rata lugar je biv Dolfo Piković, ali onda se plaćalo drugače , prik države.
    Govore da se va šumu ne re sam aš je rušit drva jako opasno dilo. Kako je nikada bila puna šuma judi to bi ti ki priskočiv na pomoć kad je rabilo. Je li da ti rabi pomoć ča prepilit je li da ti se ča grdiga dogodi. Ja san najveć puti biv sam . Ni biv ki za poć zmanu. Najprvo je Ive biv majhan. Potla je prišav rat. Onda se oženiv i šav ća bivat. Tako da je od njiga male koristi bilo
    Ja san šav veselo va šumu aš san tamo biv na miru . Niki me ni jadiv . Tamo san biv doma. Zev bin si komad kruha, kakovu kapulu i sardine va škatuli, ča za popit i, ča se hrane tiče , jast san biv namiren. A poznav san saku stazicu, saki grm.  Pa i tiće bin poznav po šviku. Znav san kako šviče šoja , kos , drozg… Drozge smo i jili aš su bili veliki i do dvajset dek teški.
    Za drvo zrušit triba ti sikira, pila, zagvozde, bat i puno jakosti . Na drvu se najprvo z velu pilu vodoravno podpili malo manje do sredine drva odnosno do križa kako mi
rečemo. Za to dilo rabe dva pilača. Onda se pod kuton od približno četrdeset i pet stupnji zapili drugi riz. Tako se dobije jedan komad drva kiga se z baton zbije van.
Onda se pilači presele na drugu stran i pile vodoravno prama timu dilu kadi je biv ta zbijeni komad. Kad otpile fanj duboko onda se već pila teže vuče aš ju drvo pritišće. To je znak da se zabije zagvozda ku pomalo podbijaš kako daje pilite. Moraš pazit kamo će drvo past kad ga prepiliš. To zato da se ne zavrti pak pade po tebi i ubije te.  Mora se pazit i na drugo drvo da ga bez potribe ne šundraš. Kad je drvo na tlu najprvo mu se vije oznamu. To zovemo ohrašćit. Hrašći se z sikiru, a debje vije se otpile .Ohrašćeno drvo se krca na kola z capinon, a teža debla se krcaju uz pomoć henduka i legnji.
    Doma se to deblo prepili na odrejenu dujinu. Ta komad je obično dug 25 centometri.  Zovemo ga furak. Njiga se raskala na manje komade. Ta raskalana drva su se prodavala takova , skoro friška, ali i prosušena ka su bila pedesetak posto draža.
Prosušila su se doma tako da su se rastresla po sušili. Spod sušili je bilo pališće kadi je goriv oganj od sitnih drvac. Moreš mislit kakov dim je biv va selu kad je skoro saka familija sušila drva. Mi smo to dilali pod štrim , ali more se dilat i na otprtin.
Nikad se ni , kot danas , vozilo meternice za prodat nigo je se bilo vezano va butorice. Kašnje, kad smo došli do vrić, smo prodavali na vriće. Staviv biš vriću punu drv na hrbat i nesi je na peti pod. Ni bilo lahko to dilat, ali kad se mora ni ni teško.
    Ja, znan, znan. Smiron ti povidan od tih butoric , a ti ne znaš ča je to. Znači, drva dujine dvajset i pet centometri i skalana se slože približno za jedan naročaj i zavežu ili z trtu ili z škrembuton. Evo, je li ti sad jasno ča je butorica? Zavezani naročaj drv .
Na voz je moglo stat približno četiri metra drv ili okoli tristo butoric.
    Kad si tako parićav jedan voz drv, obično jedan put na šetemanu, morav biš poć financon va Useravac da ti daju jedan dokumenat ki se zvav Izvoznica, Prez tiga dokumenta nisi mogav drva pejat jerbo su na granici i naši i Talijani pitali za njiga. Na granici si morav pokazat i putnicu. Voli su isto bili registrirani pa su okoli rogi imeli zavezane pločice od olova na ki je biv utišnjen broj. I voz je imev registarsku pločicu tako da smo si bili registrirani aš si i ti morav imet putnicu za prik granice pasat.
    Obično se pejalo nikimu ki ti je još prvo naručiv drva. Ali bilo je dosta situacij kad nisi imev kupca. Onda si šav okoli i ponujav drva . V Riki , na Žabici , je bilo , se do pedesetih lit , misto kadi smo mi z Kastavšćine , Ćići i Brkini prodavali drva. Gromičani i Gorani su prodavali na Sušački placi. Na Žabici je bila i vaga pa se moglo prodavat na pezu.
    Se ovo , ča ti ja govorin, se misli na drva za v oganj. Ja nis nikad dilav drugo dilo z drvi . Ali bilo je judi ki su dilali po šumi kot pilači i tesači. Od debjiga drva su dilali grede, tavalune, daske… Ali to je već nika druga priča.
    Va šumi je, kad su se pojavile motorne pile, bilo lagje dilat. Tamo nigdi okoli 1966-iga lita je Jožetu Puhovimu sestra Zdenka pripejala motorku iz Švicarske kadi je dilala. Rekla mi je da je koštala hijadu i dvi sto franak. To je bilo jako puno sovdi. Ja nis nikad dilav z motorku tako da ti od nje ne moren niš povidat. Ali da se lagje dilalo š nju nigo z pilu i sikiru, to siguro.

bulat – označiti / lugar /
grdo – ružno
(g)re - ide
henduk – alat šumara
jadit - ljutiti
legnji – grede za ukrcaj drva
majhan - malen
metrnica – drvo ispiljeno na dužinu od metra
multa - globa
naročaj – naručaj
nikad - nekad
pališće – mjesto gdje se pali vatra
parićat – pripremiti
peza – vaga
prvo - prije
rabit – potrebovati
riz - rez
sić - sjeći
skalana - iscjepana
smiron – stalno
smit - smjeti
šav - išao
škatula - kutija
škrembut – uže određene biljke penjačice
štrim – natkriveni prostor
šundrat – uništiti
tev - htio
trta – uže od  divlje loze
vija – grana
zagvozda – drveni klin
zavrtit – zaokrenuti
zogar - cestar
zmanu - samnom









izvor fotografije : http://www.istarski.hr

[zokxy]

BELA NEDEJA

    Bila nedija ili Bela nedeja , kako reku va Kastvu , ni samo samanjski dan Kastva i Kastavšćine nigo i šire okolice. Tako su na samanj znali prihajat judi z Bodulije, z Istre, Hrvatskiga , Kranjske… Mi smo najveć šli na samanj zarad mićih  prašćić ke bimo tu kupili i gojili do klanja. I dan danas se ta div Kastva , kadi su ih prodavali , zove Prašćarija.
    Mi smo na samanj prihajali dva dana . Prvi dan , nediju , bimo šli , sa familija ,  malo na špaš . Kupili  bimo kakovo kosje, kosu, sikiru, limu, kosir… Ženske bi si kupile kakov rub, flajdru , neč za na postej , kakov komad pošade…Dičina bi isto dobro pasala aš bi kiiki dobiv organić, kakov fičić na petešića ili ku drugu igraču. To ni puno guštalo, a dičina su bila zadovojna.
    Znaš kakov je to petešić? To ti je tako jeno desetak centometri visok petešić storen od pečeniga jila . Je jih i od tankiga plešića. Na njimu je  jedan rezervarić va kiga se lije malo vode pa mu se odzada puše čez škujicu. Ma jako lip švik , onako , kot tičić.
    Ja, i ča san ono tev još povidat? Aha o Bili nediji san povidav.
 Divojčice bi dobile kakovu pupu al kako to Kastavci reku minju. Morda kakov svilni rub, kakov facolić. Tako da bi za Bilu nediju si bili zadovojni.
    Bilo je na sakin kantunu ča za pojist i popit  Na par mist se i plesalo – na Fortici, na Crekvini, pod Ložu i po oštarijah. Još tamo dvajsetih lit se užalo sost na mih, ali brzo  je se više mlajih dečki soplo na armoniku pa  su mih pomalo zrivali . Danas se više govore da bi ga tribalo vrnit bar va tradicijsku muziku. Ali ki će sost kad već niki ne zna . A i Jure Škohov , ki je med zadnjimi po Kastavšćini sopav, je zdavna umrv.
    Meni je najveća muka bila drugi dan - pondijak za Bilun nedijun poć z starin ćaću po prašćiće. Ta dan se zove Beli pondejak , a samanj posajmica.  Šli bimo čez Marišćinu  pa
znad Marčeji prik Jardas va Kastav. Puli Marčeji smo imeli nikakov rod pa bimo se tu ofermali. Stari ćaća bi popiv ki žmuj vina i već bi ga prezelo aš ni biv navajan pit. Još se ofermav pul Jardas i dok smo prišli Kastav već je biv načešen. Sad još na samnju dok se pogajav za prasce bi još ča popiv tako da bi ga se fanj nabrav. A kupit praviga prašćića to ti je , mali moj , vela filozofija. Mora mu repić bit zavit , trubac mora bit onako podugast , a dlaka  mora bit bila. Ne daj bog da je črna. Uši ne preveć klempaste . a zubi zdravi . Ma pun klobuk siga i sačiga ti mora imet zdrav prašćić.
    No, i kad bi stari ćaća to zbrav bimo pomalo šli nazad. Ja , dečkić od sedan osan lit , dva , tri prašćića po dvajsetak kiv i jedan stari , pijani prašćina od sedandestak kiv . Nisan znav ću li pazit na prašćiće ili na stariga ćaću. Lito za liton je bilo tako da san š njin šav na posajmicu prašćiće kupit. I moran priznat da su si ti prasci , ke je on zbrav , bili zdravi i dobriga petita. Zato je i šav , vaja , po nje aš da ni bilo tako siguro ga ne bi pustili već po nje. A i ja, kako san šav stariji , san se privadiv na to pa san pomalo i ja počev uživat va posajmici , a bome i va vinu.


bila - bijela
čez - kroz
črna - crna
div - dio
facolić – rupčić, maramica
fanj - dosta
flajdra - haljina
fičić - zviždaljka
guštat – vrijedi /roba/
jilo - ilovača
igrača- igračka
kantun - ugao
kiiki- poneki , koji i koji
kosje - drveni dio kose
ku - koju
lip - lijep
lije – ulije
lima - turpija
mih - mijeh
minja – lutka, djevojčica
nabrat - nakupiti
načešen – žarg. pijan
navajan - naučen
ofermat - zaustaviti
organ – usna harmonika
pasat - proći
petešić - pijetao
petit - apetit
plešić – limić, tanki lim
pogajat - pogađati
postej - postelja
pošada - posuđe
preveć - previše
prezelo - preuzelo
prihajat - dolaziti
pupa - lutka
rub – rubac, marama
sakin - svakom
samanj - sajam
siga i sačiga – svega i svačega
stari ćaća – naziv za djeda
škujica - rupica
špaš - zabava , izlet
švik - zvižduk
trubac - njuška
užalo - običavalo
vrnit - vratiti
zavit - savijen
zdavna - odavna
zrivat - izgurati
žmuj - čaša





Ovakvi su praščići bili na posajmici na Prašćariji u Kastvu

[zokxy]

ŽENIDBA

 
    Mare i jast smo skoro vršnjaki. Lito dan san stariji od nje. Tako da smo skupa rasli. Vavik mi je bila nikako draga. Još kad smo Klano šli va školu ja san vavik voliv hodit puli anju. Ali još smo bili dica.
    Onda je brzo prišav Prvi rat. Va to vrime ja san imev 14, a ona 13 lit. More se reć da nan je rat ukrav mladost. No, kad je i to zlo finilo počeli smo se se više pogledivat. Jedanput je biv ples na Snižnici pa smo skupa plesali . I tako je to počelo.
    Kako je ona bila samica, a to će reć da je bila jedinica, brzo smo se z starimi dogovorili da gren jast za zeta. Va to vrime se stare poslušalo i poštivalo. Znalo se reć :
                          Kako ćaća reče
                          Tako voda teče.
Nisu bili ritki pari ki bi se oženili, a da prvo nisu  bili frajar i frajarica.  Stari bi se  dogovorili i to je bilo rešeno. Će li  ča  mlada za dotu prnest to je biv dev dogovora med starimi. Obično se za dotu prneslo kakov parat i junicu po mogućnosti briju. Puli nas ni biv takov slučaj. Mi smo se volili.   
    Jeniga dana san ji dav sovde za kupit vitvice tako da smo se zaručli. Kad se zaručiš to je samo korak do ženidbe. Prvo tiga san šav niko vrime k nji doma da malo poćakulan z njejimi i da me boje upoznaju. To smo zvali hodit na fraj. A za druge smo bili frajar i frajarica.
    Tri šetemane prvo nigo ča ćemo se ženit plovan je na maši najaviv da će se Margareta udati za Filipa.
    Prvo ženidbe morali smo poć na poduku plovanu Klano, kamo smo pripadali. Na tih podukah plovan vas vadi kako živit va braku, kako dicu odgojit i se tako neč. Na timu poduku se dogodiv i jedan smišan događaj. Dok je plovan neč pripovidav od Isusića i apostoli pitav je Maretu da kuliko je apostoli, a ona mu je, nako brzo, ne misleć, odvrnila dvajst i dva z sopcen.  Ovimu samo ča očesa nisu skočila van.
-Šta !!!- je zavapiv.
A ona je, neboga, nabrajala va sebi kuliko će nas bit na piru . Briga je nju bilo za plovanov nauk.
    Ženilo se po sobotah. A oni četrtak prvo ženidbe se nese dota. Kako san ja šav za zeta,  smo mi moju dotu pejali. Bila je to mobilija za kamaru. Ali dobiv san i Ponikve i Lazinu kot otpremninu od Šestanovih. Na čelu trupe, ka je dotu pejala, je biv jedan z metlu. Onda smo šli ja i moj kumpar, sopac , brat mi i još par prijateji.Ta dan smo munjesali puli  Bavdinih kamo san šav za zeta.
   Ženili smo se dvajsetiga lita. Najprvo smo šli va crikav. a onput doma na južinu. A va ono vrime ti piri nisu bili veli. Bili su, tako, jeno davjsetak judi. Nevistica i oženja, po dva kumpara i kume i još nikoliko bližnjih kot braća i sestre i roditeji. Ja, i sopac . Njiga ne moreš pozabit aš kakov je to pir bez muzike. Nan je sopav Jure Škohov na mih.
    Pitaš da ča smo jili? Ma ni onda bilo tih zvegaćenosti okoli hrane. Skuhalo bi se ča malo boje. I bog te veseli! Mi smo na piru jili najprvo juhu od kokoše. Za tin je bilo tenfanje z paštu. Na kraju je bilo i pečeniga kokošjiga mesa z konpiron. Bilo je i vina kuliko god je ki mogav popit. Od slatkiga je biv štrudel od jabuk i orihnjača. Tako san jast  nakon pira ostav puli Bavdinih. Ni mi vavik bilo lahko, ali ča ćeš. Moraš zet kako pride.
    Danas se mladi drugače žene. Mnogi se ni ne žene va crikvi nigo samo na Odboru. Više se i mišaju aš mnogi su prišli v Riku pa se judi vide na kakovin plesu ili na dilu pa se zbliže. Va moje vrime malo ki i ka se oženiv van sela. Moja mat Johana je bila z Škalnice , ali to je više kot iznimka. Ako se dogodi da nevistica gre z sela va ko drugo misto onda se stori kolona . Spod kolone se stavi stov z pijaču. Oženji se ne pusti da zame nevisticu z sela dok ju , tobože, ne plati. Mladin , ki su tu kolonu i storili , se da neč sovdi i onda se nazdravi z vinon pa nevisticu puste da gre z oženju.
   Kuliko san primetiv i piri su veći. Ni ritko da je i po sto judi na njimu. Ali više-manje i dalje se žene po sobotah, dota se nese po četrtki . Prvo je sopav mih , a danas armonika. I se više je piri po hoteli i restorani. Tiga , ipak , prvo ni bilo .I još vidin jednu razliku. Danas ti iz sake kuće vojča prnesu za dar. Mladi dobiju i frižider i makinu za robu prat i puno drugih stvari. Tiga prvo ni bilo. Zato se nakon pira sin ki su čagod prnesli nese malo kolači ki ostanu od pira za hvalu.
    Bilo kako bilo Mare i jast sno 1970. lita proslavili 50 lit od ženidbe ili kako reku zlatni pir.  Tr si i ti biv na fešti. A va braku ti je glavno da mate poštovanje jedan prama drugimu i da se razumite. Danas čin neč ne gre kako vaja zajno se rastanu. Mi stara generacija smo navajni popravit ča ne vaja, a ne kupjivat novo.
    No, zapiši i ovo da se ne pozabi. Neka se zna da je prvi par ki se ženiv puli svetiga Mikule nakon Drugiga rata biv Ive Banašerin – Stričina i Kate Radeća.

boje – bolje
brija – gravidna, noseća
čagod – štogod, nešto
dev - dio
finit - završiti
frajar/ica/ - zaljubljenik/ca/
gren - idem
ja - da
južina - ručak
kamara - soba
ki i ka -  poneko i poneka
mobilija - namještaj
očesa - oči
parat –dio zemljišta
prnest - donijeti
puli anju – pokraj nje
ritki – rijetki
sin - svima
šli - išli
tenfanje - gulaš
tr – ta: tr si i ti biv – Ta i ti si bio
trupa - grupa
vadit - učiti
vavik - uvijek
vitvica - zaručnički prsten, verica
vojča - bilošto
zavapit - zavikati
zvegaćenost - izvitoperenost

Sad bi tu trebala neka fotografija s pira gdje je i sopac na mijeh. Ali ne mogu to naći pa ako netko ima neka zalijepi. Ma može i samo pir bez sopca. Samo da je iz tog vremena.

[zokxy]

Jučer oko 18 sati , dok sam spremao ovu temu , pukla je veza , a  nisam imao vremena čekati i ponoviti postupak. Stoga isprika ako je netko očekivao novu pričicu , a ono - ništa.

DIČJE IGRE

     Kad si me pitav za dičje igre tev san, onako prez mislit, reć da se kot dica nismo igrali. Ma vraga se nismo igrali. Nismo se igrali vako, kot ča se danas dica igraju, z puno igrač. Ali i onda smo se igrali kad je bilo vrimena. Najveć  dok smo bili na paši z blagon.
    Najraje smo se igrali na pjoške. Pjoška ti je komad pjočastiga kamika. Staviv biš kakov okrugli kamik a pod njiga saki igrač bi div dogovoreni ulog. Veći frkolasi bi igrali za kakov solad, a manji za toke. Onda bi se po redu zbijalo ta kamik. Oni ki zbije bi tev da njigova pjoška ostane na mistu zbijeniga kamika. Tako bi dobiv se ča je tu bilo. Aš solad dobi oni čja je pjoška najbližja pojedinimu sovdu. Moglo se dogodit da oni ki zbije ta kamik ostane prez ijeniga sovda. Kad zbije, sovdi se razlete pa  jih dobi oni čigova je pjoška bližje.
    Igrali smo se i z britvicu. Ne, ni ti to britva za brit nigo žepni nožić. No,  tu britvicu hitaš z raznih dogovorenih pozicij tako da se mora zapičit va zemju. Oni ki najprvi pasa se dogovorene pozicije je pobidiv.
    Te britvice su rabile i za dilat turunke i švikavnice od mezdreniga jasena. Turunke se dilaju od napošniga komada jasena. Koru zarižeš, onako, kot ča je navoj na vidi i  pomalo odvojiš od drva. Na kraju još storiš pisak pa se to spojiš va turunku. Na turunku se moglo i sost ako si znav. Z tu turunku si mogav i krave dozvat kad bi se navadile na ta  zvuk. Turunka je mogla trajat i par lit, ali si pisak morav sako lito prominit.
    Od bazga se dilalo puškavnice tako da se srce, ko je mehko, probuši z kakovu drinovu paličicu pa ostane tubo. Onda bi se našlo kakovih majhanih boćic kot naprimer brinje od smrike. Boćice z tu paličicu porineš va to tubo od bazga i jako puhneš. Boćica zleti van i čuje se jedan zvuk kot da si z puške shitiv. Tako smo «pucali« jedan va drugiga.
    Zmišjan se da su, najveć muška, dica užala teć za kolon. To kolo je biv kakov obruč od bačve. Od malo jače žice se storila vodilica pomoću ke biš rivav to kolo i bižav za njin. Tako je naš Branko, kad je biv puli nas, šav na veronauk Sveti Matij bižeć za tin kolon. Rekav je da puno brže pride š njin nigo prez njiga.
    Igralo se i na skrivanje tako da bi jedan zažmav i obrniv se prama kakovimu zidu ili drvu. Brojiv bi do deset , dvajset ili do kuliko ste se veće dogovorili. Dica bi se poskrivala nigdi blizu. Kad je finiv z brojenjen počev bi iskat skrivenu dicu. Skriveni bi iskoristili priliku pa bi se, dok ih ovi ne vidi, na mistu kadi je brojeno, prijavili zijajuć « spas «. Kiga bi, ovi ča je brojiv, videv i prijaviv na to misto ta bi drugi krug iskav.
    I na lovjenje smo se igrali tako da jedan lovi a drugi biže pred njin. Kad koga ulovi onda daje taisti lovi.
       Divojčice su se drugače igrale. One bi si storile bivala. To je biv kot niki zamišjeni dom. Tu su si storile kot šparget, stov, vitrinu i tako. Onda bi imele kakove razbite lončiće, padelice pa bi kuhale , prale… Tako su se pomalo vadile ča će in kašnje najveć rabit. Znale su se igrat i na kamičiće. Igra se z pet okruglih kamičići . Jedan se hiti vajer i, dok on leti, morale su pobirat druge kamičiće . Po jedniga pa po dva i tako daje.  Jako rado su se igrale na pendu. To se na tnalu z kredu nacrtaju kvadri ,mislin da ih je sedan, i moraš z jednu nogu porivat pjočicu a da ti saki put ostane va pravimu kvadru. Dok su to igrale zapametiv san da su znale namajat:
      «Am salam
      podkolenice
      za Vazam».     
    Muški bi se igrali z boću ku su dilali od krp. Bile su i nikakove ke su bile kot od nike spužve. Nabijali su to kot pravi nogometaši. Muška dica vavik su volila boću.
Igrali su na boću najveć po cisti na Ravni kadi je bilo malo više mista. Kašnje, tamo već pedesetih, su igrali nogomet z pravimi, karpetonskimi loptami. Igralo se Pod brdi kadi je bila lipa trava pa su mnogi , čja je to sinikoša, bili protiv i nogometa i lopte .
    Va Domu , tamo od pedesetih kad je storen, igralo se Čovječe ne ljuti se, triju,  šah,  stolni tenis, tombolu… Va oštariji je biv i biljar pa su veči frkolasi igrali i to.
    Ča se tiče igar po zimi jasno da smo se sanjkali i drsili po ledu. Storile bi se sanjke od dasak pa se sanjkalo najveć Za brig. Va Ledinah je bila voda ka se po zimi zmrznila. Pa smo se onda znali drsit po tin ledu. Zmišjan se jene pričice vezane za led. Va Ledinah su se dica drsila i vragovala. Jopić Pikovićev je vaja va kakov grm zašav i rasparav si je brageše, ali i -  jaja. Drugi dan ni mogav va školu aš mu je to moralo zarast pa je z vrh Škoja zazvav učiteja zijajuć: «Gospon učitej ja danas ne moren va školu aš san si sa jaja rasparav!».

bižat - trčati
boća – lopta, ali i boća
boćica - loptica
brageše - hlače
čja - čija
dičje - dječje
dilat - raditi
dit - staviti
drsit - klizati
finit - završiti
frkolas – dečko star petnaestak godina
hitat - bacati
igrača - igračka
iskat - tražiti
karpetonska - kožna
mezdreno drvo – drvo u punoj vegetaciji
namajat - nabrajati
napošan – poseban, namijenjen nečemu
navadit - naučiti
obrnit - okrenuti
paličica - štapić
pjočast - pločast
porivat - poguravati
pride - dođe
prominit - promijeniti
rabit - trebati
razbit - razbijen
rivat - gurati
sinokoša – sjenokoša, livada gdje se kosi trava
solad – novac
sost - svirati
tet – htjeti, tev - htio
tnalo - tlo
tok - dugme
tubo - cijev
vadit - učiti
vajer – u zrak
vida - vijak
zažmat - zažmiriti
zapičit - zabiti



Džepni nožić
Izvor fotografije:http://www.njuskalo.hr/

[zokxy]

CISTA
    Prvo ti je cista šla prik Vrha na Antonovu prenku i onda daje do Useravca kadi se spaja z glavnu ka gre od Marčeji prema Klani i Škalnici . No to ni ni bila cista, za pravo reć. To je biv kolski put vas zdrsan i nakrivjen tako da je bilo jako teško pun voz pejat po takovimu putu.  Kad  je storena nova država mislili smo , nas par va selu , da je to dobra prilika za storit nike stvari za ke prvo nikad ni bilo voje od strane Austrije. Jedna od tih stvari bila je cista. Cista je zamišjena, a kašnje i storena, tako da gre Puli Gradišće pa do Marišćine kadi se spaja z glavnu cistu.
    Ta cista se na ruke dilala ča znači da ni bilo mehanizacije. Samo kramp i lopata i kaika mina. Va to vrime judi su jako teško živili i nisu imeli nikakoviga stalniga zaslužka tako da su komać čekali da se more čagod zaslužit bilo kadi. A ovi ča su financirali gradnju su to dobro znali pa su tu neimašćinu skorišćivali. Tako da su juden njihovu muku najveć plaćali va frmenti. Pa su tu našu cistu nazvali «kukuruzna cesta», Ma sad je li bila kukuruzna ili frmentna cista manje je važno. Važno je to da smo mi cistu dobili i to dosta rano – 1932. lita. I danas je skoro ista kot ča je onda storena.
    Zogar prvo Drugiga rata je biv Mate Puhov. Popravjav je cistu ča gre do Marišćine, ali i onu ča gre skroz do Želiznih vrat. Puli puta bi se natuklo batude pa su se storili mući, tako, od približno jedniga kubika. Z tih mući se zemala batuda i krpala cista kad su se storile škuje. Se su to plaćali furmani na misec priko župana ki je pobirav sovde. Posle rata niko vrime su kot zogari dilali Jože Vardoć i Mate Marajski.
    Cista čez Marišćinu nas je spasila aš je puno lagje bilo zapejat voz drv v Riku nigo prvo. Ali još vavik je povezanost bila loša. To je trajalo se dok ni prva kurjera prišla va selo, ali komać krajen pedesetih lit.
    Prvo rata ti je šla kurijera z Kastva do Sušaka čez Sveti Matij  do Saršoni pa  prik Kopice na Trnovicu i daje po cisti prik Čavji do Sušaka . Tako da, ako si tev poć  na Sušak al va Kastav, si morav poć Saršonon ali Sveti Matej. Zmišjan se da je  šla saki dan i to dva put. Kuliko je koštala karta ne znan ,ali ni  bila baš jeftina aš su Gromičani, ki su dilali po Sušaku, šli hodeć . Vozili su ju neki Čabrijani. Ja mislin da se jedan zvav Milivoj. A kakova je to cista bila!? Prik Kopice je bilo tuliko uvijali da ti se va glavi smuti. Povidala mi je jedanput tvoja mat da su šli oći ki je biv va bolnici na Sušaku.  Toliko da ji je bilo slabo da je se shitala z sebe i da ni mogla poć zajno do oće nigo da je pred bolnicu čekala dok ji ni bilo malo boje. A oni mostić drveni na Trnovici… Samo si čekav kad će past sam od sebe . A  kad je šla kurijera prik njiga  se je škripalo  Dobro da se ni čagod grdiga  dogodilo
    Posle drugiga rata, kad je prišla kurijera va selo, mnogin se je život prominiv . I to na boje. Rika je postala jak industrijski grad ki je tribav puno dilavci. Pa su Studenjci počeli dilat po poduzećih. Najveć su dilali po građevinah kot manuali .
    Jasno, skoro san na nju i pozabiv, bila je i cista prama Klani ka je , od kad ja pamtin , vavik šla ovuda . Samo smo je malo širili kad je tribala kurjera počet vozit.
Postoje i mnogi puti okoli sela ki su storeni kako bi judi mogli prit do svojiga parta. Jedan  od važnijih puti je oni ča gre za Gromišćinu. Gre od Blatniga klanca čez Jurišin do Kukujani. Nikad je biv boje nikad huje prohodan za kola , ali on je tu i dandanas.






 
Cesta kroz Marišćinu
Izvor fotografije : Panoramio by kelvis



batuda – usitnjen kamen
boje – bolje
cista - cesta
čagod- nešto
dilavac - radnik
frmenta- kukuruz
furman - kočijaš
gre - ide
kaika - poneka
komać - jedva
kurjera - autobus
huje - lošije
muć – hrpa usitnjenog kamena
oća - otac
parat – dio imanja
puli – pored, kraj
se - sve
shitat - izbaciti
sovdi- novci
škuja - rupa
uvijal - zavoj
zajeno - odmah
zaslužak- zarada
zdrsan - izlizan
zemat - uzimati
zogar - cestar

[zokxy]

Kad počne ovako grijati ni vrag me ne bi zaustavio u kući. A još imam i nekog dodatnog angažmana ...  Tako da sam jedva jedvice odvojio koji sat za dovršiti ovu temu. Ako iduća ne bude sljedeći petak - meni će bii najviše žao.
Ne moren bit va kući po ovakovimu vrimenu i kjucat po kompjuteru pa bog.
Ča ni lipje prošećat z rukami na riti po npr. Pećinah? I tamo srist kiga parićaniga za biricu .? I malo poćakulat

ŠKOLA

    Dok je bilo Studeno pod Austriju mi  školani smo školu šli Klano. Tamo je bila pučka škola i durala je tri lita. Skoro niki  ni  šav daje va školu aš prva veća škola je bila va Kastvu ili v Riki.  Jedini z sela ki je šav va Učitejsku školu Kastav biv je Milan Bregarov  trejsetih lit  Saki dan je šav hodeć va Kastav i nazad va Studeno  Poginiv je,  nebog, va Drugimu ratu. Za poć tako va školu tribalo je civ dan zgubit ili pak bivat na fitu ča je bilo skupo.
    Potle  Prviga rata, kad je Klano pripalo Taliji, škola je bila va Bavdini kući dok nismo storili novu ka je i danas tu. Osnovna škola je sad , va Kraljevini SHS, durala četira lita.
    A gradnja te nove škole je bila zamišjena još za vrime Austrije.  Ali Prvi svecki rat je to ofermav. Kad se videlo da škola va Bavdini kući ni pravo  rešenje,  se počelo opet razmišljat o novi školi . Me par da se nigdi okoli 1930-iga  lita odlučilo storit novu školu . Brzo su počeli i dilat na nji ali se to oteglo. Aš vavik su problem bili sovdi. Nikad ih dosta.
    No, škola je ipak storena. Va novi školi su se dica počela vadit 1936. lita nakon velih muk.
    Od prviga dana su bili problemi z tu školu aš nisu je baš storili kako rabi  Podi su se brzo zdigli , po zidi se dilala plisan, učiteji nisu redovito dobijali plaću… Ma brig kuliko god ćeš. Ja san va to vrime biv precednik Školskiga odbora  tako da san mnogi korak storiv i va Kastav, a bome i va Sušak vezano za školu.
    A va školi je bilo dobrih učiteji. Nikako najboje se snašav  Lojzić Rubeša iz Spinčići . On je tu službovav od kraja 1936. lita do Drugiga rata.. I dica su ga lipo prijela i zajno su ga , aš je biv majhan, a debev, prozvali Boćica .
    Učiteji su bili, za naš zaprt kraj, jako napredni. Oni su bili školovani  tako da su puno i znali. Va školi su storili i jenu majhanu knjižnicu va ki si mogav posudit kakovu knjigu ili pak kakove novine o poljoprivredi i slično.
    Dica su za vrime Lojzića, ki je biv jako aktivan, posadila boriće Na vrhu. Učitej Lojzić je vodiv i školu tambure prvo rata. Ma čuda dobra nan je taj , a i drugi učiteji, storiv. Š njin san puno povidav i to je biv jedan od pametnijih judi ke san upoznav.
Prvo Rubeše je biv još jedan Lojzo ali Marot ki je , jast mislin 1936-e ,  šav va Kastav dilat pa je tamo biv i derehtor škole. Biv je isto odličan učitej. 1941.lita , kad su Talijani prišli, je finiv va internaciji . Tamo, va Taliji , ja mislin va logoru Gonars , je i umrv .
    I učiteji prvo Lojzića Rubeše su lipo dilali , ali jin je bilo jako teško. Tako da su niki komać dočekali da pobignu z Studeniga. Jako puno se moralo dilat po šumi i po poju tako da nikad ni bilo dosta ruk. A ki će ti pomoć bez pitanja nigo tvoj otrok . Pa smo, kad su bili veće potribe, dicu zemali z škole. Mnogi put san šav učiteja prosit da pusti Iveta z škole da more poć smanu po drva. Teško je bilo nan , ali i učitejon z nami.
    Muka je bila kad su Talijani prišli pa su va školi, ku smo krvavo zaslužili, počeli učit, na silu, dicu na talijanskimu zajiku. Sa prezimena i imena su potalijančili tako da je Mrvčić Ivan postav Mervchich Giovanni, Brmalj Anton je biv Bermali Antonio.
Učitej Lojzo Rubeša je iz tiga grdiga vrimena spasiv jednu teku učenice Nevije Šebelje va ki se lipo vidi kako su talijanski učiteji dilali z školsku dicu. Teli su da budemo Talijani.
    Bila je jena talijanska učitejica , jako mršava i visoka. Nervozasta je bila. Na stolu je držala dvi šibe. Jena debja, a druga tanja. Tako ih je i porabjivala. Ako je dičji dišpet biv manji onda bi ga z tu tanju šibu po prstih udrila i to tako da su dlani morali bit obrnjeni po zgoru. Par puti bi te opalila po njih. To su dica  zvala  ribice. Ako bi pak dišpet  biv veći onda je zgrabila debju šibu i udri i po riti i po hrtu i kadi god je  arivala . A dica kot dica . Kumedijala su, a ona ih ni znala  umirit. Va zadnji klupi su sidili Vlatko i  Jopić. Pa kad ni mogla z besidami ih umirit hitila je nike kjuče va nje tako da je mićimu Jopiću nos razbila. Va kući Anice Paunović , ka je do škole , je bila talijanska bolanta i zajno ga je učitejica tamo zapejala. Dohtor mu je  ofermav krv i i previv ranu. Od onda mnoga dica nisu ni šla va školu. A roditeji se nisu jako jadili na nje. Tr i tako je to još malo duralo aš su i partizani već okoli se javjali.
    Četrdeset i četrte  su Njemci važgali školu kad i so selo . Po litu te iste četrdeset i četrte je počela i partizanska škola ku je vodiv učitej Benaš od Zorzići. Prve ure su se dica vadila pod jednu črišnju va Blatnimu klancu. Moreš mislit ku kvalitetu je to učenje imelo. Ali važno je bilo da dica i judi vide da i partizani maju školovanih judi med sobu. Taisti Benaš je kašnje dilav va klanjski školi  Matematiku i njemački je predavav, a biv je jeno vrime i derehtor škole.
    Pred kraj rata je škola bila i va Jožini kući Puligradišće. Škola je, nakon rata do obnove , bila va Fapkini kući na Vrhu. Prva učitejica je bila Dinka Seršić ka je bila ovdi nigdi do 1948.. lita. Zmišjan se da je klupe va ti provizorni školi od tavaloni storiv Jože Kanjeričin. Nakon učitejice Seršić učitej je biv Zovko. Pozabiv san mu ime.  Od 51. pa do , me par, 59.je biv učitej Josip Lučić. Najdaje je z dicu dilala učitejica Veljka Rakočević nikako od 1960. pa do 1970. kad je prišla Zorica Šnajdar.
    Kad bi dica finila četire razrede šla bi va  klanjsku školu do osmiga kuliko je kašnje durala osnovna škola. A onda daje va srednju v Riku ili kamo drugamo.

 




Izvor fotografije: http://www.lokalpatrioti-rijeka.com by Riječanka


Boćica -loptica
črišnja - trešnja
dilat – raditi
durat - trajati
jadit - ljutiti
ofermat - zaustaviti
majhan - malen
vadit - učiti
sovdi - novci
storena - napravljena
šav - išao
školani – učenici, polaznici škole
zaprt - zatvoren
zemat - uzimati

[zokxy]

Jako sam zauzet zbog nekih egzistencijalnih / kako bi neki rekli / problema. Ali imam na lageru još par pričica , onako nefiniširanih, pa mislim da neće biti  problema s pričicama o mojoj voljenoj Studeni za nekoliko idućih petaka. Moram još završiti WWII i poslijeratna obnova, ali to će morati sačekati bolja haha, gora - kiša i to , vremena.

BUTIGE I OŠTARIJE

    Za butige ke su bile va selu ne more se reć da su bile bogzna kako založene. Ali osnovno kot ča je cvit , cukar , muka , pašta, uje su vavik imele. Butigu su najprvo , ča se ja zmišjan, imeli Butigerovi pa ototu in i ime. Butiga je bila va centru sela , tamo kadi je šterna .
    Najveć su judi špežu zemali na dug pa kad bi dobili kakov solad onda bi ta dug platili. Butigerovi su imeli i peknjicu tako da su imeli i friškiga kruha. Inače su ženske doma pekle kruh . Nike pod čripnju , a nike, ke su imele špargete, i va peći.
    Prvo Drugiga rata, va sada novi Šestanovi kući , butigu su  držali Milan i Danica Mohorović. On je, nebog, finiv tako da je jedniga dana  1943. dok je na kalesinu pejav tele va Kastav ubijen . Našle su ga ženske ke su v Riku mliko nesle . Najden je va Tisnimu , stotinjak metri od križanja z našu cistu, prama Marčejan.
    Kadi je sad spomenik, va Kudleći kući, pajt ili , kako bimo danas rekli , trafiku je držala moja sestra Anica Paunović – Tetica smo ju zvali. Tu se moglo kupit , osim movin , razne prčkarije kot špigete, cigarete, frminante i slično.
    Va Jožini kući bila je i mesnica. Držali su ju Vučkovići iz Klane.
    Nakon Drugiga rata, niko vrime, butiga je bila va Štohnićevi kući i vodiv je Ive Stanarov. Kratko vrime je, isto Ive Stanarov, držav butigu i va Lazarovi kući.
    Kad je storen zadružni dom va prizemju su bile butiga , oštarija i knjižnica , a na katu je biv prostor za bivat.
    Ulaz te butige je biv obrnjen prama Kanjeričinin . Va nji su dilali  Mate  Šestanov i Marica  Jankoća. Kašnje je z Maricu, kad je Mate šav va penziju, počela dilat Duše  Zorina.
    A i oštarij je bilo – hvala bogu. Tamo nigdi dvajsetih lit je bila oštarija va Prkelovi kući . Držav ju je Mate Šinčev. Va tih oštarijah prvo Drugiga rata biv je majhan izbor. Vino črno i bilo i pasareta. Kad san spomeniv pasaretu zmislin se i šampanja, kako smo zvali pijaču, ča se dilala tako da jednu tabletu staviš va vodu i stori se neč kot pasareta. Piva je prišla va oštariju kad su Talijani 1941. prišli . Do onda je ni bilo.
    Hrane va oštarijah ni bilo dok   Pikovići nisu počeli držat oštariju. Oni su ipak imeli bar pršuta i sira.
    Va Buzgoći kući je oštariju držala Cecilija Klarić – Mikela smo ju zvali. Tamo, kuliko se moren spametit, je biv prvi ples z armoniku. Tamo je biv i jedan visoki zid pa je jedanput va selo prišla jedna družina ka je na timu zidu prikaživala film «Osveta Španije». Va filmu je jedan glumac bižav aš su ga niki lovili . a jedna ženska , ne moren se spametit ka , se stala i digla krilo zijajuć : « Simo sinak , simo hodi! Ću te jast skrit!».
Za to kino je tribalo dat kakov solad , a ki ni imev mogav je dat i kakovo jaje ili klobasicu.
    Trejsetih lit je Janko Puž držav oštariju.
    Posle rata je i naša Tetica, tamo dok se ni otprv Dom, imela oštariju va svoji kući.
    Kad se otprv Dom najprvo je oštar biv Jože Vardoć.
    Kašnje su to prezeli Čičkini Jože i Milica ..
    Sedandesetih lit je i Mate  Šestanov držav oštariju va novi kući pa su va to vrime bile dvi oštarije va selu.

bivat - stanovati
cvit – brašno pšenično
frminanti - šibice
kalesin - vrsta zaprežnih kola
krilo – donji dio suknje
majhan - mali
muka kukuruzno brašno
nesle - nosile
ototu - otuda
pajt - malen prostor, kiosk
prčkarije – sitnice, malenkosti
stori - napravi
špeža - nabavka namirnica
špigete - vezice
založene - opskrbljene



Zadružni dom u Studeni

Izvor fotografije : http://www.klana.hr

[zokxy]

Petak , dan za haha još jednu pričicu.
Kako ima malo komentara ja , nebi bio ja,to shvaćam kao idealno haha napisano.
Međutim ja , nebi bio ja , znam da je to daleko od idealnosti. I zato MOLIM, pomognite. Tema, a i jezik, je strana. Ali ima ljudi oko Rijeke koji puuuno znaju o tome. Pa pitajte, pokažite svojim mamama, tatama, nonama, nonićima. Studenjcima, Klanjcima, Marčejcima, Kastavcima, Gromičanima...Neka pročitaju i ispravljaju. Pomognite da to kako - tako na kraju bude točno.



KOLA, VOZ I VOZNO BLAGO


    Puli nas se ni  moglo ni zamislit da je familija prez koli i vozniga blaga.
Kola i druge drvene dile bi dilali bogmari, a posle bi kovač staviv šine na kola i još čagod, ako je rabilo, od želiza za storit. Bogmari va selu baš i ni bilo. Jedan je biv va Klani, a jedan va Svetimu Matiju.
    Za kola bi se moglo reć da maju par prednjih i zadnjh kov ka su spojena z svoru.  Na prednjin kraju je ruda puli ke je zapreženo blago. Spreda  je veli vagir priko kiga se vuku kola. Na veli vagir se zakuči manji ki je prik špranjgi spojen na jarmić. Jarmić je vezan na rudu i postavan na vrat volu pomoću kambe  Tako zaprežen vov more onda vuć voz.
    Važan div koli je sana. To je jedan komad otesaniga drva ki je pomoću srčanih verug, kako smo jih zvali, spojen na vintu. Kad se vinta zavinta stisne se to drvo na zadnja kola i oferma obraćanje kov. Tako se sani po zdolu. Kad je na vozu četiri, pet metri drv na veli nizbrdici voli ne bi mogli održat voz prez sanjenja. Zato i volar mora bit ofrčan aš va takovih situacijah moraš teć ozada pa zasanit. Pa onda opet napred puli voli bit. Pa poć ozada pomolat vintu… Jasno da stariji nisu mogli tako obletat okoli voza pa bi š njimi šav kakov otrok ki bi saniv kad je rabilo.
    Va Studeni, a i šire, se za kola ka su naložena reče voz , a za prazna, samo kola.
    I na prednjih koli je bila vinta , ali nju bi se rabilo samo va manje slučaji kot ča je, naprimer, kad voz stoji ili na manji nizbrdici.
    Nikad, dok se vozilo duge jarbole , najveć va Volovsko, bila je jedna posebna svora . Zvala se kriva svora i rabila se va zavoji tako da se zadnji div kov pomakne pa si mogav lipo zavoj storit.
    Ovisno od tereta ki se voziv stavilo bi se i goranji div na kola. Ako se šlo po seno stavile bi se štrame, a za gnoj pejat rabilo se  koš.                                                               
    Voz su vukli voli. Bilo je i pet, šest pari konji va selu, ali voli je bilo i pedesetak pari.
    Da bi se dobilo dobriga vola triba junca škopit. Nikad se to dilalo z drvenim baton. Pomalo se tuklo po jaji, a nebogo blago je rulo i mučilo se. Kašnje, trejsetih lit, je va selu to dilav niki graničar ki bi škopiv z nikakovimi klišćami . Bilo je isto bolno , ali je puno kraće trajalo. Nakon Drugiga rata to su već dilali veterinari.  Takov mlad volić pomalo se vadiv vozit z kakovin starijin volon.
    Vola je tribalo i potkovat. To su dilali kovači. Va selu je biv kovač Jače Buzgoć, a posle Drugiga rata njigov sin Štefan. Vov bi se zagnav va jedan uzak prostor od drv storen tako da se ni mogav micat. Prijelo bi ga se za nogu dok bi kovač urejivav parkje i dilav mu potkov prama parkju. Tako storenu potkov bi mu onda zabiv z čavli. Opasnije je bilo zabijat zadnju potkov, aš je vov mogav jako grdo udrit oniga ki mu nogu drži.
Tako potkovan vov mogav je onda pejat voz.
    Prvo nigo ča bi se krenilo z vozon gospodar bi z korobačen prekriživ voz  i zazijav «ajs! «. Na tu komandu voli potegnu i voz krene.  Za skrenit livo komanda je bila « ajs sebi ! », a za desno « hvot ! ». Za ofermat voz komanda je bila « veee ! « Ako se telo da vov gre nazad zazijalo se «curik!». Ako je vov tribav na mistu pomaknit se livo ili desno reklo bi mu se «stupi!»
    I još neč ću ti reć pa smo z tin gotovi. Sigurno ne znaš ča je ocuralo? Ocuralo je misto kadi su se voli ofermali prvo nigo ča bi morali potegnit voz na veći uzbrdici da se pocuraju. Ofermalo bi ih se zato aš blago ne more hodit i curat kot čovik.
    Tamo nigdi sedandesetih lit prišli su i traktori . Ja nikad nis pejav traktor tako da ti o timu i ne moren govorit. Ali onimu ki je š njin dilav sakako je prominilo život. Od tad su i voli skoro nestali iz sela. Zaminili su jih traktori. Vaja je lagje bilo dilat z traktoron nigo z volon.

blago - životinje
bogmar - kolar
čagod - nešto
jarmić – dio opreme vozne stoke
kamba – dio opreme vozne stoke
klišća - kliješta
kola – zaprežna kola
kola - kotači
koš – poseban dio zaprežnih kola za rasuti teret
more - može
naložen - natovaren
obraćanje - okretanje
oferma - zaustavi
ofrčan - okretan
ozada - iza
parkje - papci
pomolat - popustiti
rabilo – trebalo
ruda – dio zaprežnih kola
rut - tuliti
sana - kočnica
sanit - kočiti
sanjenje - kočenje
storit - napraviti
svora – dio zaprežnih kola
šina – željezna traka
špranjga – dio opreme vozne stoke
štrame – poseban dio zaprežnih kola
vagir – dio opreme zaprežnih kola
veruga - lanac
vinta – dio kočnice zaprežnih kola
voz – nakrcana zaprežna kola
zabit – zakucati
zasanit - zakočiti
zavintat – pritegnuti vintu
zdolu – prema dolje, nizbrdica


 
svora – dio zaprežnih kola
šina – željezna traka
špranjga – dio opreme vozne stoke
štrame – poseban dio zaprežnih kola
vagir – dio opreme zaprežnih kola
veruga - lanac
vinta – dio kočnice zaprežnih kola
voz – nakrcana zaprežna kola
zabit – zakucati
zasanit - zakočiti
zavintat – pritegnuti vintu
zdolu – prema dolje, nizbrdica





Izvor fotografije: http://janezsirok.webs.com/

Ovo je model voza sa košem za gnoj ili rasuti teret. Najbolje šta sam našao na netu. I umjesto konja zamislite volove.
Pozdravljeni! 

[zokxy]

Danas je Veli petak pa evo jedne prigodne pričice.

BLAGDANI

    No, vako. Od blagdani vavik se držalo do Božića i Vazma .
Ča se tiče Božića, prvo Drugiga rata, ćutilo se blagdanjske dane već od Mikulove. Dici bi se, večer prvo, stavilo va postolić ili škornjicu dva, tri oriha, kakovu deranču ili jabuko, morda ki bonbonić, ili pak komadić  cikulade. Drugi dan , za Mikulovu , kad bi se otrok stav ni mogav od veseja ča je dobiv. Ja, malo su dičina onda pojila cikulade i bonboni.
     Za svetu Luciju bi se posjala šenica va kakov pijat tako da zraste do Vilije božje.
    Na Viliju božju ili, bi danas rekli, Badnjak  se je parićivalo za Božić.
Ta dan bi se snažilo po kući , štali i okoli kuće, a ženske bi pekle kolače i drugo ča rabi .
Jako se pazilo ča će se pojist aš je to ne mrsan dan. Za južinu bi se pojilo, na primer, frigana slana riba i makaruni ki su doma storeni. Prišla bi i noć pa bi se dilav majić. Večeralo bi se opet ribu , ali i bakalar , onako na gulaš,  ki je mogav. Popilo bi se žmujić črniga vina i malo poćakulalo ako bi ki prišav. Obukla se blagdanjska roba i pasalo na povnoćicu.
    Jutro , na dan Božića, se popije bilo kafe z slatkin kruhon, obajde blago i pomalo čeka vrime južine. Za južinu se ni puno bacilalo. Spekla bi se kakova kokoš ili bi se skuhala dobra goveja juha pa bi se meso pojilo z zejen ili pečenin konpiron.
Za Božić ni bila navada čestitat po kućah. Držalo se da je to više kot familijarni blagdan. Čestitalo se samo onimu kiga biš slučajno sriv i prvin susidon.
Zato bi se drugi dan od Božića, na Stipanju, šlo okoli po selu čestitat. Ali i va oštariju aš na sam Božić se ni šlo.
    Nakon  Stipanje brzo pride Novo lito. Ni ga se dočekivalo, kot posle Drugiga rata, po oštarijah. Na prvi dan noviga lita  samo biš čestitav prvin susidon i rodu. Ta dan bi dičina šla po kućah čestitat aš bi dobila kakov sovdić, kakovu deranču, al jabuko. Ta mići darić ča se da otroku se zove « dobra ruka «. Ženske bi šle čestitat kašnje aš se reklo da mora muški prvi čestitat novo lito inače da bi bilo nesritno. Za te dane darovalo se va familiji kakove sitnice kot opletene obojke , cigareti al kakov facov za ženske …
    Na Tri kraje bi se tri muška obukla va tri kraje i po selu koledvali. Va saki kući su kantali uz mih, a kašnje armoniku. Za nagradu bi in domaćin dav kakovu klobasicu, malo špeha ili neč sovdi. Nikako, z Tri kraji, bi i finili božićni dani. Onda je biv mir do Vazma.
    Duh Vazma se oćutiv već za Uličnu nediju kad se šlo na blagoslov uličnih vijic.
Od Uličnice do Vazma je Veli ćedan. Za Veli petak je veli post pa se ne smi jist meso. Kot i za Viliju božju ji se ofrigana slana al friška riba. Ni za Velu sobotu se nebi smilo jist meso. Te dane, pred Vazam, se  peku vazmene pogače i šišori za dicu. Pituraju se jaja ,ali ne z piturami ke danas kupiš va butigi. Nigo tako da se , dok se jaja kuhaju , va vodu stavi kora od kapule ka pusti lipu, kafenkastu boju. Tako i jaja dobiju tu boju. Danas za pogaču reku pinca, a šišor još malo ki dila. Inače se dila od istiga testa kot i pogača samo ča se stori pletenica. Dug je dobar pedaj. Na vrhu stave trdo kuhano jaje. Na Vazam dica pohajaju z tin šišoron pak se hvale čigov je lipji
    Na Vazam jutro bi se va jenu košaricu dilo malo pršuta, pancete, par kuhanih jaj , macić luka, pogača i još ča god i neslo na blagoslov. Z blagoslovon se bižalo doma aš se govorilo da ki prvi pride i hiti va Studenčić blagoslovjen luk da će imet sriće i on i njigovi. Najžveltija je znala bit Tonka Kanjerova. Ni vrag ju ni mogav preteć.
Kad se blagoslov doma prnese popije se  bilo kafe i poji malo luka i pogače. Poji se i malo pršuta i jaje. Za južinu se ji meso, ali kako ki more. Niki da goveje, a niki janjčića.
Ali mnogi  ta dan pasaju z tu blagoslovjenu hranu. Neč se još prikuha pa se po cili dan to dveči.
Judi si med sobu čestitaju i gre se va oštariju. Ako je lipo vrime hiti se i ka partida na boće.
Od drugih blagdani još se štimalo Majku  božju. Ta dan su mnogi šli na Trsat.
    Kako je za Rokovu vela fešta i samanj va Klani to se ta dan znalo poć Klano. Ali, kad su Talijani prišli, se se prominilo. Oni, ki su imeli putnicu su mogli poć na Rokovu, ali su se do odrejeniga vrimena morali i vrnit doma. A znaš kako je. Čovik malo popije pa kad mu je najlipje mora poć ća. Zato smo se domislili nevoji. Počelo se Rokovu slavit va Studeni. Gromiški kramari bi stavili dva, tri stola pred Jankoćimi vrati i prodavali kramariju. Nikakove prsteniće, bracolete, korezine. Se je to bilo kot od zlata, ali znalo se da je favso. Od onda je ostalo ime «gromiško zlato» za vas nakit ki ni pravi. Još bi se tu znalo nać stvari ke su se dičini jako pijažale.
Prišli bi i Gromičani i Kastavci, ki nisu imeli putnice za poć va Klano, a i mnogi Klanjci. Oni su pak govorili da komać tu moru kantat po hrvacki na vas glas. Za popit i pojist se vavik ča našlo. I kakov sopac je biv tu pa je to bilo dosta da se Rokova lipo proslavi. Naši mladi su za Rokovu znali poć i Kukujanon aš je i tamo sveti Rok zaštitnik pa se i tamo slavilo.
    Nakon Drugiga rata ni se baš lipo gledalo na ove blagdane. Zato se jako pazi da se proslave dani ki se zovu prazniki : Prvi maj i 29. novembar.
    Prvi maj pada lipo kad se već trava zazeleni i obično su razna dogajanja vani na otprtin. Reče mu se još i Praznik rada. Dva dana se ne dila pa moreš poć kamo god ćeš. Naši judi se ta dan slože i gredu va kakov bliži vrt ili Pred zvir pa ča speku. Niki znaju speć i janjčića, a najveć puti store roštij. Stari bi jili i pili, a mladi bi igrali na boću, a večer bi šli na ples.
    Dvajset i deveti novembar je dan ki se, kot i Praznik rada, slavi dva dana. Na ta dan je osnovana nova Jugoslavija hijadu devet sto četrdeset i tretiga lita va Jajcu,. va Bosni.
Taj dan se prijemje pionire va Pionirsku organizaciju. Tu dičicu, dok polažu zakletvu, je lipo gledat kako se ponosno drže, a komać su počeli va školu hodit. Obično na ta dan se prijemje i omladinu va Savez socijalističke omladine. Omladinac postaješ nigdi va sedmin razredu.
    Za Novo lito su dva slobodna dana pa se obično va kakovi oštariji parića doček. Puli nas se to obično dila va Sali ili Domu. Tu večer,oni ki to organizira, skuha ča za pojist pa se podili za vrime dočeka. Ni pijače ne fali. Jasno da je i muzika ka sope do jutra. Munjesa se cilu večer tako da jutro, na samo Novo lito, mnoge ni voja ni oči otprit.



bacilat – mariti, brinuti
bilo kafe – bijela kava
bižat - trčati
bracolet - narukvica
cikulada - čokolada
ćedan - tjedan
deranča - naranča
dvečit - žvakati
facov - rubac
favso - lažno
gredu - idu
južina - ručak
kafenkasta - smeđkasta
kantat - pjevati
komać - jedva
korezin - ogrlica
kramari – trgovci kramarijom
kramarija – razna roba
macić - svežnjić
majić – božićno drvce
morda - možda
moru - mogu
munjesat - ludovati
najžveltija - najbrža
neč - nešto
Novo lito – Nova godina
otprto - otvoreno
otrok – muško dijete
pasat - proći
pijažat - sviđati
poć ća - otići
postolić - cipelica
rabi - treba
samanj - sajam
sopac - svirač
snažit - čistiti
Stipanja - Dan sv. Stjepana
srist - sresti
škornjica - čizmica
Tri kraja – Dan sv. tri kralja
Ulična nedija – nedjelja prije Uskrsa
vas - sav
Vazam  - Uskrs
Vilija božja – dan prije Božića




Izvor fotografije : http://forum.ribolovnamoru.com
Ovo su najbolji šišori što sam pronašao putem googleja.Tu na njima još fali križ napravljen od tijesta preko jaja. Iz moje mladosti se sjećam da su bili elegantnije te pletenice. Tanje i dulje.

[zokxy]

Ovih dana su mlekarice počašćene u Ugostiteljskoj školi doručkom pa su se političari preslikavali s njima. Da i ja budem aktualan evo moga priloga i duuubokog naklona prema tim ženama .
I da ne bude nesporazuma ovo je "priča " moga djeda Fileta koji je umro 1976. g.

Homo daje bez vrag te pare!

MLIKO ZA DOBRO JUTRO

    Čuj , mi smo od mlika i drv živili . Saki dan se mliko neslo v Riku , a drva zapejalo, tako, jedanput na šetemanu.
    Krave se muzlo tri put na dan ke su bile friško oteljene, a druge dva put. Saka krava bi davala petnajsčak litar mlika na dan . Pa ako si imev tri , četire krave lahko je zračunat kuliko je to mlika na dan. Muzle bi najveć ženske , aš je to , kako bimo rekli , žensko dilo. Nika krava je na miru dok se muze, a nika je nemirna. Takovi kravi se onda  rep veže za zadnju nogu pa ne more matačit.  Ženska ka muze bi sila na šklambicu puli krave . Oprala bi ji sasce najprvo z mjačnun , a potla z mrzlun vodu. Prijela bi dva sasca i muzla va napošni sić dok je bilo mlika . Onda bi prijela druga dva sasca i zmuzla do kraja. Kad bi finila z jednu kravu prepasala bi na drugu i tako bi pomuzla se krave ke su imele mlika.
    Mliko se zanese va kuću i čez cidilo dobro procidi va velu padelu ili lonac.  Neč mlika se odzname pa se kuha za nas doma. To mliko se kuha na tihimu ognju pa se odzname škrajup i spravi va jedan lonac dok ga se ne nabere tuliko da se more dilat maslo.
Maslo se dila tako da se ta škrajup stavi va pinju  Tuče se va pinji dok se ne stisne i stori putar. Ne znaš ča je pinja? Ma to ti je drvena posuda visoka nikako do kolina . Doli je široka približno pedaj i prama gori se suživa do petnajsčak centometri .  Gori je pokrov čez kiga pasiva jedna palica na kraju ke je prošupjeno kolace.  Ta palica je višja od pinje pa se povlači gori – doli dok se ne stori putar .
    Ta putar se kuha na tihimu ognju da  ne zagori. Kada onako lipo požuti i počne se pinit maslo je kuhano. Onda se to zlije va jedan lonac i nese ga se ohladit. Tako more dugo stat.Kad se maslo odlije va padeli ostanu , na dnu , žute mrvice ke se žlicu postružu. Zovemo jih feca. Niki judi to jako vole jist, najveć z palentu. Maslo se jako štimalo . Koristi se za kuhat. Neč bi se prodalo, a i dalo bi se aventoron kot za dobru ruku.
    Sira i funde nismo dilali osim kad je ostajalo mlika ko se ni moglo prodat .
    Kot ča san i rekav od mlika se dalo lipe sovde zaslužit . Prodavalo se samo friško mliko. Ženske bi va late lile mliko i pokrile ga z pokrovi ki su bili omotani z pletki da se ne proliva dok ga neseš. Late , a bilo jih je raznih velikosti ali nikako najveć od pet litar, se postave va koš kiga se oprti z pomoć plašćenke. Okoli pasa se zaveže jedan zavežjaj od krp ki drži  da košara ne skliže prama doli i da manje žuli hrbat. To su zvale fagot. Kašnje se misto košare nosilo rucak . Va košari je bilo i do pedest litar mlika. Još bi se dilo kakov mići lončić od jedne litre kot za miru i put pod noge do Rike . Rano se šlo . Vavik je bilo trdo škuro, okoli tri ure za povnoću, kad su neboge ženskice krenile . Zato bi sobu zele i feralić. Na hodeć su plele obojke. Još ča god bi si stavile va košaru . Kakove gube ili jagodice , malo masla i timu sličmo pa bi i od tiga prijele kakov solad. Šlo se prvo prik Vrha, a kašnje, kad se cista storila, po cisti pa čez Marišćinu po stazi i onda opet po cisti prama Marčejon. Ako je biv snig sejeno su šle. Najprvo bi jedna prtila snig onda, kad bi se strudila, druga pa su tako šle pomalo napred.  Prvo počivalo bilo je va Tesnimu na Bačurkini gromači puli kaline. Onda bi šle daje prama Svetimu Matiju kadi bi počinile puli Klanjčevih.
    Daje bi šle čez Pehin do granice. Tu na granici su Talijani dilali kontrolu mlika pa bi produžile kako ka . Nika skroz do Rike , a nika prama Toreti i Mlaki.
    Kad bi prišle Podmurvican zvonilo je sveto jutro.
    Mi smo najveć raznašali po Toreti i zdolu prama Mlaki . Plaćali bi nan sakako . Najveć na šetemanu . Ali kako su i naši aventori bili najveć siromahi kot i mi to čuda puti nisu imeli pa bimo in i na dug davali ili bi nan dali kakovu robu na račun.  Ma glavno da se mliko kako tako prodavalo.
   Niki, ki ni imev dosta mlika za nest, bi prodav to mliko susidi ka bi ga nesla daje. Nike ženske su užale nest do Marčeji kadi bi ga prodale ki Marčejki pa bi ga ova daje nesla. Nike su pak dilale samo maslo pa bi ga susida nesla prodat misto nje. Čuj, sakako su se domišjale da jedna drugi pomoru.
    Z timi sovdi ča su dobile ženske bi doma prnesle ono ča je bilo cinije va Taliji kot kafe , cukar, pašta… Za nazad su se znale ofermat va oštariji puli Biškupovih na Pehinu ili Bačurkinih puli Marčeji pa bi popile pasaretu ili žmujić vina. Ali , to nisu dilale redovito nigo kadikad.
    Kad bi okoli povdan doma prišle mlikarice nisu mogle počinit i reć ja san za danas storila dilo. Morala se prijet dila ko je iz sakiga kantuna zijalo primi mene. Ćeš južinu  dofinit , ćeš va štalu , ćeš va poje , ćeš koscen nest jist… A ne moreš simu ča .
Ma ja vavik govorin da su naše ženske bile mučenice .
    Kad san jast šav va penziju onput san i ja počev nosit mliko. Ali sad je to bilo kanat prama nikada. Lipo bin staviv rucak va bunker od kurjere malo poćakulav z šoferon Pepićen , ili ki je već biv,  i tiktak smo prišli do Podmurvic kadi bin šav doli. I pomalo od aventora do aventora podiliv mliko , poćakulav malo i nazad. Kad bimo šli nazad kurjera se obavezno fermala puli  Bačurkinih pa bimo popili dva deca. Nike ženske  bi brontulale, ali mi smo sejno popili pak šli doma. Ako je biv kakov poseban dan , je li kakov blagdan ili komu rojendan , onda bimo malo i pojili gromiškiga sira i pršuta.  Ta put su i ženskice šle snami i ne bi brontulale.
    Danas je se manje mlikaric. Još se vidi ka i ka. Kad je prišlo mliko va ove plastične vrićice nestalo je i mlikaric. Ali i krav je se manje. Na, va selu na prste moreš pobrojit kuliko jih je. A, vaja tako mora bit.



 
Izvor fotografije: http://www.lokalpatrioti-rijeka.com

Aventor - kupac
Brontulat - mrmljati
Cidilo - cjedilo
Cinije - jeftinije
Fagot - zavežljaj
Feca – nusproizvod pri kuhanju maslaca
Funda – kiselo mlijeko
Južina - ručak
Hrbat - leđa
Kolace – kotačić
Kurjera – autobus
Lata - kanta
Matačit - ludovati
Napošan - prikladan
Obojak - čarapa
Pinja – drvena naprava za pravljenje maslaca
Plašćenka – platnena traka
Pletak – povoj od platna
Prnest - donijeti
Prošupjen - probušen
Rucak - naprtnjača
Sasac - sisa
Sejno – svejedno
Spravit - spremiti
Šklambica - klupica
Škrajup - škorup
Štimat -  cijeniti, poštovati
Užat - običavati
Zijat – vikati
Žulit - žuljati

[zokxy]

NJIVE I ORUĐE ZA OBDILIVAT ZEMJU

    Mi, hvala bogu, mamo dosti zemje za obdilivat. Nismo, kot Kastavci, morali za saku lešicu nanašat zemju. Naše poje je velo i nikada je bilo so obdilano, a ne kot danas zapušćeno. Najveć smo sadili konpir, frmentu , zeje , fažov , repu … I za blago bi se posjalo pese, rave i još kakove zelenjave. Posjalo bi se i šenicu, zob i ječmik. Zrna ječmika su se pekla i mlila pa se kuhalo kafe od tiga. Kad bi se va sedmin misecu pokosilo šenicu ili zob ostalo bi strnišće. Preoralo bi ga se pa bi se tu posadila repa ka je bila jako dobra za kisat.
    Zemja se parićivala tako da bi se nigdi va tretimu , četrtimu misecu zorala . Najprvo bi se rashitav gnoj ki se prvo pripejav va koši na njivu. Nakon tiga bi se oralo z plugon kiga bi vukav par voli .Tako zoranu zemju bi se poravnalo z želiznimi grabjicami da zemja bude čin ravnija. Kad se zore njivu tribalo je storit i jamnik kiga se stori z posebnin vogon aš je to meja med dvi njive . Med njivami su još naši stari stavili kamike ki su senjivali meju .
    Puli nas ni bila navada orat na jesen osim ledin . Njih bi se zoralo malo pliće , ali tako da trava ostane pod zemju kako bi do drugiga oranja, na proliće, zgnjilila . Korona ka ostaje za oranjen se razbija z matiku tako da ne ostanu vele grude zemje.
    Kad bi njiva bila tako parićana šlo bi se sadit konpir. Najprvo je niki muški z picalon dilav škuje tako na približno pov metra. Va te škuje bi se staviv konpir ili komad konpira, ako je biv debji, na kimu je moralo bit klic.  Zmed konpira bi se napicale manje škujice va ke bi se posadilo frmentu. Kad je to se posajeno z matiku bi se zagrnilo.
    Sad , kad su traktori va selu lagje se konpir sadi .  Me par da je prvi traktor kupiv Jože Puhov 1972. lita. Sadi se tako  da z traktoron store  rede i va nje se stavi konpir  na jedno dvajsetak centometri razmaka . Onda se nagrne z matiku zemju na konpir.
    Kad konpir malo poodrase oplije se. To se dila tako da se z ruku poskube plivel i malo z rožići ili matičicu prorahja zemja. Potla jedno  misec  dan, kad nati postanu jačje, konpir se nagrne tako da se z matičicu z sih strane nahita zemja na dno konpirove nati. Mora ga se i očuvat od bolesti, a i od konpirovih zlatic, kih ni bilo prvo . Prišle su  knan  kad su nan Merikani slali pomoć nakon Drugiga rata. Nikad ih se z ruku pobiralo i ubijalo. Potla se, tamo nigdi od šezdesetih, koristiv prah za očuvat konpir od zlatic.
    Konpir se počne kopat kad mu nat posuši, a to je nigdi početkon devetiga miseca. Oni ki ga kopa to dila z vilami ili motiku i mora pazit da ga ne ošteti .
    Danas se konpir i kopa z traktoron pa je i to velo olakšanje va dilu .
    Kad je skopan konpir se zapeja doma i stavi na kup pa ga se ki drugi dan prebere . Na jedan kraj se stavi najdebji kiga se ji.  Oni sridnji, kih je tako petnajščak va kilu, i ma dobra oka se pusti za sime.  Najtanji se kuha praseton pa ga zato i  zovemo  «prašći konpir».
    Osim konpira i fažov  nan je jako važan za prehranit se. Jako rado ga jimo. Ćeš z paštu,  ćeš samiga - «na padelu « kako mi rečemo ili pak na salatu.
    Maš oniga ča se povija okoli kolca kad raste kiga zovemo kolarac . Mamo i drugu vrst  ku zovemo niski fažov. Sad, sakiga je još puno sorat. Niki fažov je naredan za mušnice aš kako jih pobiraš tako nove zrastu. Jast mušnice kuhane  jako volin na salatu , onako z česnon.
    Fažov se pobere kad mu se mušnice počnu sušit. Nese ga se doma i stavi puli kuću na tnalo  sušit do kraja. Onda ga se omuli i pospravi va platnene vrićice.  Kašnje se na vetru očisti od komadići mušnic ke su dospele va vrićice. To zovemo da se fažov opalje . Dila se tako da se, kad je malo burno vrime, va najke stavi par kiv fažova. Hita ga se vajer, ali tako da fažov nazad pada va najke, a te osušene komadiće mušnic vetar otpuhne.           .
    Zeje i repa su hrana prez ke se ne more ni zamislit zima. Kiselo zeje ili pak repa, z fažolon su malo manje nigo saki dan na stolu. Pa još palenta konpirica. Ma mrtav bi to jiv. Ja ali do stola je fanj dila.
Za zeja imet moralo se posjat sime najkašnje do Veliga petka. To se dilalo na posebno parićani lišici ku smo zvali kapužnjak. Kad kapuz poodrase tako na jedno pedaj višine se ga posadi na prvo parićanimu dilu njive kiga zovemo zevnik . Zevnik se prvo tiga još jedanput nagnoji i zore. Kapuz se posadi na razmak od pov metra . Pazi, mi sadnicu zovemo kapuz, a glavicu zeje.
    Kad malo narase se oplije, a kašnje i nagrne. Kad zeju postanu trde glavice , a to je nikako okoli deseti ga, jedanajstiga miseca, na njivi se odrižu glavice i pejaju doma. Tu se parićaju i stave va čabar kisat . Jedan div se zriba pa kad rabi mamo zeja i zribaniga i va glavicah.
    Repa se skopa z zemje i zanese doma. Tu se očist pa se nariba ili se čitovata stavi kisat va kakov čabrić aš nje manje kisamo nigo zeja.
    Ja, teško je dilat na zemji, ali prez nje se ne more živit.



Izvor fotografije: http://www.slomedia.it



P.S.
Namjerno nisam stavljao rječnik kako bih vidio reakcije. Kako se nitko nije javio shvatio sam da ste već toliko naučili po studenjski da vam ne treba prevoditi.
Ali za one koji slučajno zalutaju na ovu stranicu ipak , evo besidnika.
Obdilivat - obrađivanje
Pese – stočne repe
Rave - korabe
Zorala - izorala
Jamnik – kanal između njiva
Vogon - pažnjom
Ledin – neobrađene zemlje
Korona – zapušteni dio oranice
Picalon – drvena naprava zašiljenog kraja visine cca 1 m
Škuje - rupe
Nati - stabljike
Naredan - prikladan
Mušnice - mahune
Omuli - oruni
Najke – drveno korito dugo 50-ak cm
Zeje - kupus

[zokxy]

ČA SE JILO?

    Ča se jilo pitaš? Jilo se ono ča se imelo. Ako se imelo. Kako je familija imela puno dice moralo se sakrabojsko pazit ča i kuliko se kuha. Mnogi su kruh, a i drugu hranu, držali pod kjučen. Da dica, ka su vavik lačna, nebi pojila preveć pa da se brzo ostane prez hrane. Ne reče se bez vraga da je na mladimu čoviku i stomanja lačna.
    Pravi gospodar bi imev jedniga ili dva prašćića tako da bi bilo po zimi malo friškiga mesa. Onda bi se počelo jist dimjeno meso kot kobasice i pancete.  Za Vazam bi se jile lopatice i zarebrnik. Pršuti bi se čuvali ako se mislilo ča dilat za majstre. Ili , kot ča su niki dilali, bi ih se prodalo oštaron pa bi se z timi sovdi moglo kupit nove miće prašćiće.
    Jasno, bilo je  konpira i fažola za po zimi. Skisalo bi se zeja i repe pa je bilo ča  kuhat. Meso goveje se ritko kuhalo. Obično bi se po nediji skuhav gulaš ili kako se onda reklo tenfanje. Kad je bilo govedine na pijatu znav si da je blagdan.
    Osnovna hrana je bila to malo prašćevine , konpir , fažov i kiselo zeje i repa. I onda se to kuhalo va sin mogućin kombinacijami.  Kupilo bi se i malo pašte i oriži pa bimo jili : paštu i fažov, konpir i fažov, repa i fažov, zeje i fažov, fažov na padelu, oriži na mliku , pečen konpir…I, da ne pozabin, ni , vaja, bilo dana da se ni kuhala palenta konpirica. Z sačin smo ju jili. Kuhala se i palenta samena kako smo ju zvali. Va nju se ne diva konpir.
    Kruha  se isto dosta pojilo. Peklo ga se doma obično jedanput na šetemanu. Ali mnogi su ga kupovali va butigi.
    Saki dan bi se našlo puli kokoš i kakovo jaje pa se i z tin moglo računat.
   Za večeru se jilo neč lagje kot kaša i mliko ili pak oriži na mliku aš je bilo i mlika.
No za pravo reć, osim va nikih grdih vrimeni, ni bilo glada ako je čovik mogav dilat.
    Jedan , vako reć , običan dan bi se jutro jilo bilo kafe i nadrobjen kruh.  Za ručnju bi se spravilo kakovo jaje al ča slično. Južinalo bi se recimo pašta i fažov z kakovin suhin meson. Za miću južinu bi se pojilo ako ča ostane od južine ili komad palente i špeha. Za večeru bi se skuhala kaša i mliko.
    Jasno, ovisilo je o dobu va litu i prama njimu se imelo i namirnice za kuhat. Onda ti ni , sinko moj , bilo frižideri ni zamrzivači pak da si to lipo mogav bez većih problemi očuvat da se ne pokvari. Jedini način za očuvat je bilo sojenje i sušenje. Tako bi se prašćevina nakon klanja posolila i osušila.
    Zeje se kisalo va čabru tako da bi se kisalo i glavice i naribano. Va drugimu čabru bi se stavilo kisat repu.
    Ja san voliv najveć ono ča se danas ne ji saki dan - polevaču. Vidin da ne znaš ča je to . Gromičan bi rekav da voli nju i njeju. Ja , ja smij se ti, ali to je jušto tako. On voli palentu i juhu od palente. To ti je polevača. Za polevaču ti rabi gromiškiga sira, malo suhiga mesa  i konpir i muka za konpiricu skuhat.
     Skuha se konpir i va to se strese malo muke. Kad prokuha odlije se malo te juhe i stavi na stran, a z onin ča je ostalo stori se konpirica, Kad je konpirica skuhana ofriga se suho meso. Sad da li će to bit kobasice, zarebrnik ili pak panceta ni tuliko važno. Va pijat se stavi komad konpirice polije se z onu juhu, pridoda se ofrigano meso i nariba se sira. Ma to ti je za prste polizat. I još žmuj vina črniga popit …
    Va selu se ni dilalo sira osim ako se ni imelo kamo mliko prodat. Ali to je bilo ritko. Tako da smo sir kupovali od Gromičani.
    Magari smo va šumi ni se baš puno divjadi jilo. Jedno ča su se šume čuvale od krivolova, a , kot drugo, i ni baš bilo oružja za blago ubijat.
    Neč se nabralo va sezoni i gub pa se i z tin pripomoglo prehrani. Najveć su se pobirale, mi ih zovemo prave gube,  a to su ti,  vrganji i žute ke se po hrvacki zovu lisičice. Još ki i ki bi pobirav nike druge gube, ali samo one za ke je stoposto sigur da jih pozna. Ja još poznan kukmake. Zato ja ne pametin da se je ki z sela kad  potrovav z gubami. Puno gub se neslo i prodat na placu.
    Još su dica i ženske pobirale jagode, borovice i frambob. Neč bimo pozobali, a drugo bi se neslo prodat ili v Riku ili pak v Opatiju na placu. Saki dinar al lira su dobro prišli.
    Voće ili žir, kako su ga stari zvali, se jilo samo ono ča je zraslo doma. Ni ga se kupovalo. Najveć je bilo jabuk, frušak, murav, češap i malo črišanj.  Nigdi pedesetih me je jena parona v Riki, dok san mev pod njeju poneštru, pitala da ću li bananu. Odgovoriv san ji da neću aš nis znav ča je to. A rado bin biv pojiv bananu, .sad kad znan kako je dobra. Ruže nisu rasle va Studeni, osim fragule ku smo i mi imeli pred kuću.
    Ča se tiče slašćic kot ča su kolači tiga se jilo samo za pir i blagdane kot ča su Božić i Vazam. Skoro san pozabiv da su za pusne dane ženske znale dilat štrukje. I to kuhane , a ne pečene. Tako  da je i to bila jedna navada va našin selu. Ki je te štrukje prnesav i kada ne znan. Ali judi su sakuda dilali pa je ki probav nigdi va Hrvatskimu i zapametiv kako se dila pa doma prnesav.
Danas, vidin, se više judi ma frižidere i zamrzivače pa je lagje hranu očuvat. Ali z tin se i nike stvari promine. Pa po litu jiš kiselu repu, a po zimi sladoled. Ja mislin da to ni dobro.

sakrabojsko-vražje ;
vavik-uvijek ;
preveć-previše ;
prez-bez ;
stomanja-košulja ;
lačna-gladna ;
friškiga-svježega ;
lopatice.plećke ;
zarebrnik-kare ;
dilat-raditi ;
majstre-majstore ; 
oštaron-gostioničarima ;
sovdi-novcima ; 
zeja-kupusa ;
oriži-riže ;
kaša-jelo od kukuruznog brašna ;
ručnju-marendu ;
spravilo-pripremilo ;
južinalo-ručalo ;
jušto-baš ;
muka-kukuruzno brašno ;
žmuj-čašu ;
divjad-divljač ;
gub-gljiva ;
kukmake-livadske pečurke ;
frambob-maline ;
prišli-došli ;
frušak-krušaka ;
murav-murvi ;
češap-šljiva ;
črišanj-trešanja ;
parona-gazdarica ;
mev-meo ;
njeju-njezinom  ;
poneštru-prozorom ;
ruže-loza ;
slašćic-slastica ;
pr(i)nesav-donio ;
sakuda-svugdje ;
Hrvatsko-zvali su područje, negdje, od Ogulina pa sjevernije  ;
zapametiv-zapamtio.   




Ovo bi trebala biti  palenta ka se kuha va  pinjati                 



Komentirajte u temi http://croinfo.net/forum051novi/index.php?topic=405.0

[zokxy]

Priče idu dalje...

Muzika, ples i kantanje

     Ča se tiče muzike, plesa i kantanja vavik se je neč kantivalo i soplo. Još se zmišjan kako su na Snižnici plesali dok je na mih sopav Jure Škohov. Ne znaš kadi je Snižnica?
Ma to ti je jedna njivica va Blatnin klancu. Ni bilo niš zacementirano. Ma kaakov vražji tarac? Na goli zemji se plesalo. Jure je sopav, a pari su se vrtili kot preslice.
    Judi su kantali po starinsku. Na tanko i debelo. Ne spametin se da je ki sopav na sopile.
Jedino na mih, kot ča san već rekav, je Jure sopav do pred rat.
    Kad su niki mladići dilali va Francuski 1930-ih prišla je i prva armonika va selo. Kad su se vrnili niki ju je prnesav. Čini mi se da je to biv Ive Šinčev. Ja, to ti je bila triještinka.
    Onda su počeli i plesi z armoniku. Najprvo se zmišjan  Iveta Banašeriniga – Stričina su ga prozvali, ki je sopav na triještinku. Prvi plesi z armoniku su bili puli Mikele ka je držala oštariju va Buzgoći kući. Kašnje se plesalo i puli Jamkoćih kad je on otprv oštariju.
    Ples je vodiv jedan mladić ki je biv feštar. On je govoriv sopcu ča će sost i za koga. Prama dogovoru već su mogli i na mote se razumit. Tako, kad bi feštar digniv samo palac to bi sopcu značilo, na primer, sad sopi vajcer, dva prsta pojku, tri šetepaše …
Ako biš feštaru dav niki solad, a ki i ni biv mići, onda bi on zapovidav da je to samo ples za tebe i tvoju tancuricu. I ne daj bog da bi ki onda šav plesat kad je biv ples «na samo». Mnoge barufe su se dogodile aš niki je za dešpet tev plesat baš tada.
    Meni je najdraže bilo plesat šetepaše. Čekaj, kako gre ono :
                                 « Kad san hodiv u školu
                                  Učio san računi
                                  Edan, dva, tri, štiri
                                  To su naši računi…»
     Dečki su šli na ples i po Gromišćini. Tako su plesali puli Kukujani, va Zoretići , Trnovici. Čez Jurišin bi pasali do tamo i nazad. Tamo je naš Ive upoznav Vlatkota Krušvića ki je, kot mladić, prvi put prišav sost z oću  va Studeno kad se ženiv Jože Kanjeričin za Katetu Puhovu. Biv je lipo obučen va nike šport brageše od pepito matrijala. Posle je još mnogin paron sopav na piru. Ne samo po selu nigo i po Gromišćini i Kastavšćini.
    Za vrime rata ni se baš plesalo ni kantalo.
Kad je finiv rat  najveć je sopav Jože Bavdin, a kašnje su prišli mlaji sopci med kimi je biv i njigov sin Jože.
    Va Domu su počeli vadit se sost dečki  Čičkini : Mile, Vojmir i Jože i š njimi Ive Šebeć i Jože Puhov. Učiv ih je Frane Franesić. Lipo i brzo su se navadili tako da su počeli sost najprvo va našin Domu, a kašnje i po okolnimi misti. Ive Šebeć i Vojmir su sopli armonike, ke već nisu bile triještinke, Mile saksafon, a Jože trumbetu. Puh je sopav na bajs. Tako da je to biv već pravi, moderni sastav. Ča su sopli pitaš? Sopli su ono ča se onda soplo po Kastavšćini, Gromišćini i okoli. Neč bi niki čuv na kakovin plesu, radiju ili drugdi pa bi to nikako zapisav. Vadili bi se dok nebi navadili. Kašnje su prišle i pjoče pa bi po sluhu vadili.
    Ma kako su se dečki poženili tako se i sastav raspav. Još kadikad bi zasopli morda na kakovin dočeku noviga lita ili za kakov Prvi maj. Ma baš ih je bilo lipo čut.
    Najaktivnij je ostav Ive Šebeć ki je armoniku još dugo rastezav na zadovojstvo sih ki su volili zaplesat. Š njin su na bubanj nabijali Ive Vlašeć i Vlatko Škajanov.
    Skoro san pozabiv reć da su krajen trejsetih va Studeni bili storili tamburaški sastav kiga je vodiv učitej Lojzić Rubeša. Ma dok su oni učili sost na tambure prišav je i rat tako da  nisu mogli pokazat kuliko su i ča naučili. Imeli su  se tambure ke su tribale i ne znan ki jih je plativ ni kamo su finile. Ali čini mi se da je i po drugih seli  bilo tako. Kot niko bujenje nacionalne svesti. Tobože mi Hrvati mamo svoj štrument. A to je tambura.
A pozabili su da mamo i mih i sopile. Vaja to nisu bili nacionalni štrumenti.

Kantivalo-pjevušilo ;
soplo-sviralo ;
vrtili-okretali ;
feštar-voditeljplesa ;
mote-znakove ;
vajcer-valcer ;
pojka-polka ;
šetepaše-sette passi ;
tancuricu-plesačicu ;
barufe-tučnjave ;
čez-kroz ;
vadit-učiti ;
bujenje-buđenje ;
vaja-valjda;   


Komentirajte u temi http://croinfo.net/forum051novi/index.php?topic=405.0