Zač...

[milić]

Zač san zajubjen va Trsatski park

Na Trsate, na jednen brežiće za kega govore da se je nekad zval Goljak, rastegnul se je Trsatski park. Vrh brežića je 142 metra nad moren a najdolnja točka da je na višine od 95 metar zgora mora. Ime Goljak je dobil aš da je bil gol, sam kamik do kamika. Kašneje je postal Voljak (i danaska je na Krimeje jedna ulica koj je ime Podvoljak) a na kraje Vojak. Stran prama koj je park obrnjen je jugozapad tako da je, osim vrha, fanj va jate od buri. Na ten meste da su judi, se dok ni park načinjen, hitali smeti. Teh smet i ni bilo bog zna ča aš va to vreme ni bilo ni tetrapaka ni plastičneh boc ni puno tega prez čega je danaska teško živet. A i Trsaćani je na početke 20. stoleća bilo malo. Sušak i Trsat skupa su imeli komać 6.000 stanovniki.
Potla Prvega rata Trsat, ustvari Sušak, je naglo počel rast zarad svojga položaja va novoj države Jugoslavije, kako će ju kašneje nazvat. Bilo je soldi pa se je moglo delat i veće stvari leh ča je jedan park.
Judi vole da jin je okolo kuće urejeno pa zato sade rožice i kakovo zelenje. Tako da je pomorac Andrija Bahorić još 1911. z školsku decu sadil borići po trsatsken krše. Na ten bi i ostalo da 1926. gradonačelnik Sušaka (od 1919. Sušak je grad) Juraj Kučić ni rekal tu ćemo storit park. To je bilo 1926. pa je inženjer Zlatko Prikril dobil ordin da osmisli kako će se park storit. On je projekat storil drugo leto a va to vreme je z Karlovca prišal Josip Kulfanek ki je kašneje ozelenil celi Sušak. Priča o Trsatskemu parku je i priča o Josipu Kulfaneku.
Josip je rojen 1899. va moravsken (danas Češka) gradiće Letovice kot Josef. Va Brne je finil školu za vrtlara pa je moral poć va Prvi rat va ken je bil i ranjen tako da je otada šepal. Potla rata je šal za delom skroz do Karlovca kamo je prišal 1921. Tuka je glavni od parki bil neki Čeh Josip Kopriva s ken je delal. Kopriva je imel lepu hćer Đurđu pak su se mladi zagjedali jedan va drugega al je ćaća rekal ne ženidbe aš je Đurđa bila premlada. Kulfanek je šal 1926. va Sušak al ni pozabil Đurđu. Na kraje su se 1929. oženili pa je Josip mogal još veseleje delat na uređenje parka na Vojake Pogotovo kad su se rodile hćeri Milada i Ljudmila. Od 1927. je z grupu od desetak delavci urejeval park tako da su najprvo storili rasadnik od oko 14.000 metri kvadrateh na meste kade je danaska OŠ Vladimir Gortan. Raspejevali su po budućen parke i humus ki se je storil od raspadeneh smet ke su tamo bile. Novo mesto kade su se hitale smeti bilo je Rupno, kako je zapisal inženjer Sila. Park je na početke bil velik 33.500 kvadeateh metri a pred Drugi rat se je proširil za još 11.500  kvadrati i na on del od Pariza zgoru, prama današnjoj Radićevoj. Va Kulfaneku su judi prepoznali velega znalca i delavca pa su mu, kad je sredil Trsatski park, dali da sredi i druge parke po Sušake, a potta Drugega rata i po cele Reke. Urejeval je on i parke širon Jugoslavije a kakov majstor je bil morda najviše govori to da je urejeval i Brijune. Po njegovemi uputami urejevala su se rečka grobja na Trsate i Kozale. Umrl je 1976. i zakopan je na, a kade drugde?, Trsate. Na Strmice je jedna uličica duga oko 300 metar nazvana po njemu a va Trsatsken parke postavna je jedna mića spomen-ploča ka poveda da je Kulfanek storil ta park i dugo let ga nastal.
Va parke je od 1951. do 1957. delana spomen-kosturnica ka je na vrhe finjevala z spomenikon storenen od kamika ki sinbolizira razvitu pobedničku zastavu ka vijori na vetre. Spomen-kosturnica je storena po ideje i projekti Sušačana Zdenkota Kolacijota, poznatega urbanista (Zagreb! ) i žensota mu Zdenkota Sile (fanj je Čehi v Reke). Spomen-kosturnica je otprta na Dan borca 1957. ki je bil praznik va nekadanjoj države a padal je na 4 jula. Kritičari, va ono vreme, da su bili jako zadovojni kako se to skupa zgjeda a Kulfanek, kot i ja danas, ni bil baš kuntenat. On je bil predlagal neko drugo mesto za spomenik.
Moj odnos prama temu parku je pun jubavi, ja san va njega zajubjen. Ta odnos mane i njega je počel 1967. kad san počel hodit va 7. razred škole na Vojake. Potla škole smo užali poć va njega najveć poskriveć pušit. Snami su užale poć i divojčice pa bi neki na brzinu od doma prnesal balu pa smo se igrali na graničara a još više smo se voleli igrat na penji. Nekako va to vreme pojavil se je i manđadiski. Sad zamislite sliku - muzika z manđadiska, recimo The Beatles i Yesterday (ipak ću napisat kako je va originale) ) i graničar. Slika dva - "Ovaj penj neka poljubi... "! Mladost i veselje živjenja pul spomen-kosturnice.
Kad san finil osnovnu školu skoro san i pozabil na park se do 1988. kad san se oženil i došal bivat na Vojak. Došal je i otrok a mane je najlepje bilo kad bin šnjin bil va parke. Od tega vremena san počel se više prihajat va park. Tamo san vrnjeval forcu potla transplatacije bubrega 1991., tekal i treniral va dečjen igralište. Leta su pasevala a ja san smiron prihajal va park. Najprvo z sinon i ženun potla samo z ženun a na kraje sam. Nasmel bin se kakovemu otročiće na igralište, pogladil kakovega pasića, potužil se kakovemu kopriviću al pohvalil kakovoj rožice. Se san se više zbliževal s parkon i sen ča je va njemu i vezano za njega. Bolelo bi me kada bin videl da je zapušćen, veselilo kad bin videl da je neč popravno, posajeno. Pred jedno pet-šest let na forume croinfo.neta san otprl temu o parku va koj san sako-tuliko z slikun i besedami opisal ča san videl i oćutil va parke. Zapisal san kakov je koprivić, lipa al divi kostanj; crnika, bor al tisa; juke, lovor višnje al forzicija.   
Danas, ma otkad ja pametin, je službeno ime parka Park heroja. Tu i tamo se naleti da je ime parka Pančićev park, Park narodnih heroja a čut je: Trsacki park, Trsaški park, Trsački park...
Mane park pomore da san blizu prirode, da moren na mire šetat al sedet i razmišjat. Al samo sedet i gledat va borić a bome i leć ako mu se jušto leži. Zarad sega tega ni niš čudno da san zajubjen va njega.

[milić]

Zač je Draga tako draga                                 

Kad se poprtiš na vrh brega, ki se je nekada zval Vežica a sad je Sveti Križ, videt ćeš lepo urejen Astronomski centar. Va njemu je i kafić ki na vrhe ima terasu na koj je, ako je lepo vreme, gušt sedet, sribat kafe i gjedat okolo. Otuda se vidi celi Kvarner a na drugu stran je videt Dragu kot na dlane. E, o Drage ću danaska neč malo napisat.
Govore da je Draga dobila ime po lepoj i jako plodnoj doline - drage zmed Solina i Sv. križa otprtoj prama moru na koj rase ča god posadiš. Se to zato aš je fanj vodi ča je jedan od osnovneh uvjeti za dobro živjenje. Va Drage je nekada bilo nekuliko zviri čiste vodi za pit (Grmlje, Jamica, Javor, Vrulja i Vrutak) pa je i to pomoglo da su tu judi rado živeli.               
Kad ju gjedaš z tega vršića videt ćeš da je nategnjena kot trakavica. Piše da je duga oko 4 kilomerti a mane se je, dok san još vozil, činila još i daja. Rastegnula se je pul cesti va smere zapad - istok od Svete Ane do Svetega Kuzma. Kroz nju paseva stara dobra Karolina a piše da je tuda šla i Rimska cesta prama Senje. Zgora cesti je 1873. storena pruga  a videt je da su se i pul nje delale kuće. Danaska je va Drage okolo 1.800 stanovniki ki žive va približno 600 kuć. Imena nekadanjeh zaselki su ostala kroz imena ulic. Tako je 7 deli Drage: Pod ohrušvom, Gušć, Tomasići, Orlići, Brig, Pelinova gora i Tijani. Zgora, na strane od severa je brdo Rebar z najvišen vrhon Tocila od 359 metar nad moren. Z južne strani su još dva brda Solin i Sv. križ  tako da je Draga kot va jednoj zibele. Zmed Solina i Sv. križa teče Draški potok ki je, kako piše Nikola Stražičić, nastal od dva draška potoka. Istočni zvire spod Sv Kuzma, teče do Orlići va dužine oko 2.5 kilometra i zovu ga Potok al Draški potok a drugi, ki nima imena, zvire Pod ohrušvu, dug je oko 700 metar pa se pred kanjonon kega delaju Solin i Sv. križ spaja s oven prven i teku daje prama Martinšćice i moru. Pul teh potoki da su nekad bila perila na keh su Draškinje prale robu. Pul Potoka je bil jak zvir Vrulja zdola naselja Brig kade je bilo storeno perilo ko je bilo pokriveno z krovon. Pul Orlići je bilo isto jedno perilo na zvire Javor a skroz gore va Gušće, pul nasipa od pruge, je bil zvir i perilo Vrutak. Ja ne znan je ča od teh peril ostalo pogotovo sad kad je preko Drage pasala autocesta i fanj tega šundrala. Davno još san čul da judi šeću pul Draškega potoka do Martinšćice nač se spravjan već baren 50 let pa bi bilo lepo da to i storin.
Prvi put da je Draga spomenuta va jedne darovnice 1431. leta. Va to vreme je bila del bakarske gospoštije ča je duralo se do 1874. kad je postala samostalna općina, ma ne za dugo aš je već 1876. pripala općine Trsat, kašneje Sušak i onputa, do danaska, Reke. Zarad tega ča je va našeh kraji fanj Drag judi i danaska ovu Dragu zovu Sušačka Draga a prvo, dok je bila del Bakra, je bila Bakarska Draga da bi neko vreme bila i Vlaška Draga aš da je fanj Vlahi pobeglo semo kad je pal slavljeni grad Klis.
Dražani i Dražanke (najveć se čuje od domaćeh Draškinje) su jako ponosni na dugu povjest školstva va meste. Još 1822. da je bila privatna škola a 1875. je storena nova škola. Danas je škola područna škola OŠ V. Gortan kot ča je to bila i 1967. kad su smanu va razred šli B. i O. ki su živeli va Drage. Interesantno je za zapisat da mi je B. govoril da doma drže krave i da prvo nego će poć va šlolu mora sredit blago.
Va Drage su dve crekve, ustvari crekva i kapela. Župna crekva sv. Antona opata i kapela sv. Jakova pul grobja. Obadve su fanj stare a kapelu da je storila familija Kalegari 1464. Župna (Dolnja ju još zovu) crekva sv Antona je pak zazidana 1676. Ovako stare imaju velo značenje ne samo za Dragu.
1891. D. Hirc ovako opišuje buru i grobje va Drage: "... Kada ovdje zaurla bura, tad nije druge, već da se uhitiš za koje stablo ili pritisneš ka gromači, jer će bura, koja tu obara i kola, s tobom o zemlju bubnuti. Pod crkvom pada ti na lievo u oči četverouglasto zemljište, ogradjeno bielim zidom, na kojem se zeleni više piramidalnih čimpresa i visoki grrnovi ružmarina. To je dražko groblje, gdje pokojnici u naručaju prirode vječni sanak snivaju. Ljepšega i prikladnijega mjesta ne ima za "cimiter", kako i Dražani groblje zovu, do ovoga..."
1913. storen je Hrvatski dom va lepote kega su Dražani malo uživali aš je brzo prišal Prvi rat pa su, kad je finil, Dragu okupirali Talijani se do 9. 5. 1921. Brzo za ten prišal je i Drugi rat va ken je poginulo 69 Dražani ken je 1954. postavan spomenik. Po lete 41. va Drage (Tijani) delala je partizanska štanparija va koj se je štanpal Crveni (Primorski) vjesnik.
Draga ima lepe uvjete za poljoprivredu a nekada je bila poznata po vinogradi. Potla Drugega rata judi su se više zapušćevali grunat i vadili se za zanate pa su otpirali najveć radijone za popravjat avuti. Tako su i moja dva suseda z Vežice R. i M. storili nove kući, preselili va nje i otprli mehaničarske radijone. M. mi je osandeseteh popravjal "peglicu".
Najpoznateji Dražan je kipar Belizar Bahorić, autor rečkeh skulptur: Vala postavne pred Circolo, Ivana Zajca va parke pul kazališta, Mlekarice va Staren grade i, mane najlepje, Spomenik nogometnoj mladosti na Orijentoven igralište.
Daje od Drage, prama istoke je Sveti Kuzam za kega nisan znal da je Mjesni odbor va sastave Grada Reki. Do devedeseteh let 20. stoleća ime mu je bilo Vitoševo. Va njemu su se kuće stisnule va tri grupe - Sv Kuzam, Ketina i Vitoševo/ Baraći. Va Sv. Kuzme je crekva posvećena svete braće Kuzmetu i Damjanu. Storena je 1735. na mirinah stare crekvice još iz 1080. leta. Pul crekvi je i šterna storena 1914. pul ke je bilo i korito za napajat blago. Uvde je nekad delano dobro vino Francez a bilo je i fanj oštarij. Danas su Kuzmari više va umjetnoste leh va oštarijah aš postoji Kulturno društvo "Sv. Kuzme i Damjana" ko je aktivno va kiparstve toliko da su storili i Formu Vivu - galeriju na otprten.
Za kraj ću, aš mi je jako lep opis, opet prepisat z knjigi Hrvatsko primorje D. Hirca kako je on videl blagdan va Drage: "... Odrasli mornci saberu se na cesti i igraju na "b o ć e" ; djeca se zabavljaju čunjevi, koje si sami od drva izrežu, a prikraćuju si s njimi vrieme i odrasle djevojke, ako već nisu posjele u vežu ili na privrat, da igraju na tombolu. Starci i starice čuče pred kućom i gledaju mladež, kako se zabavlja. Svrneš li se u gostionicu, kojih irna u Dragi prilično, naći ćeš druge, gdje kartaju, a obljubljene su i tu talijanske igre briškule i trešete..."
.

[ilirija]

Vajda znamo da na zadnjoj slici nije Kuzam, nego Draga/Orlići. a crkva je sv Antona opata

[milić]

A što nebi znali. 

[Kont]

Dragi, sve si bolji i bolji

[milić]

Drago mi je to pročitat od drage osobe . 

[milić]

Zač je Stari grad star

Današnja Reka je grad ki se je širil od svojga semena, od dela kega danas zovemo Stari grad al Citta vecchia. Ta del je bil grad (Terra Fluminis) ki je bil zidi zaštićen od napadi neprijateli z vana. Zidi su bili storeni po trase kako su danas postavne oviste ulice: F. Supila, Žrtava fašizma, P.R. Vitezovića, Starčevićeva, Korzo i Trg 128. brigade. One delaju jedan kvadrati prsten na čigoveh kantuni su bile postavne glavne kule a med njimi bile su storene i pomoćne, manje. Zidi su bili dupli a izgleda da su samo oni na severe bili leh obični. Severni i južni zid su bili dugi oko 400 metar a oni na istoke i zapade približno 200 metar s ten da je kantun ki prati nekadašnju ulicu Rov po talijanski Fosso a današnju P. R. Vitezovića malo okrhnjen pa je površina Starega grada, kako san zmeril, okolo 7 hektar.
Na severozapade bila je Slogin kula za ku gospa Ekl va knjige Živa baština piše da je bila i najstareja. Z kulu Sokol i sv. Jeronima bila je najvažneja za obranu. Neko vreme se je va njoj čuvalo barut pa su ju zvali Barutana al Polveriera. Zrušena je komać 1927. aš za vreme Austo-Ugarske ni bilo dopušćeno rušenje.
Na severoistočne strane je bila kula Lešnjak. Ime je dobila po potoke Lešnjak ki je, kot i jedan rukavac od Rečini, pul kule zahajal va rov i tekal pul zidi na istoke i juge pa va more skroz do mesta današnjega Trga republike. Na jugoistoke je bila kula Sokol, na meste kade je križanje ulic Korzo, Starčevićeve i Sokol kule. Prvi put se spominje oko 1550. Na jugozapadnen kantune rečkeh zidin bila je kula sv. Jeronima ka je, kako na grafikah zgjeda, bila najboje opremjena za borbu. Ime je dobila po samostane ki je blizu. Zazidana je na kraje 16. stoleća a zrušena je 1806. Kot ča vidimo kule imaju hrvacka imena ka su takova od časa kad su prvi put spomenute va dokumenteh. Ta podatak V. Ekl drži da je jako važan del hrvacke toponamistke v Reke.
Med temi glavnemi kulami su bile postavne i manje kule. Kirin je bila med sv. Jeronimon i Slogin kulu. Med Lešnjakon i  Sokol kulun bila je kula sv. Marije ka je ime dobila po crekve Blažene Djevice Marije ka je bila blizu. Na severnen zide bila su Gornja vrata utvrđena s okruglun kulun ka je zihajala van zidin. Preko jarka je bil postavan mostić ki se je mogal spušćat i dizat. Preko mostića su judi zihajali z grada na Zagrad. Med temi vrati i Slogin kulun bil je jako dobro utvrđen Kaštel. To je bilo mesto va ken je bil sud i zatvor a žnjega je rečki kapetan komandiral s gradon. Ne zna se kad je storen ma kad su se 1464. podelili brati Wolfgang i Rambert IV. Walsee, Wolfgangu je z sen drugen pripal dvorac i grad sv. Vida na Rečine. Znači, onda je kaštel već bil storen. 1618. va Kaštele je potpisan mirovni sporazum med Austrijun i Venecijun s ken je dogovoreno preselenje uskoki va nutrašnju Hrvacku. Neko vreme su va kaštele bili soldati a kašneje je bila vojna bolnica. Zrušen je 1904. kad se je počela delat Sudbena palača al, kako bimo mi rekli, Sud.
Okolo zidi je bil jarak po ken je tekla voda ka je prihajala najveć od potoka Lešnjak. Va grad se je moglo uć kroz dvoja vrata - ona na severe - Gornja vrata i druga - Gradska vrata na juge, ona pod urun. Kašneje su storena još vrata na zapadnen zide i na istočnen prama današnjen Jelačićeven trge.
 Tako je Reka zgjedala se do 1780. kad je car Josip II. al Josef II., sinak od "naše" Marije Tereze, dopustil da se zidi i kule zruše. Med temi zidi bilo je života. Stišnjen za današnje kriterije ma živelo se je. Judi su bili podejeni na onega ki je živel va Kaštele, patricije i obične jude ki su bili butigeri, oštari, postolari al ča drugo. Pred Gradskemi vrati pul mora su kalafati delali brodi a na Rečine su delavci skrcevali al nakrcevali one brodi ki su prišli va luku. Med zidi bilo je fanj mićeh crekav po velikosti (Sv. Barbare, Sv. tri kraji, Sv. duha, Sv. Roka, Sv. Bernardina i sv. Mihovila) od keh je ostala samo ona jako srdačna i važna, posvećena svetemu Sebastijanu ki nas čuva od kugi. I danas su tu vele rečke crekve. Ona sv. Jeromima na Trge Riječke rezolucije ka je najprvo storena 1363. s velun pomoći Devinci ki su va to vreme bili vlasniki Reki. Tuka je i stara crekva Uznesenja blažene djevice Marije al Duomo ka je storena va ranen srednjen veke na antičkeh termah a 1442. ju je majstor Juraj iz Zadra obnovil da bi ju još urejevali 1695. a širili 1725. Današnja katedrala sv. Vida delana, sa stankami, sto let od 1638. je pak prava lepotica na vrh Grivice. Dignjena je na terene kade je i prvo nje bila crekvica s isten imenon.
Osim crekvi va Staren grade je i fanj tega ča bi rabilo spomenut. Tu je stara gracka većnicu al Palac komuna rečkega na Kobleroven trge va ken je, med puno tega drugega, rojen naš slavni konpozitor Ivan Zajc. Va centre rečkega starega grada, va Užarskoj ulice na broje 26, je najstareji stanbeni objekat v Reke, poznat kot Palača Garbas – Grbac. Palac je storen 1690. Va njemu je danaska Konzervatorski zavod. Palac Benzoni na današnje atrese Grivica 6 je pripadal plemićkoj familije Benzoni. Storen je zmed 1726. i 1745. leta. Na vrh Koblerova trga su Stara vrata al Rimski luk al Arco Romano, najstareji spomenik v Reke. Povesničari se prvo nisu mogli složit od kada je tu ma sad je opći stav da su to vrata bivšega castruma. Va Staren se grade more videt i Municipij. Na nekadanje Piazze del Municipio a današnjen Trge Riječke rezolucije je postavan standarac za kega smo misleli, kad smo bili dečina, da je to stup srama. Na ten trge je pred 30-ak let bilo letno kino. Zmišjan se odličnega filma U ime ruže sa Seanom Conneryjem. Koblerov trg, ki je bil i Piazza della Frutta, ima i lepu fontanu. Nju je 1974. za svoju 150. letnicu postavila Hartera a po projekte Igora Emilija.
Još jedan trg va Staren grade je mane sinpatičan. To je Pavlinski trg ki se je zval i Piazza del tre Re a i Millerov trg. Tu užan po lete sedet s prijateli, pit kafe i gjedat kako judi teku semo-tamo.
Malo daje, na Trge pul Vele crikve arheoogi su našli i proučili kasnoantičke podne mozaike z 5. i 6. stoleća i nazad jih zakopali do bojeh vremen.
Kad već pišen i o onemu ča se ne more videt rabi zapisat i da se već ne more videt samostan od benediktinki kot i isusovački kolegij i seminar.
No se su te priče od pasanega vremena poznate čin su zapisane. Sad je došal red na noveje teme ke se doživjevaju na sam spomen imena Starega grada.
Ivan Rogić Nehajev va svojeh spamećevanj na Stari grad va eseje Stari grad moje mladosti opiševa kako je zgjedalo živet va njemu 50-eh let 20. stoleća. Jedna od informacij ka more prikazat kako je to bilo živet va Staren grade je ta da je va njemu 1954. bilo 186 zgrad od keh je komać njih 40 bilo za bivat. Se drugo je bilo za zrušit al va njih ni bilo za bivat. Malo je stani bilo s kupaonicun a neki nisu imeli ni zahod. Kupatilo na Školjiće, za one ki su bivali va takoveh stani, je bil spas.
O živjenje va Staren grade 1960-teh povedal mi je moj prijatel D. ki je bival va Medulićevoj, malo zdola crekve sv. Vida. Njigovi roditelji, prišlići z Bodulije, privremeno, ča je duralo desetak let, su se smestili va neki ruševan stan a život je šal naprvo. Prišla su deca ka su se brzo prinavadila na život va takove okoline. Po Staren grade bilo je oštarij na lopate. D. se domišja njih nekuliko a najveć Papaline na današnjen Mljekarsken trge i Bel moro na kantune pul Sv. Vida. Ja se domišjan i Peteha al K pijetlu kako mu je valda bilo pravo ime. Poveda D. da ča je se va teh oštarij, kot dete videl i čul. "Teta" bi mu dala par dinari da nikega ne pušća va zahod dok je ona nutre z mušteriju. S temi soldići D. je tekal kupit sličice od igrači pa se je mularija pul zida od crekvi igrala s temi sličicami hitajuć jih ki će bliže zide. To da su igrali i za soldi a ne za sličice, kot moja kunpanija. Deca od 7-8 let su preprodavala harte za va kino a o prodavanju opuk ipak neću pisat. Uglavno, jedan obećavajuć razvojni put za decu tega vremena i prostora. Domišjan se kako se je na kraje šezdeseteh govorelo o bande z Starega grada od ke je moj prijatel D. na vreme pobegal aš mu je otac dobil stan na Vežice. Kad čovek danas malo promisli ča je ime Starega grada značilo šezdeseteh ni ni čudo da su mnogi misleli da bi ga bilo najboje potaracat.
Va Stari grad ja san slabo zahajal se do kraja sedandeseteh kad se je mojo društvo počelo nahajat va Premiere. Ta kafić je va to vreme bil ohoho spreda mnogeh va Reke a bome i Trste va ki smo užali poć "popit kafe". Va Premiere san pojil prvi tost a i popil prvi prirodni sok od naranči. Kašneje je bila i dobra slastičarnica Simona ma ne moren se spametit kade je jušto bila.
Za kraj ću van prepisat jedno razmišjanje z knjigi Z. Moranjaka i F. Burburana Ulicama riječkim lutam: "... Od njegovih nekadašnjih šezdesetak naziva ulica i trgova, a koji su svi bili vezani uz staru toponomastiku, sačuvano je tek nekih desetak toponima i svega nekoliko imena osoba koje imaju veze s Rijekom..."

[fran pitur]

Evo i plan uređenja Starog grada između 1955. i 1969.
https://photos.app.goo.gl/3jgjyeLJs2Hsm4aS8

[milić]

Zač je Ružićeva ulica nekada bila Tvornička

Va svojeh baren pedeset let kuliko kračan po ulicah dragega grada ne znan san al ne bil desetak put, ala dobro neka bude dvajsetak, va današnjoj Ružićeve ulice. Ta ulica je vavek bila nekako škura i zapušćena tako da je čoveka bilo jušto strah zać va nju. A ni ni imela sadržaji, osim kina, ki bi mane baš interesirali. Ona se je, med dva rata, zvala Tvornička cesta. Kot i se rečke ulice menjala je imena. Leta 1941. Talijani su ju nazvali via Sicilia a kad su partizani potirali fašiste i naciste nazvali su ju po O. Keršovaniju a 1953. je nazvana, to ime najveć pametin, po braće Šupak. Od 1993. nosi današnje ime po staremu (morda je boje reć ocu) Gjurotu Ružiće, Hreljanu. On da se je tuliko obogatel z prodavanjen papuč delavcen ki su delali Sueski kanal da je postal morda i najbogateji čovek va oven kraje. Sad, je baš tako bilo, ne bin znal aš govore da se najveć soldi more zaslužit kad storiš delo z vojsku a ne mi ga z delavci. No, da se vrnen na ime! Mislin da bi se ulica mogla zvat Ulica bivšeh tvornic, slično kot i ona bivša Industrijska na Mlake.
Zgora Ružićeve je Ulica Franjota Račkega ka je i med dva rata a i potla imela to ime. Samo su ju Talijani 1941. prekrstili va via Bruno Caleari. Franjo Rački, po kemu je ulica dobila ime, je bil rojeni Fužinarac. Med drugen je bil i prvi precednik Jugoslavenske akademije znanosti i umjetnosti i to je ostal 20 let, se do 1888. Zato ni niš čudno da ga ne žele prekrižit ni ovi ni oni.
Neki dan san malo šal pogjedat ulice F. Račkega i G. Ružića. Dan je bil lep, pravi za šećat. Od Pariza san pasal va ulicu Vidikovac pa va Bošket. Onda san se po skalah spustil do Lujze kako popularno zovemo Lujzinsku cestu. Nju je projektiral i vodil delo na njoj podmaršal i barun Josip Filip Vukasović a po njoj se je počelo pejat 1811. Od tuda san šal malo nazgoru do Banskeh vrat ka su nekada bila Porta Hungarica. Na desne strane kad se gre zdolun je postavna ploča na spomen banu Jelačiće ki je Reku 1848. spojil z Hrvackun. Kad god vidin Banska vrata spametin se smešice ku da je rekal sušačka legenda Frane Pitue kad ga je učitel pital zač va našeh kraji puše jaka bura.
- Zato aš su Banska vrata smirom otprta!
A i onu da su Rečani Portu Hungaricu prekrstili va porka ungarika
Malo niže Banskeh vrat je nekadanja oštarija Lujza pokojnega Šareta. Nekeh pedesetak metar zgora oštarije i preko cesti je storeno jedno kvadrato tubo od lamarina ko finjeva pul Hartere. Kroz njega da su nekada hitali sirovinu za hartu delat, najveć krpe.
Va toj ulice je med dva rata, kad je Sušak bil grad, bilo puno buteg, radijoni a bome i oštarij. Pokojni sused barba Rudi mi je užal povedat o temu. I nabrojil je šest oštarij a morda je ku i pozabil.
Va njoj je bilo od 1937. i kino Luxor ko da je bilo jako lepo urejeno a Novi list piše ovako: "...Da predstave budu čim ugodnije i privlačnije, po uzoru na veće gradove kraljevine, stati će cijenjenom općinstvu na raspolaganje ukusni Buffet sa brzom poslugom..." Potla Drugega rata je kino promenilo ime va Tuhobić ko je delalo do 1952. a kašneje je va njemu počelo delat Kazališna grupa Viktor Car Emin. Danaska su tuka još samo mirine.
Od Ulice F. Račkega, malo niže od mesta kade na nju shajaju skale z Bošketa, do Ružićeve pejaju poznate Harterske skale po keh je mnogi korak storil saki delavac va Hartere ki je po kušćić kruha prihajal z Gromišćine, Trsata, Podvežice...
Sad kad smo na dne Harterskeh skal prišli smo do Hartere al Tvornice papira kako joj je bilo ime kega se ja domišjan. Ta fabrika je bila prva prava tvornica v Reke. Najprvo je tuka bil malin kega je kupil A. Lj. Adamić, preuredil ga je i 1823. počelo se delat hartu. Brzo je on to prodal nekemu Molineu a on Charlesu Meynieru i Walteru Craftonu Smithu. Oni su storili pravu fabriku va koj  je 1833.  postavan parni stroj, prvi va oven dele Evrope. Fabrika je delala više-manje dobro magari je menjala i vlasnike i države se do 1991. kada je po proizvodnje bila druga va Evrope a va njoj je delalo 1.150 delavci. Od onda je se više tonula a 2005. je finjen stečaj ča znači da je fabrika šla fuć. Najpoznateja je bila po vrhunske harte za cigareti, a 1972. va njoj su se počele delat i popularni frminanti - parafinke.
Ni Hartera bila jedina fabrika va današnjoj Ružićeve. Tr da je bila jedina onda je ne biju, med dva rata, Sušačani zvali Tvornička ulica leh Harterska. Tu je bilo, kot i z druge strani Rečini, tuliko fabrik i radijonic da ulicu moremo zvat i industrijska zona.
Homo sad nabrajat te fabrike i radijone ne od Hartere leh z druge strani, od početka Ružićeve.
Na početke, na broje 5, ni bila nikakova fabrika ma je bil hotel Sušak. Njega je 1900. otprl Sušačan Petar Marač. Hotel je imel velu dvoranu va koj je 1924. leta počelo delat kino Balkan, ma samo do 1927. Va te kuće je potla do rata bila derekcija Jadranske plovidbe d.d., a danas je va njoj HAZU. Pedesetak metar daje, na broje 9, je 1928. počelo delat kino Jadran - Palace. Potla rata se je zvalo samo Jadran i spametin ga se jako dobro makar nisan puno put bil va njemu. Va to vreme, kega se spamećujen, si mogal va njega uć kad si kupil hartu aš se je reklamiralo kot  non-stop kino. Znači da si mogal doć na pol filma i odgjedat ga još jedanput aš ni bilo baš gledateji. Danas va dvorane moji prijateli igraju mići nogomet aš ga va najme drži DŠR Sušak.
Na današnjen broje 15 bil je nekad mići malin od Srećkota Turine. Malin je počel delat 1889. leta a 1923. je još delal aš ga vidin na popise sušačkeh obrtniki od tega leta.
Stotinjak metar daje, na desnu ruku, pred više od sto let, je bila fabrika za sapun delat, a vlasnik joj je bil Josip Heindlhofer. Delala je jako malo, nekeh 5 - 10 let od 1895.
Va Ružićevoj je bilo još radijoni i mićeh fabrik kot ča je bila ledana ka je delala od 1929. pa skroz do šezdeseteh let 20. stoleća kad su ju zamenili frižideri. 
Pul Rečini, na broje 29, malo prvo lego ča počne Hartera, 1877. je počela delat Kožara Bakarčić-Simonić. Osnivači su joj bili Anton Bakarčić i Ljudevit Ružić ki je brzo odustal, a zamenil ga je Anton Simonić. Delali su poplate tako da jih je pedesetak delavci na leto storilo i do 20 vagoni. Kožara je likvidirana 1925. a od 1929. va njoj je bila Ljuštionica za oriži koj je gospodar bil Eduard Polak. Va Almanahe grada Sušaka od 1938. leta piše da je Ljuštionica riže d.d. proizvodila se sorti oriži. Njej kapacitet bil je oko 2.400 vagoni na leto, a sirovinu je nabavjala va Talije, Egipte, Indije i Merike. Danaska su tuka Plodine.
Pročital san da se je va oneh dveh zgradah preko puta Kožare, va Ružićeve 12, delala bira al nisan nigdere našal od kad do kad je to bilo.
Kad sad malo pomislin na su ovu manju i veću industriju ku je Reka (va današnjeh granicah) imela more se slobodno napisat da je na kraje 19. i va celen 20. stoleće tuka bilo najjače industrijsko područje na teritorije današnje Hrvacke. Je to bilo dobro al loše ne bin znal.

[milić]

Zač ni više orehi va Orehovice

Neki dan san prvi put, onako turistički, bil va Orehovice. "Milijun" puti san z avuton pasal kroz nju, pogotovo kad su mama i tata bili va Studene. Najnaredneje mi je bilo poć z Vežice a potla, kad san se oženil, z Vojaka po Petrolejskoj caste va Studenu.
Prama popise stanovniki od 1805. va Orehovice da je živelo 27 stanovniki va 5 kuć. 1804. je delana Lujzinska cesta kroz Orehovicu ka je sten dobila na važnosti pa je i broj stanovniki rasal.  Danas jih je oko 540.
Orehovica je stišnjena med četiri brega ki se zovu:: Strmica, Rebar, Katarina i Kljun a zdola nje teče Rečina. A. Rački je napisal da se prvi put spominje 1681. a prva kuća ča je storena na gromiškoj strane da je bila mitnica kade su se naplaćevale vozarine. Kad je delana Lujzijana na križanju z cestu ka vodi prama Vežice  bil je jedan veli, star i lep hrast pa da je podmaršal Vukasović tel da se mesto ne zove Orehovica leh Hrast. To ni bila prva promena imena Orehovice aš najprvo da se je zvala Žakalj. To ime, kako piše V. Ekl, se spominje va nekeh dokumenteh 1567. kot "Contrada Xia-chagliach" i 1583. "Contrada e torrente Zaccagl" ma kot kus zemlje a ne naselje. Neki da su mesto zvali i Štranga aš je na meste kade je bila mitnica postavna ranpa - štranga. Zač se je zvala Hrast i Štranga je jasno a ni jasno zač se zove Orehovica aš orehi po Orehovice i ni baš tuliko.
 Po katastre Orehovica je podejena na Gornju i Dolnju. Tako je gospa Larisa Grčić Simeunović zapisala va Gornje Orehovice oviste toponime: Kljun, Koporovo, Badanj, Cuculićeva kampanja, Kantun, Pod Jazi, Jurinjovo, Glavica, Prezid, Jezero, Kalina i Žakalj. Zapisala je i dele Dolnje Orehovice: Matešićevo,   
Bačićevo ili Gradsko, Pod Rebar, Bosak, Mitnica, Luke, Bakarčićevo, Refuđ, Ravni Škoj, Šarinićeva kava, Strmica i Kacjak.
Orehovica je imela Rečinu i okolo nje se je razvijala. Voda rabi juden, blagu i zelenjave. Oko tega se je vrtel život na Orehovice. Pul Rečine je bilo malini (neki jih je nabrojil na celemu toku jušto 27), pil za pilit drva, stupe za vunu kosmat i stupići za pšenicu i ječmik mulit. Najpoznateji malin je bil on va Žaklje. Njega je 1839. storil Trsaćan Luka Matković a njigov sin Gašpar ga je prodal Triještinon Carlotu d`Ottaviju Fontane i Marcotu Pigazziju (poznata priča, ča ne). Oni su malin fanjski dignuli tako da su storili branu i kanal a storili su i most preko Rečine i cestu do Lujzijane. Malin da je imel 18 kol od kamika pod kemi se mlelo žito. Va njemu da je delalo oko sto delavci. Veli oganj je šundral malin 1862. leta. Ov oganj je imel i jednu dobru stran aš je pomogal da Reka dobije profesionalni vatrogasci. Jedno društvo na delnice, kega je vodil Ignazio Scarpa, ga je takovega kupilo i već 1865. je zirasla zgrada duga 90 a visoka 25 metar. Malin je delal do 1918. a va Drugen rate je i na njemu storena vela škoda kada je miniran most za prit do njega. Od onda stoji na milost i nemilosr nevremenu i more se saki čas leh zbatit.
Malo prama zgoru, va Podbadnje je drugi malin, manji od onega va Žaklje ma sejno fanj veli aš da je va njemu delalo pedesetak judi. Storil ga je Anton Matešić verovatno 1840.. I ta malin je zgorel  1863. pa čovek pomisli da ni morda osiguranje va igre. Ovaj malin ni obnavjan leh je ostal pokojni zavavek.
Još malo prama zgoru, prama Pašcu na dele ki Orehovčani zovu Koporovo bil je još jedan malin. Njega  je 1874. storil Franjo Binovsky. Već 1884. je tu, skupa z Adalberton Ruhron, otprl fabriku lepila od košćin - tutkalo. Već 1890. otprli su tvornicu umetnega gnoja va koj je delalp trejsetak radniki. I ta fabrika je nastradala od velega ognja 1907. tako da je za suminjat da je va teh kraji onda živel neki piroman. Ni ta fabrika odonda ni već delala.
Osim Rečine i malini Orehovica je jako povezana z cestami pa su ju nazvali Sjeverna vrata Reki. Pogotovo od 1971. kad je storena autocesta do Kikovice a onda i 1988. kad je otprt severni del rečke zaobilaznice. Još je Lujzinska cesta pomogla da se je va Orehovice moglo boje živet leh drugde. Čital sam da je ov del cesti od Reki do Orehovice bilo najteže stotit, a kad je cesta finjena judi su prihajali gledat to čudo aš da je storena va golemu kamiku. Cestu su počeli delat 1803. Austrijanci a finili 1811. Francuzi. 
Hodeć po Lujzijane na levo, tamo kade već finjeva Orehovica, počne cesta za Pašac, Grohovo pa daje do Rupe. To je Petrolejska cesta, kako su ju krstili aš su po njoj najveć cisterne nekadanjega Transporta z Ilirske Bistrice raspejevali benzinu z urinjske rafinerije. Te cisterne su mi ostale va pamete aš kad bi šla zgoru, onako nakrcana, komać se je vukla a ni bilo baš prilike preteć ju. Nego, neč drugo mane muči vezano za Pašac. Most je taj mučitelj. Moja mat je rado smanu ćakulala i povedala mi je kako joj je otac mlad umrl 1941. Lečil se je i va sušačkoj bolnice a njoj da je vavek bilo slabo kad su šli njemu va posjetu. Najveć da ju je bilo strah pasat va kurjere preko Rečine na moste va Trnovice. Mislel san zato da je pašački most storen malo prvo leh ča će počet Drugi rat. A on je storen još 1932. i po njemu je vozila kurjera za Kastav aš je bilo tuda fanj kraće za vozit leh preko Trnovice. Ma zač je moja mat tako zapametila most va Trnovice a ne ovaj va Pašce vrag će ga znat.
Od kuć ke su va Orehovice va oko najveć bode ona ku domaći zovu Dom. Storilo ju je društvo ko je upravjalo z Lujizinsku cestu 1833. za svoje potrebi a spominje se i da je kuću koristil kot ljetnikovac gospodin Maylender. Nisan sigur da je to bil Michele, Za vreme Stare Jugoslavije va njoj da su bile na fite familije a potla 1945. je bil dom kulture. Danaska je va njemu ured mjesnega odbora i neke butege.
Škola va Orehovice je važna za život mesta aš va njoj se dečica do 4. razreda vade a potla gredu va školu Centar. Nisan baš bil vesel kad san videl kako škola zgjeda.
Inače, Orehovica spada va trsačku župu svetega Jurja. Jedino ča je va meste videt od verskeh objekti je kapelica posvećena Majke Božjoj Lurdskoj. Kapelicu je storil 1909. Ivan Mohorić z Grobnika.
Na jednoj talijanskoj karte z 1940. se more videt da je nekada bila ciglana Mattoni va Orehovice. I A. Rački ju spominje i piše da ju je oko 1873. storil Vinko Sablić na Buzetoven. Dimnjak od ciglane da je štrčal vajer se do 1935. kad je zrušen a ciglana da je delala samo 7-8 let.
Ta dan kad san šal razgledat Orehovicu z prijatelon Lj. prvo ča san spazil je poligon va Draškoj doline kega koristi Udruga za terapijsko jahanje Pegaz. Tuka dečica i stareji s posebnemi potrebami jašu na konji kot za terapiju.
Pul cesti ka gre za Vežicu je spomenik storen na meste kade su Talijani strejali Radeta Šupića i još devet nepoznateh partizanskeh borci. Kad san bival na Vežice saki dan san gjedal va tvornicu ka se je zvala po njemu - DIP Rade Šupić. Kad san na Wikipedije gledal ča piše o Radetu Šupiću zgrozil san se aš mu ni prezime nisu napisali kako rabi leh Šupica.
Negdere pul Orehovice je nekada imel kavu Marijo Šarinić. Pital san jednu žensku kade je to a ona me je bledo gjedala aš verovatno ni ne zna ki je bil taj čovek. A na kraje trejseteh 20. stoleća je bil gradonačelnik, me par zadnji, Sušaka, kamo je i Orehovica onda spadala. A još važneje je to da je bil otac bivšemu hrvackemu premijeru Hrvoju.
Spamećujen se da san oko 1970. bil po lete na plese ozada Doma kade je sopla živa muzika a plesalo se je na taracu. Va Dome je pred desetak let bil i restoran ma nisan nikad bil va njemu tako da ne znan kakov je bil. Va onen bloke kuć prama Reke je nekada moj, već pozabjeni, prijatel Z. držal kafić Morčić al Moretto va ken san dva-tri put bil. Va ten isten bloke kuć oko 1980. je bil dobar restoran Nad Rečinu kega je držala, kako su govorili, poznata MIK-ovka Milka Čakarun Lenac. Ma restoran ni dugo dural.
No, se va semu, zgjeda mi da je Orehovica pravo mesto za živet. Malo zvan grada a opeta tako blizu seh sadržaji ke grad nudi.

[milić]

Zač se Zagrad tako zove 

Dok nisu počeli delat garažu i onisti veli blok kuć ča su nazvali Zagrad ja nisan znal za to ime. Gospa Ekl je to va svojoj knjige lepo raztumačila. Zagrad je hrvacka beseda ka se ne javja samo va Reke leh i va drugeh mesti. Znači neč, mesto ko je ozada, zada, iza grada. Taj toponim se va Reke najveć spominjal va 18. stoleće a onda je pokrival del severo-zaoadno od gradskeh zidi nekako baš kade su sad garaže Zagrad.
Obajdimo malo tisti teren, onako malo šire. Zajdin moremo videt Guvernerovu palaču. Po mnogemi, a i ja tako mislin, to je najlepja zgrada va Reke. Projekat je storil Alajos Hauszmann a delana je od 1893 do 1896. Storena je na brežiće kade su prvo neki Peršići imeli vinograd. Facada joj je obrnjena prama more a i danas se od nje lepo vidi se do mora aš ni storena nijedna kuća ka bi joj skrila pogled. Ma baš je, ča bi se reklo, dominantna. No, ako se palača gjeda z današnje perspektive more se razumet da su Mađari delali tako vele kuće kako bi pokazali svoju moć i da tuka misle zavavek ustat. Estetičari pak pišu o lepote palaca, neki povjesničari pišu kako su kot manuali najveć delali domaći, kastavski i gromiški, delavci ma dok ni prijatel E. skopal da je na gradilište poginulo 16 delavci, a bilo je i ranjeneh, nigdere to nisan pročital. Kot da se to skrivalo!
Volin poć va Guvera, kako palac zovemo. Tu je sad Pomorski i povijesni muzej Hrvatskog primorja (PPMHP). Rado va muzeje pogjedan kakovu temacku izložbu a i stalni postav je mane interesantan. Muzej je va Guvere od 1948. Kad god priden va Muzej, va onen velen lepen predvorje, spametin se anegdote kako da je grof Lajos Bathyany, ki je bil prvi stanar va Guvere, ošpotal Ladislava Szaparyja, sina ranejega guvernera Geze Szaparyja, kada mu je ov rekal da je palac preveli: 
- Ni palac preveli leh si ti premići!
Pred Palačom je veli trg ki je ovako menjal imena: Staro, Josipov trg, Trg Gabriele D'Annunzio, Piazza Roma, Muzejski trg i od 2019. Trg R. Zanelle. Od seh teh imen mane je najinteresantneji ov Staro. Ime je došlo od mere za tekućinu (uje, vino...) al stvar va zrne (frmenta, šenica...) ka se zvala star. Star je bil zdubjen va kamike i va njega da se je moglo zlet 68,5 litar. Star je pak bil postavan tuka aš je na ten meste bil samanj.
Do Guvera je nasajen Muzej grada Reki. Zgrada ka, da se mane pita, nikako ni smela bit na ten meste. Ma niki me ni pital pa je muzej tuka od 1976. kad se je preselil z Trsata. Va to vreme imel je ime Muzej narodne revolucije a od 1994. nosi ovisto ime. Piše da je autor projekta Neven Šegvić dobil nagradu od novin Borba za najboje arhitektonsko ostvarenje va Hrvackoj 1976. leta. Ma, da se razumemo, niman ja niš protiv zgrade leh mesta na ken je. A ča se tiče muzeja i njegoveh izložb iman samo pohvale za njega a najboju izložbu ku san va živjenje pogledal i ka mi još od 2008. zvoni va misleh je Merika.
Blizu ova dva muzeja je i treti - Prirodoslovni muzej na atrese Lorenzov prolaz 1. Muzej je osnovan va vile grofa Negronija zajno potla Drugega rata 1945. a otprt za posjete 1946. I on mi je jako drag. Užal san poć va njega pa na ekrane gjedat tići i poslušat kako kantaju al sest dole, pul akvariji i guštat va mire i gjedat va ribice našega mora.
Pul Prirodoslovnega muzeja je veli park kega ja pametin kot Park Vladimira Nazora a od 1996. se zove Park Nikole Hosta. Park je nastal s velen trudon austrijskega nadvojvode Josipa ki je bil kujin caru Francu Jozefu. On je 1881. kupil vilu va koj je od 1882. sa ženun Klotildun i bival. Danas je va toj vile Državni arhiv va ken san fanj interesantneh stvari našal. Josip je bil veli znalac i zajubjenik va botaniku pa je teren, ki je bil goli kamik, uredil tako da je i dandanas tu lepi park.
Va gornjen dele parka je bil mići zoološki vrt kega se ja mutno zmišjan aš je, siguro na početke šezdeseteh 20. stoleća, zaprt. Va 3. maje su povedali da je jedan od razlogi za njigovo zapiranje bil i taj ča je medved bil otkinul ruku ćere od K. ka je delila mleko va kioske pul 3. navoza.
Pul samega ruba parka je Ulica Kalvarija. Skoro samo ime je tu ustalo od nekadašnjega križnega puta. Se drugo ča je Bratovšćina Svetega Križa počela delat na brde Goljak još 1676. leta je jako propalo. Na pitanje zač je to tako, ko je moja draga prijatelica D. postavila odgovornen va Grade Reke, odgovorili su da je Kalvarija pod baretun države. A Zagreb je nekada jako dugo od Reki.
Na vrh Grohoovčeve ulice, kade se ona križa s Ulicun žrtava fašizma, pul Kalvarije je jedna interesantna zgrada. Storena je na terene ki je va tlocrte koda bi trokut a i padal je na stran prama Perilu ko je bilo blizu. Projekat je storil Luigi Luppis a zidali su ju od 1914. do 1916. Palac je financiral Zavod za zaštitu dece a va zgrade je bil dečji vrtić nekako do kraja šezdeseteh a onda je presejen va novu zgradu. Potla je va "trokutastoj zgrade" bila butega od mobilij Solidarnost a zmišjan se i da je devedeseteh tu bila butega od robi Bernardi. Palac je storen na meste kade je od 1847. bil prvi rečki dečji vrtić za siromašnu dečicu
Sada pasajmo malo na drugu stran Ulice žrtava fažizma. Na Klobučarićeven trge je Osnovna škola Nikola Tesla. Škola je storena 1934. leta na meste kade su prvo bili isusovački Kolegij i Seminar. Projektanti škole su bili gracki arhitekti Bruno Angheben i Pietro Bacci a škola je mogla prijet do 1.000 školani. Bila je jako pametmo storena za ono vreme a i potla, kuliko san čul od ženi ka se je celu osnovnu školu vadila va njoj, je bila jedna od bojeh va Reke po mnogeh stvari.
Jedno dvesto metar na zgoru po Ul. žrtava fašizma je Sud a i popularni zatvor Via Roma. Ova vela i, trebe reć ča je, lepa Palača Pravde kako ju zovu je storena 1906. od strane mađarske državi a po želje rečke vlasti. Zazidana je na meste kade je prvo bil Kaštel po dešenji  F. Stiglera. Va ten velen palace je i zatvor kega su prozvali Via Roma zarad tega ča je tu bila cesta ka se od 1930. zvala tako - via Roma. Poznata je parola ku da je rekal Frane Pitur kad su ga Talijani tamo zaprli - Via Roma nikad doma. Nažalost, va njemu je kratko vreme 1941. bil moj otac a leto dan kašneje i moj nono File. Oni Via Romu nisu pamtili po lepe figure. A, pomalo sramežjivo, moran priznat da san i ja jednu noć tamo prespal ma iz zasen drugeh razlogi.
Sad pasajmo do bivšega Muzejskega trga ki se danas zove po fijumanskemu političare R. Zanelle. Otuda prama zapade gre Ulica Pomerio. Mnogi misle da ime te ulice ima isto značenje kot i zagrad. Ma V. Ekl objašnjeva da to ni baš tako. Pomerio je nastal od latinskega "post murum" ča bi značilo zada zida, više kot tehnički naziv a ne kot toponim.
Va Ulice Pomerio na broje 13 je nekada bila Primaljska škola. To je kuća od časneh sestar reda Srca Isusovega. Zmišjan se da se ta škola zvala po Marije Grbac, kastavske babice i partizanke ka je 1942. umrla od ran ke je dobila va borbe s Talijani va Gorsken kotare. Nekada je na kuće bila ploča na koj je to pisalo ma ja je već ne vidin.
Z druge strani cesti je park ki je otprt 2018. i ni se teško domislet kako je od mnogeh dočekan "na nož". Pisali su po portali i va novinah da nima hlada, da je potrošeno preveć soldi, da ovo i ono... Ma mane se je na prvu dopal. A neki dan san pasal po njemu i još jedanput san videl kako je lep i, ča je najvažneje, bilo je fanj dece a i starejeh va njemu.
Kraj parka je jedna vela kuća va koj su danaska privatne i od Doma zdravja anbulabte. Tu je, dok ni šla pasanega leta va penziju, delala moja prijatelica, dohtorica Đ. a danas san pacijent od njeje sestri Z. ka dela tu isto kot dohtorica obiteljske medicine. Nekada je tu bilo Staro rečko rodilište, kako smo ga nazvali. Puno Rečani je va njemu rojeno a med njimi ja nisan aš san po rojenje Sušačan. Kuća je storena 1913. kot sanatorij po nacrti od Brunota Slocovicha. 1927. je zdignjen još jedan kat. Potla Drugega rata, 1947. je uvde počelo delat rodilište se do 1985. kad se preselilo va novu zgradu na rečke lokacije storenoj od soldi nabraneh samodoprinoson.
Sad malo gjedan va napisano i vidin kuliko je tu, va oven dele grada, mest, kuć ke mane, a verujen i drugen, puno znače. To je del grada nabijen s povjesnemi sadržaji.

[Rijeka]

 

Detaljčić, možda netko ne zna; stepenice koje su postojale u Ulici žrtava fašizma, uklonjene 1972. god., nježno i pažljivo, kamenje je premješteno u skale na uglu Grohovčeve i žrtava fašizma 

[Kont]

Zanimljivo Nisam  to znao.

[milić]

Zač su Pećine neč više od kupališt

Mnogi će reć da su Pećine elitni del Reki. Ja bin dodal - bile nekad. Da bi danaska to bile fali jin, ako niš drugo, parkirališneh mest. A i čistoća ni baš za pohvalit.
Pećine svoj postanak moreju zahvalit ceste ka je storena 1833. i ku su nazvali Doroteja. Morda još i više Građevinskemu pravilnike za izgradnju užega područja morskega kupališta Trsat-Sušak od 1912. leta aš suminjan da bi prez njega bile ovako lepo posložene. Danaska kroz Pećine pasevaju dve "glavne cesti". Ja jih zoven gornja i dolnja aš nikako da zapametin ka je ka. Ona gornja je nazvana po književnike Jankotu Poliće Kamovemu (pred Drugi rat je to bila Istarska ulica) a dolnja po 13. divizije (prvo se je zvala Starčevićevo šetalište, Dorotejska a pred Drugi rat po prestolonaslednike Petre). 
Ćapajte kega pod ruku i pasajte šnjin đir po Pećinah! Ovako užan ja pasat:
 Kalan se po Stubah trinajstoreh streljaneh na Šetalište 13. divizije. Već tuka je ča za videt. Spomenik, mane jako efektan, ki je storen da se spametimo na vele žrtve ke je rabilo dat za slobodu. Spomenik je storen 1984. po ideje Zvonimira Pliskovca.
Na dne skal, na levu stran, je kuća Alga ku su storili partneri va dele Vladimir Kezele i Dinko Budak. Va njoj je od 1937. bil poznati, kako su ga zvali, Ljekarničko-kozmetički laboratorij Alga. Va to vreme Alga je bila poznata po prirodnemi pripravki seh sorti od keh je najpoznatejo bilo nekakovo uje za masirat po ken je i firma dobila ime.
Z druge strani skal, na desnu ruku, je kuća ku je Boren Emili storil 1932. za svoju familiju ma, i drugi su tako delali, i za davat juden i firman na fit. Interesantna je zarad oneh okrugleh balkoni i isto takove facade.   
Z druge strani cesti na kbr. 16 je prelep palac kega zovu Littorale. Storen je 1905. va stile secesije od strani nekega Bluhweissa ki je va njoj otprl fabriku za delat škatule od lima. Prvo je na ten meste bila fabrika od likeri Pfau & Co. a od 1950-eh va palace Littorale je bila štanparija Tipograf ke se ja dobro spamećujen.
Gremo daje po Šetalište! Brzo ćete prit do jedne od zadnjeh zgrad ke su storene na Pećinah va doba socijalizma. Zločesti judi su ju nazvali Karingtonka po familije Carrington z televizijske serije Dinastja aš da je luksuzno storena na lepemu mestu i da su tu stani dobili istaknuti rukovodioci onega vremena.
Zajno do Karingtonke je lep park Augusta Cesarca ki se je, kad je napravan trejseteh let 20. stoleća zval po merikanskemu precedniku Wilsone. Osmislel ga je vredni sušački inženjer Z. Prikril a uredil Josip Kulfanek. Gledal san stare slike parka i bil je pun palmi a sad, me par, da ni vrah te. Va tisti park užan doć slikat brodi ki pridu na Brajdicu aš jih se otuda more lepo slikat.
Na kraje parka, zgora cesti  je Osnovna škola Pećine. Školani su se va njoj počeli vadit od 8. setenbra 1935. Od 1971. do 1990. škola se je zvala "Rade Vranić Petar".
A sad ću vam napisat neč interesantno! Blizu škole je kuća ku Pećinari zovu Dalibor kot ča joj i na facade piše. Ča je to tako interesantno na ovoj kuće aš po Pećinah je fanj kuć ke su lepje i veće od oviste? Ma ova je poznata po ten aš je va njoj živel, kad je pobegal z Opatije, Viktor Car Emin. Dotada je živel i delal va opatijske vile Dalibor ka mu je valda tuliko značila da je slova ka su bila na te vile prenesal semo, na Pećine. Potla Drugega rata mogal se je opet vrnut va Opatiju.
Takoveh, sličneh prič saka pećinska kuća more povedat i lepo jih je čut a rabilo bi jih još i zapisat. Zato ahtajte se judi dela aš vreme brzo paseva.
Zdola školi, pul samega mora i današnje plaže za pasi je od 1895. bila Riječka parna tvornica konjaka i žestokih pića koj je gospodar bil  I. Csillag. Od početka 20. stoleća va njoj je bila Talionica kovina i kemička industrija a potla je bila tvornica likeri Učka. Čul san da se tu delal odličan liker od jaj - ajer konjak. Osim likeri Učka je delala i voćni soki - sirupi za malinovac i narančadu. Kašneje je tu prišla Stanousluga pa ronilački klub a danas je tamo Fan hostel.
Daje jeTenis igralište na ken san ja malo put bil. Zmišjan se da je po lete na početke sedandeseteh pasanega stoleća tu bil lepi koncert popularne slovenske grupe Buldožer z Kopra a na pauze su se na zide prikaževali crtani filmi od Disneya. Neki dečki su nebogega Šiljota gađali z bocami od pive tako da je potla pul tega zida bilo stakla na lopate.
Pul Tenisa, prama more je bilo kupalište (od keh neću uvde pisat) al i pansion Klotilda.
Preko cesti je vila Kezele, gospodara od firme Alga. Za njega san čul da je oko 1930. bil va Malinske pa da ni imel neki lek. Ni se jako pojidal zato leh je šofera s gliseron poslal va Sušak po njega.
Z druge strani, pul mora je vila Gal - Turković. Ta vila ima jedan tarac s kega su kuražni dečki skakali va more a po lete 1952. je za Novi list Petar Grabovac slikal tri mladići kako skaču s tega taraca. Na tu lepu sliku i članak san naletel kad san va Gradske knjižnice iskal neč o 3. maje.
Do te vile je Hotel Jadran ki je storen 1914. pred Prvi rat. Kad god pasevan pul njega zmišjan se kako san bil negdere pročital da je Ivana Brlić Mažuranić vavek kad bi prišla va Sušak videt familiju Ružić kamo joj je bila oženjena hćer Nada bila va njemu. Ni otela smetat a morda su se ona i zet gledali onako kako se već gledaju punica i zet.
Malo daje je Sablićeva kuća i plaža ma smo rekli i zapisali da uvdeka nećemo od plaž pisat.
Daje pridu vile Olga i Kostrena, dve uvenjene lepotice Josipa Mikuličića, nekadanjega konzula Krajevine Jugoslavije va Perue i Australije. Prvu je 1925. storil po nacrteh Milana Tomičića i dal joj ime po hćere Olge a va drugoj, na današnjen broje 56 ka je storena ko leto prvo, je bival.   
Hodeć daje brzo se pride do bivšega hotela Park. On je storen 1909. tako da se je vila od Giovannija Ribolija preuredila va sanatorij. Potla Prvega rata sanatorij je kupil Josip Braun ki ga je preuredil va hotel. 1937. dignulo se je kat i renoviralo po nacrteh od Davida Bunette. Hotel je onda imel 50 kamar. Potla rata je nacionaliziran i delal je kot hotel. Za vreme Domovinskega rata va njemu su bile izbjeglice pa škola A. Lj. Adamića. Po ten se je govorilo da će tamo Medico storit bolnicu a pred dva-tri meseca san čital da vlasnik Jadran hoteli planiraju preurejenje va hotel s 60-70  kamar kvalitete 4 zvezdice.
Ja se rado domislin Parka aš san po lete tamo, dok nisan imel avuto, hodil na ples ki je bil na tarace. Zadnje vreme se volin tamo, prama Glavanovu, kupat.
Va nekadanjoj vile Kresnik je danas crekva Svete obitelji ku judi ni ne abadaju osim oneh ki znaju za nju aš zgjeda kot i druge vile okolo nje. Judi govore da joj fali zvonik ma da ga se planira storit do zida prama Ulice J. P. Kamovega. A neki pak govore da će se delat nova crekva. Videt ćemo...
 Preko puta crekve prama more je sedandeseteh bila oštarija ku je držal, ako se ne varan, Feđa Nikolnikov, a još niže je od sedandeseteh do danas restoran Zelengaj/Borik.
Zdola Borika je lučica Đeletićevo a pul brodogradilišta V. Lenca je još jedna s kun upravja ŠRK V. Lenac.
Tu, od lučice V. Lenac, je bila storena žičara skun se je prehićevala ruda z brodi do fabrike kade se ju je talilo va olovo. Ta fabrika se je zvala Plumbum i po njoj je ov del Pećin dobil ime. Talionica je storena 1913. a potla Prvega rata je delala do 1931. kad je finila va stečaje. Ta nekadanja talionica pretvorena je va skladišta pa talijansku kasarnu da bi 1948. va nju z današnje Ružićeve ulice došlo mićo poduzeće ko je delalo remonte, dizalice i imelo ljevaonicu. To poduzeće se je zvalo Vulkan i otada je počela lepa priča o Vulkane kade je, va najboje vreme, delalo i 1.000 delavci. 2000. je Vulkan finil va stečaje a va njegove zgrade ustala je firma Vulkan-Nova ka nastavja delat, puno manje, ono ča je i Vulkan prvo delal al su došli i novi sadržaji kot ča je teretana, hostel, igraonica... Hiti delo na igru!
Zdola nekadanjega Vulkana je del Pećin kega zovu Cirkul. Pul njega je storen lepi park nazvan po antifašističken borce Nikotu Katunare. Va parke je dečje igralište a 1980. tu je postavna vela skulptura lanterne od kamika ku je va znak prijatelstva Reke poklonil japanski grad Kawasaki.
Sad se vrnimo na ono križanje ulic 13. divizije i Kamove i homo po Kamove pomalićo nazad, prama centre Reki.
Lepo je videt neboder od Vulkana ki je storen 1972. po prijekte Ninoslava Kučana.
Tristotinjak metar daje su jedni beli skalini po keh se pride drito pred Tower center - raj za potrošit soldi.
Od teh skalini 700-800 metar pasat je Dom Crvenega križa. Ta zgrada je storena pred Drugi rat kot Dom Jadranske straže. Jadranska straža je bila organizacija nastala 1922. va Splite sa zadaćun da stori boju klimu prama more, da ga se poštuje i voli. Va to vreme se prama moru, zgjeda, ni jako marilo ča ni niš čudno aš da je ondanji precednik vlade Nikola Pašić o more rekal ovo: - Jebeš vodu koju ni konj ne pije!
Uglavno, ta organizacija je tuliko narasla da je pred rat imela oko 180.000 člani i bila najveća va Krajevine. Izdavali su časopis, storili brod Jadran ki još plovi i ovakovi domi za mlade va keh su se družili i vadili plavat, veslat... i volet more.  Prišal je Drugi rat, domi su ostali a ovega na Pećinah je 1953. prezel Crveni križ i od onda ga koriste. 1971. je dignjen još jedan kat i konpletno je srejen. Kad san neki dan onuda paseval pred njin je bilo fanj mladeh tako da je opet na sličnen zadatke - da se mlade va njemu vadi dobre stvari.
Evo, ste videli da Pećine nisu samo kupališta leh puno, puno više od tega. Nisan niš napisal od zatvora kade je neko vreme bil zaprt Tito, o željezničkoj stanice Sušak - Pećine, o Biljani, o vile Ružić, o Odonu von Horvathu...  To san pustil van da i vi malo šećete, gledate, čitate pa i neč napišite.

[milić]

Evo, cijenjeno dtuštvance da ne bi bilo da niste znali.
 Nema grickalica, samo cuca (bela i črna a i bezbojna).