Zač...

[milić]

Zač je lepo Banderovo

Kada se spametin Banderova ja ne pomislin na salezijansku crekvu, ka je nekemu na Podmurvicah a nekemu na Banderovu, ni na Tehničku školu va ku san četira leta šal a bome ni na faks va kega san šal još više let. Zmislin se na oštariju! Na oštariju ka  se je zvala Banderovo i nju nisi mogal, kot ovo prvo nabrojeno, smestit va Podmurvice al Mlaku. To je bila oštarija va ku smo kot školani retko zahajali al kad bimo pobegli z kakove matematike al ča sličnega tamo smo lepo marendali (popularna su bila plućica na kiselo) i popili biricu al gemišt kot pravi, veli judi. Moje kolege ki su kašneje šli studirat na Tehnički faks su mi povedali da su tamo znali bit pravi turniri va preferansu aš da je to prava inženjerska igra. I, da ne pozabin, tu oštariju smo zvali Dva fažola i bila je prava, kakoveh već ni. Stoli pokriveni z stolnjakon na crveni i beli kvadratići.
Ov del Reki se prozval Banderovo fanj kasno. Gospa Ekl piše da je to prvi put videt na karte iz 1851. leta. Kopiju te karte, malo skresanu al se lepo vidi ime Banderovo a i Štranga, me par iman i ja. Taj del Reke nekada se je zval Musunišće a okolo su bili deli Štranga, Cecilinovo, Pod Pinjol, Nad Lazaret, Anderlovac, Šumber, Dolci pul potoka i Podmurvice.
Kako je Banderovo dobilo ime se jušto ne zna ma najveć puti se napisalo da je ime prišlo po banu Josipu Jelačiću. Med dva rata ov del, recimo okolo današnje ulice Corada Iliassicha, se je zval Monte Grappa. To ime, ta Grappa me vavek zmisli na bivšega prijatela ki je jedanput bil va Talije zarad dela. Va jednen bariće da je tel popit rakiju, ma duplu aš mu je "normalna" premića, pa da je ovako naručil:
- Prego una grapa due skosi!
Danaska judi ki tu bivaju fanj let Banderovo dele uglavno na tri deli: Montegrapa, Montenero i Smućeni breg.
Banderovo je na jako lepoj pozicije, na jednen brežiće z kega je, da ni veleh kuć, lepo videt more i prama Reke. Na njemu su storene lepe kući na više podi ma je i fanj oneh mićeh, prizemneh - praveh delavskeh. Kada san užal pasat tuda činilo mi se je kot da san va trejseteh let pasanega stoleća.
Od palaci, ki su mane interesantni, tuka su bivša kasarna regimente baruna Jelačića i sirotište braće Branchetta a i o imenu ulice Franje Kresnika bi rabilo napisat par besed.
Kasarna je storena 1912. a vojska ju je počela koristit 21. maja, pred sam Prvi rat. Interesantno je da ju je, potla ča je plaćena 1.337.718 krun, prezel grad Reka. Va to vreme načelnik Reki je bil dr. Francesco Vio. Z te kasarne su mnogi mladići šli va smrt po Soče, Galicije, Karpateh... Kada je Talija dobila Reku kasarna je nazvana po Armandotu Diazu, talijanskemu maršalu z Prvega rata. Va njoj je bival 26. pešački puk Bergamo na atrese via fratelli Branchetta 52. Kad je počel Drugi rat otuda su Talijani pošijali naše jude, ki jin nisu bili po voje, po logoreh po soj Talije. Med njimi i mojga nonota Fileta ki je finil otuda preko Kopra va logor Istonio Marina 23. aprila 42.
Va rate je bonbardirana i nastradala je kuća va koj je bila komanda. Ta kuća je, onako razbijena, stala tako a va njoj su i ljudi bivali ki su prišli v Reku delat. Tu zbonbardanu kuću da su zvali Holivud. Holivud je zasen zrušen najkašneje 1969. aš ga se ja ne zmišjan. Zada Holivuda je bil jedan parkić z fontanun kega su zvali Rumen. Sedandeseteh je va zgrade prama zapade bila Tehnička škola i Ekonomski fakultet a va istočnoj zgrade je bil Strojarsko-brodograđevni fakultet ki se od 1973. zove Tehnički fakultet. Va zgrade kade je bila Tehnička škola potla selenja, preimenovanja, promene školskeh modeli i čega se ne je opet škola za tehničari i opet se zove Tehnička škola. Va zgrade je sadahna još i Veleučilište.
Ubožnica braće Branchetta je palac ki je danaska poznat kot Medicinski fakultet. Storen je 1908. leta po nacrte rečkega arhitekta Carlota Pergolija a imel je mesta za prijet 70 muškeh i isto tuliko ženskeh siromašići kot i 30 muške i 30 ženske dece. Ubožnica se zvala Braća Branchetta (Fratelli Branchetta) po braće Giacomotu, Constantinotu i Antoniotu Branchetta aš su (ova dva zadnja) dali soldi za storit ta palac va ken će se smestit siromahi Reke. Se to je delano kako bi se mogla proširit bolnica Svetega Duha pul ke su dotada bili siromahi. Potla rata, kuliko san čul, tu je bil dom za starci a od 1955. tuka je Medicinski fakultet.Tu san fanj puti bil još dok je žena studirala a i kašneje kada je bila na postdiplomsken studije.
Ča se tiče imena ulice o koj san tel neč napisat to je ulica Franjota Kresnika. Ki je bil Franjo Kresnik? On je po zanimanje bil duhtor opće praksi a po jubavi violinist. Sost violinu da je vadil v Reke i Genove. Ma on je violine volel tuliko da ni otel samo sost na njih leh jih i delat. A za to je rabilo puno znanja ko se je moglo dobit samo tamo kade su bile najboje radijone va keh jih se je delalo - va Cremone. Proučeval je violine vrhunskeh majstri kot ča su bili Antonio Stradivari i Giuseppe Guarneri del Gosú. Kada jih je dobro proučil počel jih je delat. Govore da mu je to šlo fanj od ruki. Zato i će 6. decenbra 2019. otpret izložbu va rečkemu povjesnen muzeje njemu va čast. Duhtor Kresnik je rojen 1869. leta va Beče a umrl je 1943. v Reke i zakopan je na trsatskemu grobju. 
Evo, tuliko o Banderovu ko je mane jako lepo i drago a najlepji su tamo judi, pogotovo jedna ženskica.

[milić]

Zač ja Potok pametin po tete S.

Potok, kot del Reki, je ime dobil po jednen potoke kega su judi nazvali jušto Potok. Danaska mu još dodaju škurinjski da se zna skud teče, pa ga se više zovu Škurinjski potok. Njega, na dele ki teče po Potoke, ni videt aš su ga pokrili trejseteh let pasanega stoleća. Nekada se va more zleval va  Mandraće, pul nekadašnjega lazareta a odkada je nasuta obala zarad luki i njigov tok se je produžil pa se sada zleva va more do Budimpeštanskega mola.
Ime tega potoka Vanda Ekl nahaja va katastarske mape Plas z 1841. leta. Tuka piše (po talijanski) Torrente di Scurigna Piovano. Al još 1582. va jednen dokumente na "trden hrvacken" piše da je "omeiach" (umejak) Gašpara Knežića pul "fossa del potoch" (kanala od potoka).
Da nisu Mađari storili luku danaska bi bila Krešimirova ulica pul more a ovako je stotinjak metri od njega. E, onputa dok ni bilo ovakove luki, na meste kade se je Potok zleval va more je bil jedan mandrać pul kega su se veževale barke. One bi pripejale va lazaret mornari z brodi ki su prišli va rečku luku z kraji kade su bile zarazne boli. Luka je još bila na ušće starega toka Rečini tako da je lazaret bil dosti  daje. Lazaret je bil storen 1726. a piše da je to platil sam cesar Karlo VI. I to je bilo vreme kad se je v Reke se počelo menjat. Tada je počel jači razvitak Reki aš ju je, kot i Trst, ta isti cesar 1719. proglasil za slobodnu luku. To je privuklo trgovci z razneh deli Evropi ki su videli priliku za dobar dobičak. Tako je 1752. holandska kompanija Arnoldt & Co. počela zidat rafineriju za cukar ka je finjena do 1755. leta. Kad je finjen palac va ken je bila uprava da je zgjedal kot dvor a ne fabrika nač su mnogi puhali. Rafinerija za cukar delala je do 1826. pa je neko vreme tu bila kasarna za vojsku a od 1851. je bila fabrika od tabaka al Palt, kako su ju domaći judi zvali. Va njoj je delalo i do 2.600 delavci, najveć ženskeh z ovega kraja ke su zvali paltarice. Nisan znal od kuda naziv Palt a onda mi je prijatel C. rekal da je ime ustvari skraćeno od Appalto Tabbacchi kako se je fabrika zvala. Eko i to smo doznali pa moremo poć daje. Potla rata tu je do 1998. bila jaka fabrika Rikard Benčić ka je delala manji brodski propeleri i opremu za brodi a i deli za bosch punpi. Preseljena je na Kukujanovo a od tamo je šla fuć. Sada se zgrade nekadašnjega Benčića urejuju i va sakoj će bit neč ča se tiče kulturi - muzeji, knjižnice...
 Kolodvor je još jedna interesantna zgrada na Potoke. Storen je 1891. i za ono vreme i broj stanovniki Reke je bil više nego lep za videt za razliku kako danaska zgjeda. Storen je po projekte mađarskega  inženjera Ferenca Pfaffa. Tuka san fanj puti čekal vlak al šnjin šal najveć va Ljubljanu al Bistrc kada je žena tamo delala. Onda (na početke osandeseteh) je prama Ljubljane šlo morda i deset vlaki a danaska ne moreš va Ljubljanu poć i neč odbavit pa se vrnut isti dan.
Bolnica ku ja pametin kot Bolnicu braće dr. Sobol, je još jedna zgrada ka ima ča povedat. Storena je 1857. leta po projekte inženjerskega bojmika V. Paradowskog v. Koraba i znamo da je tu bila austrougarska Mornarička akademija neprekinuto od 1866. do 1914. kad se preselila va Beč. Z nje su shajali oficiri za marinu med kemi je bilo jako sposobneh i poznateh. Dva od teh sposobneh su bili Janko Vuković - Podkapelski, za kega san čul a za Slovenca Antona Hausa, ki da je bil jedini veli admiral (to mu je bil čin!) va celoj monarhije, nisan nikad čul. A sigur san da znan ki je najpopularneji oficir  ki je finil rečku Akademiju. To je sakako kapetan na podmornicah Georg von Trapp po čigoven živjenje je storen film Moje pjesme moji snovi.
A sada - slašćica! Do pred par let nisan znal da je v Reke bila Modiano radijona - tiskarna karat s kemi se igra na briškulu i trešetu. A je! Bila je na Potoke va velen palace ki je na križanje današnjeh ulic Nikole Cara i Rikarda Katalinića Jeretova. Tuka, va suterene je bila tiskarna va koj su se tiskale karte ma i druge stvari kot ča su plakati i slično. Palac je storen 1913. po nacrteh Emilijota i Marijota Ambrosinija. O temu je bila 2013. izložba va Kortile, a pisal je i Novi list.
Kad malo staneš, pogjedaš i razmisliš kuliko je v Reke, al drž'mo se samo Potoka, palac ki bi imeli ča reć o sebe. Tuka je još i bivša Medicinska škola a sada Fakultet zdravstveneh studij, pa one lepe zgrade na početke ulice Nikole Tesle pa... Ma neću već nabrajat lih samo još jedan parkić ću spomenut. To je park ki je dobil ime po duhtoru Vinkotu Frančiškoviću, čoveku ki je prvi va Hrvatskoj a drugi va Jugoslavije 1971. uspešno storil transplantaciju bubreha. Saki put kad gren kroz ta parkić zastanen pa pomislin ča bi bilo s manun da ni bilo njega. Ovako već trejsetak let moren pisat ovakove pričice.
Al mane se te zgrade, si ti palaci, sa ta lepota ne moru potrt z pameti jednu žensku kad god se spametin Potoka. To je teta S. mat mojga dragega prijatela V. Njihova familija je bivala na Potoke va trećemajsken stane a naša trajba je rado h njin prihajala. Tuka smo, kad god bi prišli, lepo dočekani a i vavek je bilo ča za pojist, ako niš drugo onputa cikulade, lešniki, orehi... A i za popit, najveć puti, ruske vodke, zapametil san joj i ime, Stolichnaye. A teta S. bi lih z kuhinji zazijala: - Milić ću ti jedan šnicel storit!?
Pa ćeš ti pametit palaci a ne ovakovi judi...

[milić]

Zač je Belveder a ne Vozrinj

Danaska homo malo prošećat po Belvedere. I to va društve aš me je strah da se ne zgubin kuliko slabo poznan Belveder. Skoro da niman poč poć tamo. Još da mi ni moje drage zubarice A. nebin ni ovoliko put bil gore koliko san do sada. Belveder i Kozala su mi nekako van ruki. Onisti ki tamo žive al su živeli hvale ga na puna usta. Tr ni ni čudo aš i samo ime Belvedera je nastalo aš da se od tamo lepo vidi. A to, ča se tiče imena, naš Ivo Grohovac siguro ni mogal zarad njega spat na mire. Ovako on piše: "Puno puti čujemo i čitamo besedi "Belveder" i "Belvedere". Tako su neprijateli našega imena prozvali onaj del dolnje Kozale ki se prostire od stare Harmice do nad Rastočine." Pa nastavja " O ten Belvederu nisu stari judi keh mi pametimo niš znali povedat... leh je bil Vozrinj." Eko kako naš Ive špota imena ka zahićevaju stara. Ma kuliko god se on jadil to je tako pa bog.
Kad malo pomislin ča je na Belvedere osim moje zubarice, zajno se domislin nogometnega igrališta ko smo nekada zvali Omladinsko a 1936. kad je storeno je bilo Campo Cellini. Danaska se pak zove SRC Belveder. Tisti centar od 2004. ima igralište pokriveno s falsu travu a veliko je tuliko da se na njemu moru igrat utakmice po FIFA-ineh pravil. Pul njega je i dvorana.
Na Belvedere je zgrada Državne mađarske kraljevske pomorske akademije ka je 1903 storena po nacrte Samuela Pecza. Nekada ju je koristil Filozofski fakultet a od 2015. va njoj je prva riječka Katolička osnovna škola Josip Pavlišić. Belveder se more dičit i z Hospicijen Marija Krucifiksa Kozulić otprten 2013. a ki je bil prvi va Hrvatske. On je sakako bil za potrebu našemu gradu aš takove bolnike bolnice ne moru držat a familije ne znaju ča ni kamo šnjimi.
Pravi timbar, lepotu ovemu delu grada dava zgrada bivše place na onen velen križanju ulic Laginjine, Tizijanove i Baštijanove. Jako lepo zgleda a kako je storena za vreme fašizma (1933. leta - Anno XI) zalepili su joj da sliči na Mussolinija. Ubijte me ma ja to ne vidin! Već dugo tu ni place a ovako lepa prez glavne uloge je jušto zgubjena va oven munjenen vremene.
Još jedna zgrada je interesantna zarad tega kako
zgleda. To je Casa Civica (građanska kuća) ku popularno zovu Casa Nave (kuća brod). Napravna je 1937. prama projekte poznatega arhitekta Nereota Baccija a ulica va ke je ona danaska se zove Laginjina.
Na kraje - najslaje! Kampeto al "po domaću" - Campetto. Campeto je ime dobil po mićemu igralištu aš za Talijane je campo, med drugen, igralište. Campo su zvali ono velo igralište - Omladinsko a onda je storeno ono manje kega su judi nazvali campetto (mićo igralište). To mićo igralište je storeno na terene kade je do tada bil zarazni odjel rečke bolnice Sveti Duh. Kako se je bolnica va to vreme pomalo selila va nekadanju Mornaričku akademiju (kade je i dandanas) to su ta del bilnice zrušili i storili igralište. Već je tu oko igrališt bilo kuć a najinteresantneje su one od narančasteh opuk zazidaneh još 1892. leta. To su kući na dva poda z četiri stani od po sto kvadrati a storeno je šest takoveh kuć. Te kuće su bile storene za delavci od strani Radničkega društva i siguro su med prvemi v Reke ke moremo smestit med, recimo tako, socijalne kuće.
Belveder je del grada va ken se judi žale da nimaju anbulante, pošti, banki, buteg,... a opeta, se jin je to dosta blizu aš su "na pedaj" od grada. Kuliko san čul, najveći problem je mesto za avuti parkirat. Ma to ni niš novega aš i drugi deli grada, ki su bliže centre, imaju takov problem.
A kakov je odnos mane i Belvedera? Čini mi se da mi se je plonba na dvojke desno stanjila pa bin moral poć do A. pardon do hćere joj aš je A. šla va penziju me par.

[milić]

Zač trebe doć na Kozalu

Del Reki ki je na jednen strmce, na severnoj strane od Starega grada zovemo Kozala. Va pasanen vremene bil je lepo obdelan i zasajen z ružami i ulikami a tuka da je živelo i najveć judi zvan gradskeh zidi. Gospodar tega grunta najveć da je bila crekva i neki njeji redi a bilo je i nekuliko privatneh vlasniki. Med njimi se moru nać i neki brati Tome i Jakov Sebelja ki bi mogli bit pretki mojoj matere aš se to prezime održalo najveć va Studene.
Ime Kozala je fanj staro aš gospa Ekl piše da se je prvi put spomenulo još 1438. leta, doduše kot Coxala. Na internetskeh stranicah od Grada Reki pod MO Kozala je lep pregled pasanega vremena Kozale, važnejeh kuć i sega nečega o njoj. Tuka su i stara imena deli nekadanje podopćine Kozale pa da se ne pozabe najboje jih je i uvdeka prepisat. To je šjor Marijan Matković ovako, po lete zapiševanja, popisal: 1438. - Goljak, Kozala i Rastočine, 1448. – Brdo, 1449. – Krasa, 1458. – Klibac, 1524. – Sv. Katarina, 1546. – Dražica, 1567. – Žakalj, 1572. – Pulac, Zvir, 1594. – Leha, 1676.- Kalvarija, 1778. – Mikačeva Draga, Zvezda, 1787.- Loza, Mandrija, 1784. – Belveder, 1793. - Beleni, 1803. - Prezid, Skadanj, 1840. – Brašćine, Breno, Gaj, Gobino, Kalić, Kapitanovo, Kruševo, Ledine, Morićevo, Padež, Sebastijansko, Vozrinj, Vrtača, Žlebi, 1842. – Krasica, Pod Bući, Preko, Rošići i 1858. – Podbadanj.
Iskal san zač se Kozala tako zove ma nisan niš našal. Mane to diši na kozu a sad je to tako vranić će ga znat.
Prva misal, kad ki spomene Kozalu, mi je - grobje. Za kozalsko grobje govore da je med najstarejemi na oveh prostori. Grobje da je po regule počelo delat 1838. a pokojne ke se na njemu zakopalo da se je počelo zapiševat od 1872. leta. Za to grobje govore da je lepo a mane nijedno grobje ni lepo aš se ja na njimi ne ćutin lepo. A isto tako mi se probudi jad kad vidin kuliki soldi su potrošeni da bi se storila grobnica ka će veličat nekega ki je storil ovo al ono. Kot da ga samo delo, ako je neč velo i dobro, neće veličat. Aš si ćemo, kako reku Fijumani - Andar da Luković, ča bi se reklo po domaće - si ćemo poć Lukoviću ki da je nekad bil čuvar na grobju.
Do grobja je crekva. Osim ča je lepa i zdugega se vidi (63 metri visoka!) ona smrdi na jedan režim ki je va vreme njejga zidanja stupal po Reke. Crekva je dobila ime sv. Romualda i seh sveteh a storena je 1934. po dišenju Brunota Anghebena. Crekva je narasla znad  kosturnice ka je pod zemju. Va njoj su spravne kosti D'Annunzijeveh arditi z borbi za Reku ma i drugeh talijanskeh soldati ki su poginuli va Prven rate a i kašneje paleh fašisti. Kosturnica je otprta na 16 marča 1930. a se to su, med drugemi, financirali Mussolini i neki tvorničar z Milana Borletti. Taj Borletti je, valda zarad tega, postal počasni građanin Reki a po njegovemu ocu je crekva dobila i ime sv. Romualda.
Ma pušćajmo mi na mire i crekvu i grobje i ćapajmo se lepjeh stvari kot ča je recimo Dom mladeh. To je stvarno dom mnogen mladen aš, kuliko san čul, se va njin ćute kuntenti. Dom je na današnjpj atrese Laginjina 15 a pred pedesetak let kad je otprt bil je va ulice Maksima Gorkega isto na broje 15. Va to vreme se je zval Dom pionira Ivo Lola Ribar. Kuću, pul ke je lep parkić i storene su staze, je projektiral Giovanni Rubinich ne znan kega leta. Tuka su se školska dečica vadila vozit na biciklete, sost armoniku, slikat s fotoaparaton i sa snimjenega filma delat sliki, sost na gitare, kantat, plesat ... Divojčice da su se vadile krojit i šit a dečki su vozili miće autiće, karting su jih zvali, čigovi motorići su bili od popularne koparske fabriki Tomos. Najveć da su decu vadili drugovi, kako se onda govorilo učitelon, Rajmond Hrovat ki je vadil decu sost na armonike i Jakov Ključarić ki da je vodil foto sekciju. A i domar Franc da je bil pravi čovek. Verujen da i danaska deca tamo veselo hode i da će i ona za pedesetak let s tuliko jubavi povedat o temu ča su tuka vadili kot ona z šezdeseteh i sedandeseteh danaska.
Još jedna kuća je mane jako interesantna. To je kuća na atrese Volčićev trg 2 va koj je danaska Mjesni odbor Kozala. Ta kuća je storena po nacrteh od Enea Peruginija va vreme kad i kozalska crekav. To je bil društveni dom čigovo je puno ime bilo Circolo Rionale Partito Naziomale Fascista Cosala a naručila ga je bila Federazione dei Fasci di Combattimento. Kratko i jasno rečeno - Dom od fašisti na Kozale. Potla rata do 1949. va Kulturnen dome, kako se je onputa zvala kuća, je bila Radio Reka. Interesantno je da i danaska mnogi za tu zgradu reku Radio Stanica.
Mane i Kozalu povežuju leh sprogodi i još neč. To neč je tuliko važno va mojen živjenje da ga moran spomenut. To neč su prijatelice i prijateli ki su s Kozali al ke san upoznal na Kozale. Na Kozale biva jedna draga prijatelica M. i va njejoj kuće san na prven druženje z člani Udruge 051 upoznal judi ki jako slično razmišjaju i žive kot i ja. Proučavaju pasano, sadašnjo i budućo vreme Reki i okolice i o temu pišu, delaju izložbi, snimaju filmi... Mnogi od njih su mi postali ne samo kolege na isten pute leh puno, puno više od tega. Postali su mi pravi, iskreni prijateli. A to je, priznajte, više od seh spomeniki ke je storil Rendić na kozalskemu cimiteru.

[milić]

Zač je Školjić nekada bil industrijska zona Reki

Školjić se je smestil s desne strani Rečini, kot da je znal da nikad neće bit žejan. Sunca i rodne zemji je bilo pa lahko morete zamislit kuliko je tu nekad bilo vrti ki su bogato rajali. Zato ni niš čudno da su Rimjani blizu storili Principij. Zdrava voda z Gromišćini a verduri kuliko ćeš. Piše va knjigah da se je Rečina zlevala va more spod Trsatskega brega ča znači da je od onda više od kilometra produjila svoj tok. Rečina ni od čera a prama onoj - tiha voda brege dere je Rečina malo-pomalo nanašala mel i drugi matrijal i sebe delala mesta va ka se je malo očešala prvo lego ča je zašla va more. Ta mesta su bila, za pravo reć, ade ma kako Rečina ni Dunav to su bili naši otočići al škojići od keh je jedan bil najveći i on je nazvan Školjić. I evo, tako je nastalo ime Školjić al po talijanski Scoglietto.
Od Školjića je bil put kraj Rečini na koj su bili malini pak su ga nazvali Via del Molini. Matija Bartolić 1861. leta je bil jako protiv tega aš " ... to se je zvalo, zove se i zvat će se Sinac." Via del Molini je promenila ime va Via del Acquedotto al Vodovodnu ulicu kako se i danaska zove a na Sinac se je pozabilo.
A Vodovodna ulica se ne zove tako prez vezi. Zove se tako aš peja drito do vodovoda, do mesta od kuda se je napajala cela nekadanja Reka pa i Sušak dok ni i tamo 1913. storen vodovod. Ov rečki Zvir nikada ne presuši pa se je z njega odvavek zimala voda a 1894. je storena i vela kuća va koj su pumpe ke su sisale i tirale vodu čez tuba do sake kuće va tadanjoj Reke. I danaska od tuda Reka dobija vodu.
Voda z Rečini je ta ka dava i struju aš je na kraju Vodovodne ulice hidroelektrana Rijeka ka dava struju od 1968. leta.   
Nekada je tu bila i termoelektrana za ku je upravnu zgradu (storenu 1909.) projektiral Giovanni Rubinich. Ternoelektranu je poganjal oganj od smet ke su gorele va Spalionice za smeti. Spalionica je storena 1905. leta po dišenje firmi Alphons Custodis z Beča, a malićo da je nacrt prečinil arhitekt Giovanni Randich. Tu struju z termoelektrani su koristile Klaonica i  pumpe va Zviru.
Od 1907. pul Rečini je klaonica napravna po nacrteh od Tehničkega ureda grada Reki ke da je malo prečinil Carlo Pergoli.
Na početke današnje Vodovodne je bila fabrika za predelevat kožu a gospodar joj je bil Gjuro Ružić.
Na kartah z 19. stoleća more se videt da je na meste kade je danaska Autotrolej bil lep park dug okolo 300 metri. Opisal ga je Dragutin Hirc 1891. va knjige Hrvatsko primorje: "Drveće poraslo je tu u četiri reda: u dva reda zasađeni su omašnji kostanji, a u dva visoke platane." Zmišjan se da san negdere videl sliku al grafiku ulaza va park ma ju već ne moren nać. Na ulaze su bili dva stupi od kamika a med njimi su bila vrata od kovanega železa. Park se je zatrl 1899. leta kada je Reka dobila letrični tranvaj pak su va parke storene garaže.
Pul Aurotroleja je i nekadanji bazen ki je potla veleh muk otprt 1963. a storilo ga je poduzeće Primorje. Nekuliko puti san se i okupal va njemu a već dugo vremena stoji napušćen, kot gracka sramota a bilo bi jako dobro da se uredi, magari za rehabilitaciju bolneh kako je bilo pisalo.
Današnje Narodno učilište je va nekadanjoj kasarne ku su storili za vreme Austrougarske za ugarski domobrani va ke su regrutirani i rečki dečki. Kako Mađari za vojsku/domobrani reku honved to su i kasarnu zvali Caserma degli Honved. Kasarna je storena po nacrteh arhitekta Ugota Pegana i se do 1955. bila je zgrada za potrebi od vojski seh kolori a onda je počelo va njoj delat Narodmo sveučilište.
Pred današnjen Narodnen učilišten nekada je bilo perilo. Tuka su ženskice prale robu a Grohovčeva ulica se zarad perila zvala Via del Lavatoio. Drugo perilo je bilo med moston od železnice i kupališćen Bagno Ilone. Bagno Ilone je bilo javno kupališće kade su se judi mogli onako lepo oprat aš onda ni bilo po seh kućah banja a neke nisu imele ni vodi. Pred Drugi rat je promenjeno ime va Bagno Eneo (Eneo je po talijanski Rečina).
Kade je danaska parkirališće na Školjiće pedeseteh let pasanega stoleća bilo je dečje igralište, ono z  toboganon, cimbujami, klackalicun... Tega se ja još domišjan. Onputa, pametin kraj sedandeseteh, je tu bila stanica od kuda su kurjere Autotroleja pejale za Gromišćinu i prama istočnemu delu nekadanje vele rečke općini.
Osim tega ča san se par put okupal va bazene i dosti puti dopejal mojga dragega prijatela i trećemajskega kolegu B. na kurjeru ni me niš jako veževalo za Školjić. A je, je, sad san se domislel! Fanj puti san bil na predavanjeh va Radničken aš san 76. bil upisal Fakultet za vanjsku trgovinu va Zagrebe pa smo tuka imeli predavanja i neke ispite. Kratko je to trajalo aš je trebalo sako tuliko poć na ispit va Zagreb a to je bil veli štrapac.
Sadahna, kad malo razmislin i se ovo napisano poslažen, je videt da je Školjić krcat s važnemi kućami, fabrikami, dogajanji... A nisan ni spomenul da su tu nekada bila dva potočića ki su sadahna skriveni, Mrtvi kanal, mosti... Zanimljiv kvart, ča ne?

[milić]

Zač Brajda ni već brajda

Nekada je Reka, kot saki pravi grad, bila ograjena z visoken zidon va ken su bile storene tvrđave kako bi se mogla obranit od sakakoveh neprijateli onega vremena kot ča su bili Mlečani al Turki. Del, ki je bil zvan zida na zapadnu stran, se je zval Brajda aš je bil zasajen z ružami a i ulikami.
Po ten imene nazvali su Rečani i potok ki je zviral pul križanja današnjeh ulic F. la Guardijeve i Manzonijeve. Tisti potok je bil kratak (okolo 300 metri dug) ma jako moćan i važan za Reku i Rečane. On je s vodun hranil jude ki su tu živeli (keh i ni bilo bogznača) al i malin na njemu. Po ten malinu se je i današnja Manzonijeva ulica zvala via del Malino. Morda je još važneji bil potok Brajda za osnutak tvornice cukra 1750. leta a za ženskice, ke su va familije bile zadužene za prat robu, najvažneji je bil aš je na njemu od kraja 19. stoleća do 1939. bilo perilo. Ono postoji još i danaska pul nekadanje picerije Viktorije ma normalno da već ni va funkcije. Na oven dele grada, pul današnje Krešimirove bilo je još jedno perilo Beli kamik (Sasso bianco) najveć za potrebi gracke bolnice Svetega duha ka je bila gore, s desne strani križanja današnjeh ulic F. la Guardije i Ciottine kad se gre prama gore. To perilo je vodu dobivalo z izvora ki se zove  jednako - Beli kamik. To perilo, kot i fontana pul njega, je zrušeno 1913. aš da smeta širenju cesti a i da je slabo korišćeno. Te potoke danaska ni videt aš su jin korita pokrivena.
Ča gre čovek bliže centre grada, a to je sakako Stari grad, to je se više važnejeh, lepšeh palaci a i se manje se vide i ćute nepostojeće granice deli grada.
Jedan od najlepšeh palac v Reke po mane je placa na Brajde ka je storena kako bi se pučanstve na oven dele grada storila lagja opskrba s hranun. Storena je 1896. leta po projekte Giacomota Zammatiota. Zamišjena je da nutre budu razni sadržaji a vane, na velen trge za rečke prilike, da bude placa na otprten. Više puti je obnavljana a zadnji put 2013. al su joj sejno uspeli očuvat glavni detalji kot ča su opuke na facade, figure od kamika, kovana bravarija... Se je manja potreba za placami i rabilo bi sest i dobro promislet ča daje z ovun lepoticu. 
Va današnjoj Krešimirovoj ulice ka se je nekada zvala Corsia Deak 1874. Albert Gschaider (hm, nekako mi se čini da ov ni z Marčeji) otprl je Hotel de la Ville.  Zapametil san taj hotel aš san negdere pročital da je va njemu prespal neki Klanjac Sušnik. To je bil veli hotel sa 120 kamar a imel je i kavanu, restoran, pivnicu i veli tarac pul cesti. Već, ča ja znan, pedesetak let je va prizemje studentski restoran Index. Zame ta restoran niš ni značil aš san bil na maminoj košte so vreme mojga školovanja a i dobar del živjenja al ga pametin aš su mnogi moji prijateli ki su v Reke studirali pa i još za vreme srednje školi va njemu jili. Nekad su bili zadovojni, nekada ne al su tanto preživeli na studentskoj menze.
Z druge strani Krešimirove je sedandeseteh let 20. stoleća (ulica se onda zvala Borisa Kidriča) bil Dom željezničari va ken smo kot dečki od dvajsetak let užali igrat na boćini. Jedna od igar s temi mićemi boćami na biljarsken stole bila je karanbol, ma da me ubiješ ne bin znal objasnit pravila. Valda zato aš san bil slab va temu za razliku od jednega, nažalost pokojnega, prijatela M. ki je bil pravi šampijon va ten.
Pul samu prugu je, mislin da se i dandanas tako zove, Sindikalni dom Franjo Belulović, va ken sam pred Domovinski rat bil na par predavanj a danas pojma niman o čemu i zač. I tu je bil hotel od sedandeseteh let 19. stoleća ki se je zval, kot i cela ta ulica, po mađarskemu političare Ferencu Deaku. Interesantno je pratit kako su se menjala imena temu hotelu a z njih se more pročitat i politička situacija v Reke. Najprvo se je hotel zval Deak. 1918. (ode AU monarhija!) promenil je ime va Excelsior. 1918. (amerikanski precjednik želi da Reka bude država) menja ime va Wilson, a kad Wilsonova ideja pada va vodu postaje Orlando. Ni to ni dugo duralo aš kad je D'Annunzio z svojemi arditi zauzel Reku hotel opeta menja ime va, ma zamislite, Hotel D'Annunzio. Kada su Gabrijela recimo potirali z Reki opet hotel dobiva politički neutralno ime Excelsior. Potla rata tu se je smestil sindikat.
Preko štreke ov put nećemo pasat, pušćat ćemo to za ki dtugi put. Homo mi malićo nazad pa po uličice Beli Kamik zgoru.
Kad dojdeš na vrh te uličice na desnu stran je, već spomenjena, danaska nepostojeća bolnica Svetega duha. Otuda, ako pogledaš prama današnjoj ulice Pomerio, nećeš videt još jednu jako važnu zgradu ka je tu nekada bila. To je vela sinagoga storena 1903. prama nacrti mađarskega projektanta sinagog Lipóta Baumhorna. 1944. je zapajena a potla rata da je procenjeno kako se ne splati popravjat je pak da je prodana kot građevni matrijal.
Sad pasajmo preko cesti i pred vrati smo današnjega Pomorskega fakulteta. Sedandeseteh je to bila Viša pomorska škola (ViPŠ). Mnogi moj prijatel ju je finil a va spomenjeno vreme bilo je pet smjeri - nautički, strojarski, lučkotransportni, ekonomski i radijotelegrafski.
Daje po ulice je Ekonomska škola ka da je tu od 1946. a tu je fanj kašneje došal i Ekonomski fakultet z Banderova. Ma ta vela zgrada, kad je delana, ni bila namenjena za školane i studente lego za soldati. Kasarna baruna Jelačića storena je još 1858. leta po projekte Adama Olfa. Kasarna je jako vela i piše da je va ono vreme bila med najvećemi zgradami v Reke.
Se mislin ću tuka stavit Mići neboder aš mi se čini da mesto na ken je već ni Brajda al ki more reć do kuda je jušto Brajda. A Mići neboder je lep tako da je škoda ne napisat par besed o njemu. Po projekte Raoula (viš malo, i jedan trećemajac se tako zove a ne Raul kot neki drugi.) Puhalija storen je 1939. Stručnjaki ga hvale da je to pravi draguj moderne v Reke a za ono vreme stani va njemu su bili pravi luksuz aš su bili veli, imeli centralno grijanje i teplu vodu a bila su i dva lifta. Mane je to jedna od lepjeh zgrad i kad god okolo šećen z fotoaparaton ne moren a da ju ne slikan.
Brajda je puna sadržaji kot ča su škola, fakultet, Elektroprimorje, kafići... ki se prepliću va živjenje mnogeh Rečani a mane je baš po kafići Brajda najpoznateja. Od kad znan zase na Brajde je bil kafić Sport kega je najprvo držal M. ki je bil kumpar mojoj tete M. na ženidbe a kašneje njegov sin a moj dragi kolega i prijatel R. ki je finil brodogradnju i bil zajubjen va podmornice. Kafić je već desetak let zaprt, va njega je zašal Mlinar a R. da plovi. Ne dugo od Sporta je bil nekada poznati restoran pa picerija Viktorija ku je držal moj kujin I. al je i to već dugo zaprto a čini mi se da nutre ni niš.
Eko, odkada je se to zaprto ni videt ni mojga prijatela R. ni kujina I. a ja se reje tamo zahajan.

[milić]

Zač ni žabice na Žabice

Bila jednom jedna žaba, više siva nego plava... Tako nekako bi se moglo kantat o žabice ka da je bila na današnjen rečken trge Žabica. Ta žabica je kot himalajski Jeti - si znaju da postoji al ga niki ni videl.
Na Žabice je pred više od sto let bilo "parkirališće" za kola ka su vukli konji al voli. Furmani su od tamo kola pejali nakrcat al skrcat voz va luku al kamo drugamo. Se do pedeseteh let pasanega stoleća bilo je tako aš mi je ujac V. povedal da su tuka Kastavci, Ćići i Brkini pripejevali drva za prodat. Jedanput da su on i njigova mama zapejali vozić drv skroz do Žabice aš da na Podmurvicah nisu mogli prodat. Tu da jin je jedan Fijuman, kega ujac ni mogal nahvalit, prišal pak kad su se nagodili celi voz su mu zapejali doma, nekamo na Brajdu.
Tu na Žabice je bila voda, zvir kega su zvali, po te žabe ku ni videt, Žabica. Ž njega su se judi i blago napajali. Šjor Stražičić piše da je zvir Žabice pul al spod kapucinske crekve a kuda jušto teče ne zna se a morda da je tok spojen na kolektor za otpadne vodi.
Danas je Žabica najpoznateja po kolodvore za kurjere ke tamo nakrcaju al skrcaju putniki pa gredu daje. Prvo 150-ak let, se dok se ni nasulo more za današnju luku, tu si mogal doć leh hodeć al s barkun. Kuliko je tu kamiki i drugega matrijala nahitano! A ni bilo kamijoni leh se s koli al maonami pripejevalo. Kolodvor da ne zadovojava današnje potrebi modernega putnika pa se već 20-ak let dogovara i pregovara a najveć njurga aš daje od nacrti se ni movilo. Uglavno se zna da kolodvor seli stotinjak metri prama zapade va skladišta od železnice.
Na Žabice, ka se je prvo zvala Piazza Cesare Battisti, Piazza Zichy, Piazza del Commercio, a od 1946. Trg Žabica najlepje se vidi crekva od kapucini koj je pravo ime crekva Majke Božje Lurdske. Delana je po naputki kapucina  Bernardina Škrivanića ki je tel da crekva bude čin sličneja onoj va francusken Lurde. Delat su je počeli 1904. po dišenje Giovannija Marije Cureta. Crekva se teško delala aš ni bilo soldi pa su neki teli pomoć i na prevaru (Sveta Johanca). Crekva je uglavno dofinjena do stanja kot ča je danaska po nacrti Corneliota Budinicha 1929. Nikad ni postavan zvonik - svetionik ki je bil planiran.
Kapucini su interesantni i zarad tega ča su va današnjemu kine Croatia imeli štanpariju kade su, med drugen, štanpali Riječke novine, prvi hrvacki katolički dnevnik. Uredniki su bili jako mladi judi Petar Rogulja i Rudolf Eckert ki je zakopan na Trsate. Med rečkemi kapucini je kratko vreme bil sveti Leopold Mandić.
Upravna zgrada Luke, ka je blizu, je stareja od crekve.
Zgrada je storena 1885. po nacrteh Josipa Huberta. Va vreme kad je zgrada storena trg se je zval Piazza Zichy po mađarskemu političare grofu Agostonotu Zichyju. Kratko vreme je bil i guverner Reki al je brzo postal ministar trgovine ki je forciral pomorsku trgovinu. Zato se je, verovatno, i odlučilo storit ov palac va ken su bile se pomorske službi za Ugarsko-hrvacko primorje.
Još jedan palac, ma ča palac - palacina, je na Žabice. To je Ploechov palac. Storili su ga 1888. leta po projekte Giacomota Zammattija ki će još fanj palac po Reke projektirat. Palac da je bil kuća za bivat familije Ploech, keh da je bilo fanj (šest dece) ma opet... A on, ki je financiral ta palac je bil Annibale Ploech (1826. - 1884.) vrhunski precizni mehaničar ki je delil kolač od patenta za torpedo. Va te ekipe, ka je delila ta krvavi kolač, šnjin su još bili Whitehead, Lupis i Ciotta. Ploech da je imel jako mići del va sen ten a storil je ov veli palac. Moremo samo nagajat kuliko su pak ovi tri soldi zivukli. A je jedna intersantna stvar s ten palacon. Ako ste šli za ten, Annibale je umrl prvo lego je palac finjen. Pa ti delaj palaci...
Ma pušćajmo mi te ki imaju puno soldi da moru takovi palaci al crekve delat i homo malo bliže današnjen vremene.
Sedandeseteh je va kapucinsken konplekse, skroz na istočne strane bila slastičarna Dubravka va ku san s društvon užal poć na palačinke, a va Ploechoven palace, skroz zapadno, je bila kavana "R" na kate a va prizemje, me par, restoran. I tuka san užal doć čagod popit.
Ma od seh teh palaci, crekve, kolodvora mane je najlepje bilo va kine ko se je nekad zvalo Beograd a od 91. Croatia. Ajme kuliko san filmi tu pogledal! Pogotovo pred jedno desetak let skoro ni bilo dana da nisan bil tu. Ja i jedan rojeni Lokvarac smo valda i blagajnican na vrh glavi prišli. A dva put san i zaspal kuliko su filmi bili interesantni a jedanput san od jenega kanadskega filma pobegal aš to ni bilo za gledat. Ovako ćorav sel bin va prvi red partera na kantridu sedan al osan i užival. Najveć san volel pogledat evropske filmi - talijanske, češke, francuske al je bilo dobreh filmi i zvan Evropi npr. turskeh. Sadahna iman drugu zabavu pa mi kino skoro i ne pride na pamet.
Sada, dok san pisal o kinu, palo mi je na pamet da je pul kina podvožnjak. Zmišjan se kad je otprt a i tega kako mi se je prijatel A. hvalil i pokaževal hartu od kurjere ka je prva pasala kroz podvožnjak a on je bil va njoj. Kako piše V. Đekić va Moja Rijeka, planiralo se je storit most preko prugi još 1913. leta al prišal je rat pa brzo i drugi pak se ni arivalo. I potla rata se je to otelo rešit ma soldi nikad dosti a vreme je letelo. Onput da je došal veli dan za Reku - va luke se je otpiral silos (i tega se zmišjan aš je otac bil lučki radnik). Na otvorenje silosa 23. 11. 62. prišal je drug Tito. Otprl je silos, malo poćakulal i sel va auto aš ga je na kolodvore čekal Plavi vlak. Komać ča je šofer krenul morali su stat aš je rampa va Kidričevoj bila spušćena. Tito da se je jako razjadil i da je rekal da se to moglo već rešit. Komać onput su se odgovorni poahtali i počelo se delat projekt a potla i podvožnjak. Zarad tega ča je probijala voda bilo je veleh problemi delavcen  poduzeća Konstruktor ko je bilo glavni izvođač. Podvožnjak je tanto otprt, doduše ne na 25. maja za Dan mladosti kako je bilo planirano, leh 26. 6. 1967.
Mane je lepa Žabica i ovakova kakova je a još kad se kurjere maknu šnje bit će lepše videt i kapucinsku crekvu i palac Ploechoveh i si drugi palaci okolo nje.
I da se još sledić vrnen na ime Žabica. Moja je teorija da je tuka, prvo lego su to se zahitali da bi storili luku, bil kakov kalić za blago napajat. A kade je kalić tu su i žabe. Onput je neki rekal da gre napojit blago tamo kade su one žabi. Drugi je rekal voda pul žabic i tako je nastalo ime Žabica.

[milić]

Zač ni dolca na Dolcu

Kratka al slatka! Tako moremo reć za ulicu Dolac aš je "nabijena" zgradami ke su mnogen Rečanon pa tako i mane od posebnega interesa.
Kada je Josip II. 1780. leta pušćal da se kući moru zidat blizu zida ki je okruževal rečki stari grad, maheri su zajno šli va akciju. Jarak ki je bil okolo zida je zahitan 1785. , pomalo se rušilo kule i zid tako da se je moglo uć va grad z više stran.  Šumice, vinogradi, lehe su postale gradilišta. Najprvo se počelo zidat palaci od zidin prama moru i Rečine a onput prama Mlake kade je se bilo trdo tnalo, a kašneje i na terene ki je storen kako se je zahićevalo more za buduću luku.
Za vreme gradonačelnika Ciotte zacrtali su i delali današnju ulicu Dolac ku su nazvali po Clotilde, žene nadvojvode Josipa. Ulica se je zaten zvala Via de Amicis pa Via Maylender da bi od 1945. bila Dolac.
Pušćajno mi ta imena, ka se menjaju kako vetar puše, i homo malo videt ča je na ten Dolce.
Ćeš-nećeš zajno moraš videt hotel Bonaviju. Današnji veštid je hotel dobil 2000. kada je vlasnik bil Goran Štrok. Sada da je va vlasništve Plave lagune. Bonavija je hotel, kako mnogi misle a i ja, ki je sa svoja leta bil najboji hotel v Reke a i šire. Ni ni čudo aš ča je se pasal, skupa z Reku, va teh preko 140 let od njegovega službenega postojanja (1876. leta) al više od 110 let (1906.) kada se je prvi put spomenul kot hotel Bonavia va novinah La Bilancia.
Ja san fanj povezan z Bonaviju aš mi je mat šezdeseteh par let delala va vešeraje od hotela pa san čul puno ćakul z hotela. Zapametil san da joj je šefovica bila Josipa Križman Pepina i da jin je branila peglat šugamani aš da onda nisu tako mehki. Sedandeseteh san kot mladić prihajal va kavanu na kate kade je delal konobar kakoveh je malo. Vice Maglica je bil i ostal, kako bi danaska rekli, brand hotela Bonavije. Nekako va to vreme va kuhinje je šef bil Ivan Linardić na čigovu zelenu paštu su prihajale kurjere z Talijani a zna se da je va Talije bila zibela pašte. Po Reke je va to vreme kružila poslovica da žena ovako govori mužu:
- Ako ti ni obed dobar a ti lepo hodi va Bonaviju!
Osandeseteh san, kot član Društva brodograđevneh inženjeri i tehničari sako leto, nekako na početke proleća, bil va Captain's Clube kade smo imeli Večere brodara. Kako je tu bilo lepo! Dobra večera, ples, tombola... A sa hvala je šla dobren konobaron ken je šef bil Ivica Mičin a zamenik Ivan Renčić. Povedal mi je Pero Lovrović, ki je leta i leta delal na recepcije hotela, ka poznata imena od tu a i celega sveta su bili gosti Bonavije: Stewart Grenger, Maria Schell, Curd Jurgens, Orson Welles, talijanski kanturi Claudio Villa, Pepino di Capri, Toni Dallara i Nella Pizzi pa naši glumci Mustafa Nadarević, Boris Dvornik, Aljoša Vučković, pisac Miljenko Smoje, kantur Mišo Kovač... Kako je sada va Bonavije niman pojma aš let i let nisan tamo bil.
Preko puta Bonavije je palac ki je delan kot ženska osmogodišnja (ne osnovna!) škola. Storena je leta 1887. po dišenji Giaccomota Zamattiota a 1902. je proširena za 5 poneštar po nacrti G. Rubinicha. Arhitekta Giaccomota Zamattiota je Ciotta dozval z Trsta da va stvarnosti stori ono ča je Cotta kot gradonačrlnik zamislel a i mogal platit na ov al on mod. Mnogi, kuliko san mogal pročitat, se slažu da Ciotta ni pogrešil aš da je Zamattio storil odlično delo v Reke. Zgrada je va Drugen rate od bonbardiranja skoro zasen šundrana al je 1955. popravna.
Danaska je va te zgrade Sveučilišna knjižnica va koj san ure i ure sedel išćuć podatki dok san pisal o 3. maje. Do pred malo, dok se ni preselil va Benčić, tu je bil Muzej moderne i suvremene umjetnosti. Va prizemje je stalna izložba glagoljice ka je tuka još od 1968. a postavili su ju Vanda Ekl, Branko Fučić i Igor Emili kot arhitekt. Pred malo je tuka trećemajac Petar Trinajstić storil izložbu slik od pokojnega Fučića ku san s gušton pogledal aš se trudin pisat na mod šjora Fučića.
Daje hodeć po ulice Dolac va oko će vas ubost jedna prelepa kuća ku zovu Casa Veneziana aš zgleda kot da je va Venecije. To si je rečki Englez Robert Whitehead storil 1886. kako bi mogal dat va najam stani i poslovni prostori ki su va njoj. A arhitekt je bil (već znate, ča ne?) Giaccomo Zamattio.
No, da ne dosajevan s ten Zamattioton, on je projektiral još dve kuće na Dolcu za Whiteheada a i onistu s kupolun na kantune Barčićeve i Dolca za Narodnu štedionicu. Si ti palaci su i danaska tamo a storeni su 1895. - 1896., a ulice su se onda zvale sv. Andrije i Clotilde inferiore.
Na križanje današnjeh ulic Dolac i Barčićeve, na severnoj strane, je Muška građanska škola. Storena je1887. po projekte a kega drugega leh G. Zamattiota. Danaska je va njoj Srednja talijanska škola al kako ju moji prijateli ki su va nju šli zovu - Liceo. Člani Udruge 051 su ju obašli 17. 5. 2018. i bili su oduševjeni kako je lepa a posebe jin se je dopal kabinet za kemiju. Zvir potočića Andrejšćice, ki je spod školi i dvorišta, da nisu videli.
A sada, kako reku, najslaje na kraje. Teatro Fenice al, kako smo ga mi zvali, kino Partizan. Kada se je ulica Clotilda inferiore stvarala već je bila pruga prama Zagrebe tako da je to bila i granica do kuda se more poć. Pul te pruge teren su kupili Ricottijevi ki su se kalali z Krimeje. Šjora Catterina je otprla (muž Adam joj je umrl 1871.) najprvo pivnicu a potla i teatar na otprten. 1888. je kazalište (već se zvalo Teatro Fenice) obnovjeno tako da je moglo stat va partere 500 a na galerije i ložah još 200 judi al je i daje bilo prez krova. Komać 1901 su ga pokrili i to s ceradu. 1894. Catterina je šla na on svet a njeji nasledniki su se prijeli dela i 1911. su storili dioničarsko društvo z rečku poslovno-političku kremu. Platili su projekt kega je storil arhitekt Theodor Träxler. Projekt je z velemi promenami dofinjen 1912. i zgrada od Teatro Fenice je otprta 2. 5. 1914. taman da, onako lepa dočeka Prvi rat. Va to vreme već je navelo delalo i "pravo" kazalište al su obadva imela svoju publiku. I tako je to šlo do Drugega rata za ken su i kazalište i Teatro Fenice finili va narodneh rukah. Tamo negdere od 1965. se i ja domišjan kina Partizan.
Jedan od prveh filmi ke san tu gledal je bil Moje pjesme moji snovi (viš vranića, i to je povezano z Reku) a od onda bar jedanput na šetemanu san bil va kine, najveć puti va Partizane. Kakove file su užale bit za kartu kupit! Ja, to je va ono vreme bila glavna zabava, pogotovo mladen. Nać se s klapu, kupit karte, neč popit, pogledat film i pomalo doma.
Va te zgrade, va nekadašnjoj Sale Biancoj ka je spod partera, onputa je bil noćni bar Plavi Jadran, kašneje Evropa ki nam je bil interesantan za desetak let, okolo 75. kada smo slinili na striptize.
I ovega san se domislel a tiče se Dolca pa da zapišen. Va jednoj kućice na kućnen broju (lahko ga je pamtit) 567 pul Teatra Ricotti poznati fotograf Ilario Carposio je 1878. otkupil foto-studio od tadašnjega vlasnika i svojmi slikami postal važan del rečke povijesti. 
Na kraje, kada malo boje razmislin, Dolac je morda i najlepja ulica v Reke al je zagađena z auti i bilo bi dobro jih maknut od tuda.

[milić]

Zač je lep Jadranski trg

Kada šećeš po Korze semo-tamo, kot prijatel P. kad je šezdeseteh kupil novi veštid, na njegoven zapadnen kraje prit ćeš na Jadranski trg ki se tako zove od devedeseteh. Prvo, to još pametin, se je zval Trg Palmira Togliattija a zajno potla Drugega rata je bil Narodni trg. Za vreme Talije trg je imel ime po crnogorskoj princeze Jelene ka je postala Regina Elena. Još prvo, za vreme Austrougarske, trg je nosil ime po mađarskoj kraljice a austrijskoj carice Elisabette, poznatejoj po nadimke Sisi.
Na meste kade su danaska fontane bil je palac od rečkega guvernera a spreda njega je bil park se do mora. Kada je zrušen ta palac mađarska kompanija za pomorstvo Adria je odkupila del parka prama moru i tuka storila Palac Adriju kega danas zovu Palača Jadran. Na meste zrušenega palaca ostalo je mesta za trg ki je najprvo bil lep parkić s puno rožic. Dvajseteh let su ga malo preuredili i va njega postavili sidro z talijanskega ratnega broda Emanuele Filiberto ki je imel važnu ulogu va pripojenje Reki Talije. Zarad većega prometa se više se klaštrilo parkić a na kraje je ostal goli asfalt se do 1991. kad su počeli postavjat granitne ploče a 2002. su postavne i dve fontane keh do tada nikada ni bilo na oven trge.
Jedna od zgrad ka okružuje trg je Rečki neboder. Njegova priča je jako interesantna, morda i va stilu verovali al ne. Neboder je zidan na terene kade je zdavna bilo grobje a do njigove gradnje je bila jedna kuća. Od 1939. do 1942. (baš pravo vreme!) delan je po nacrteh Umbertota Nordija. Naručil ga je Marco de Albori čigov otac da je delal kot knjigovođa (ja bin rekal kot likvidator računi) va Čikage pul Ala Caponeja. Šverc alkohola, kurbe i kocka su pomogli da se prišpara kakov solad i da ga se uloži va neboder. Bil je storen tako da va prizemlje i na prven podu budu poslovni prostori a na ostalemi kati (dvanajst jih je) po dva stana na kate s ten ča je na šestemu bil samo jedan al pravi. Va ulaznen hole Triještin Carlo Sbisa naslikal je na zide mural ki prikaževa D'Annunzijota kako va rukah drži kartu Kvarnera. To je potla rata šundrano. Jedanput san z kunpaniju bil va razgledavanje nebodera pa smo nagajali kade je ta mural bil a bili smo i na vrhe, na terace s ke je lepo videt rečki krovi. Ma baš je lep pogled ozgora! Mane je neboder ostal va lepemi uspomenami aš je tamo bila putnička agencija Kvarner Express z Opatije a ona me vavek spameti na lepa putovanja na keh san bil. 
Palača Jadran je za mnoge najlepja i najbogateje opremjena zgrada va Reke. Šnju su Mađari oteli pokazat svoju moć va grade ki jin je pripal potla 1868. i bil po broju stanovniki drugi va Mađarskoj, doduše skoro prez Mađari va njoj. Dišenji za palac je storil Francesco Mattiassi (1918. je pasal na Sušak kade je postal Franjo Matiašić). Zgleda da se va to vreme va Reke niš ni moglo storit prez Zammattija aš je njegova firma delala zidariju. Palac je ovako lep zablešćal 1897. Na facade ka gjeda prama moru postavne su figure kapetana, timunjera, motorista i pilota ki predstavjaju pomorce a na facade ka gleda na trg su kipi Japanke, Egipćanke, Indijanke i Evropjanke ke predstavjaju kontinente. Se te, posebe lepe, kipi je storil, kako san pročital, talijanski kipar Sebastiano Bonomi o kemu ja nisan uspel niš nać. Va palace je danaska Jadrolinija ka ga je i obnovila tako da je još vavek lep pa bog. Ja pametin da je do pred par let va palace bila ljekarna a spamećujen se i Kluba za pomorci va ken nisan nikad bil, ča bi značilo da je zaprt prvo 1975.
Na meste kade je danaska Erste, skoro san napisal Rečka, banka bil je pred stotinjak let blok kuć ki je za vreme Drugega rata porušen va bonbardiranje. Tuka, va kuće od Giorgiota Vranyczanyja, je bil poznati restoran Roda kade su požeruhi prišli na svojo. Potla rata tu je storen parkić ki je bil dok se ni počelo delat modernu zgradu Rečke banke. Banka je inače osnovana 1954. i najprvo je bila smešćena va Palacu Modelo a 1965. su se preselili va novu zgradu ka je delana po projekte Kazimira Ostrogovića. Mamin ujac Mate (i ja san ga zval "ujac") mi je kot frkolasu povedal da je on bil poslovođa na toj gradnje a ja, ki san bil pod dojmon krimi filmići, san ga pital:
- Ujac, a bite znav doć do sefa?
- Bin, samo ne znan kako bin van šnjiga zašav.
Ah ta Rečka banka, kuliko mi je draga! Ako niš drugo - kuliko samo rendesi san pred njun imel.
Do banke je palac ki mi je osandeseteh puno značil. Va njemu, na prven podu, je bil Klub privrednika. Tu su stručna društva imela svoje prostorije. Med njimi je bilo i Društvo brodograđevneh inženjeri i tehničari ko je po pundejkeh imelo sastanki pa kad bimo finili sastanak nas pet-šest se spušćalo lih kat niže va Zoru i nastavili sastanak dok nas nisu potirali žnje.
Mane je Jadranski trg lep ma ča god ki rekal. Neću baš reć da je lepo videt te moderne zgrade kot ča su od Rečke banke i Rečki neboder pul Palaca Adrije ma čovek se prinavadi. I kada su va marte 1942. maknjene skele šnjega mnogi su bili va šoke aš to nisu mogli ni zamislet. Med njimi i Ricardo Gigante, va to vreme talijanski senator, ki je napisal da će za dva leta si reć da je neboder na praven meste i da je jedna od sedan lepot grada.

[milić]

Zač su avuti po Rive

Kad je lep dan gušt je prošećat po rečkoj rive. Kreneš od Žabice, pasaš pul palaca od Lučke uprave i prideš do De Frančeskijevega gata. Na njemu se je od Drugega rata smestil bunker kega je rabilo zrušit ma su ga uspeli preredit va ugodan lokal - piceriju. Taj gat je najprvo bil Zichyjev a potla Prvega rata postal je Molo Ancona da bi zad Drugega rata postal Gat Otokara Keršovanija.
Kada smo već pul imen, i riva je menjala imena. Najprvo je bila via del Lido pa Riva Marco Polo, Riva Geza Szapary, Riva Emanuelle Filiberto i Sauro Nazario da bi od 1945. postala Obala Jugoslavenske mornarice. Široka je naša Riva i dobro je da je tako, da se ni ki domislel nabandat kakov hotel al ča slično na nju. Ovako imamo široku cestu i lep pogled na putničku luku, ako se to ča zapira rečki lukobran more tako nazvat aš malo praveh putničkeh brodi pride nutra va luku. Osim ča avuti dime od zapada prama istoke va četire trake i drugi deli rive su krcati z avuti. Pun jih je Adamićev gat za razliku od Gata Karoline Rečke kade su maknuli parkirališće. Kad san se već ćapal za avuti ja se zmišjan da san vozil po njoj dok je Riva bila dvosmerna a takova je bila do, čini mi se, 1979.
Pustmo avuti i šećimo daje. Na levu ruku je Palača Jadran a na desnu Adamićev gat. Pul njega je vezana Marina ka je od trajekta preurejena va hostel a i pravi plesnjak z sedandeseteh let kako čujen od judi ki tamo hrle. Morat ću se i ja ki put zaletet da vidin kako to zgleda. A ta Marina je posebna priča aš dok je bila va službe 1936. - 2005. bila je najstareji brod na svete tega tipa ki je još plovil. V Reku su ju dovukli 2011. i vezali na Adamićev gat kade su ju preuredili va brod ki nemore sam plovit al more ponudit kamare, hranu i piće, a evo i zabavu. Nov život stare Marine!
Jedan puno manji brod je tuka bil vezan, doduše po dužine rive, ki je nudil uz jilo i pilo i striptiz. To je bil, starejen jako poznat, Barba Rude. Barba Rude je bil mići brod od svojeh pedesetak metar ki je storen još 1913. va M. Lošinje kade su mu dali ime Knin. Već mu je bila namenjeno rezanje kad ga je 1963. kupilo poduzeće Pozornica z Opatije. Va Viktor Lence su ga preuredili, dopejali ga v Opatiju kade je bil po dane restoran a po noće noćni bar. Ma to da ni baš šlo dobro pa su ga poslali va Umag kade je bil kockarnica. I to je kratko trajalo. Kad je došal v Reku potla ča ga je kupilo rečko ugostiteljsko poduzeće Risnjak i našminkali ga va Kraljevice, zgleda da mu se je karta obrnula. Tuka je počel pravi život ostarelega Barbe Rudeta. Tega 1971. leta je Barba Rude imel restoran, noćni klub i akvarij dug 18 metar. Tu je bil do 1978. kada su ga kupili da gre delat va Dalmaciju kade je bil disko a 1988. je konačno finil va rezalište. Bil san 2-3 put na njemu po noće kad smo se va klape vrnjali z Opatije. Bil je pun muškeh ken su se oče svetile kot maškan va škuren. Gosti lepo obučeni, konobarice va kratkeh bragešicah i raspućeneh bluzicah a na podije se sučeva striptizeta. Zapametil san jednu ka se svijala kot kaška a umetničko ime joj je bilo Ajša. Zač je ta brodić važan za ovu priču? Pa da se poveje kuliko je va to vreme Reka i drugi naši kraji bili napred s novemi ponudami va turizme i zabave.
Kada san spomenul noćni bar trebe napisat i par besed o noćnemi damami ken je teren bil baš riva al obala kako se va mojen điru govorilo.
- Siguro je to zaslužila na obale.
Ja, obala je bila poznata po kurberaju a ne Barba Rude. Kuliko san čul, noćnen frajlan je bilo zabranjeno prit na Barbu Rudeta aš jin je neki redar Mustafa to branil. Ma su zato marširale gore-dole po rive.
Homo daje! Na levu stran, preko ceste je bivši hotel Europa ki je danas pun državneh i županijskeh uredi. Hotel je storil 1874. Slovenac Josip Gorup na meste kade je od 1844. bil fanj veli palac kega je načinil Ciottin nuk Eugenio a muž i žena Adam i Catterina Ricotti (oni s Krimeje) su va njemu otprli hotel Al Re d'Ungheria (K Ugarskom kralju). Adam je 1871. umrl, Catterina je hotel prodala i šla delat teatar a malo potla je to kupil Gorup, se staracal i storil novi, veli hotel - Grand hotel Europa. Domišjan se da je sedandeseteh va prizemlje bila kavana Central ka je bila zapušćena i zgledala po sen da bi ju trebalo sredit tako da ne znan san bil više od dva-tri put va njoj. A taj Gorup da se je tuliko obogatel da kad je umrl nisu znali pobrojit kuliko je kuć i beči ostalo za njin.
Hitimo sad pogled na desno, na gat Karoline Riječke. Ta Karolina da je spasila Reku od engleskega bonbardiranja 1813. Taj mol je storen 1841. leta kot prvi va luke. Za vreme Talije bil je to Molo San Marco a potla 45. Gat 29. novembra. Na ten gate je bil od 1926. veli spomenik od kamika na ken je bil mletački lav kot poklon Venecije Reke. Spomenik je zrušen na kraje Drugega rata od Njemci. Danas je na oven gate on grdi kafić ki nosi ime po rečkoj heroine Karoline i bilo bi puno lepje da ga ni tuka.
A sad pogled na levu stran. Veli palac ki blešći od svoje beline. Da se zajdin razumemo, mane je grd kot vrag ma čovek se i na grdobu brzo navadi pa najdeš čagod i lepega va njoj. Palac je finjen 1992. za nekadanju Jugoliniju ka je promenila ime va Croatia Line prvo leh je palac finjen. Zgrada je zrasla na meste nekadanjeh Case Rotonde i Case Muchovich - Rinaldi od ke su ipak ostali dva zida od facadi. Kada je propala Croatia Line zgradu je kupil Euroherc pa joj je sada ime Palača Euroherc  osiguranja.
Do zgrade Jugolinije 1974. otprta je Robna kuća Ri. Storena je tako da su rečke firme ke su se bavile s trgovanjem zbrale soldi i storile tu velu zgradu ka se mane nikako ne uklapa va ov prostor. Po projekte Ninoslava Kučana na meste kade je bil jedan parkić storena je robna kuća ka je bila pravo čudo za ono vreme i prostor kade smo živeli. Kada je otprta mi, već dečki od dvajsetak let, smo se vozili na pomičneh skalini semo-tamo kot mića deca. Ogroman prostor od 12.000 metar kvadrateh, 500 delavci (uglavno ženske) i krcate stalaže. Sega je bilo va te robne kuće a med ten i ugostiteljska ponuda - kavana i pivnica ke je držal Platak - poduzeće za ugostiteljstvo. Kavana je bila nova, moderno je zgledala a mane još lepja aš je tamo delala jedna konobarica, Gromišćica G. Kad si zašal va tu velu butegu mislel si da si va Merike kuliko je tu bilo lepeh stvari.
I danaska je s terace kavane Robne kuće Ri lep pogled na luku va koj se cimbujaju brodi ke od veleh vali štiti lukobran. Fanj puti san mislel kako je to va ono vreme, kad su Mađari delali lukobran, to moralo bit vražje teško delo. Z onakovun mehanizacijun! Ma intanto su ga storili. Počeli su ga delat 1872. a do kraja, va celoj dužine od 1707 metri, je finjen 1934. za vreme Talije. Na početke su mu dali ime po Marije Terezije pa su ga Talijani prekrstili va Diga Ammiraglio Umberto Cagni pa od 45. lukobran Petra Drapšina. Danas mu je službeno ime Riječki lukobran a mi ga zovemo Molo longo. Od 2009. je otprt za Rečane i goste pa se po njemu more šećat do mile volje. A lepo je tuda šećat i gledat naš grad kako blešći va svojoj lepote.
Va današnjoj Ulice Ignacija Henckea smestila se je još od 1790. pravoslavna crekva svetega Nikole ku je projektiral rečki arhitekt čigovo ime je dato ulice va koj je crekva. Storili su je člani srpske zajednice ken su zadišali soldi ki će se v Reku počet takat kad luka prodela kako rabi.
Pul crekvi je 1857. bila storena vela fontana koj je na vrhe podesta od kamika bil mramorni kip cara Franjota Josipa I. Nacrti za tu fontanu je storil Prvislav Adamich a sklesal ju je rečki kipar Pietro Stefanutti. S tun fontanun su se rečki domoljubi teli dodvorit caru ki je 1852. bil v Reke. Ma zgleda da su brzo promenili stran aš su fontanu zrušili već 1874. dok je car bil još ohoho živ. Skuža je bila da smeta prometu a ja mislin da je to povezano z "Rečkun krpicun".
Ja, Riva i se okolo nje je jako interesantno. Tuka je nan Rečanon pravi kontakt z moren. I dobro je da ga i tu ne zapru z kakovemi kontejneri, neboderi...

[milić]

Zač je naša placa tako lepa

Došli smo na placu ma ov put nećemo niš kupjevat, samo ćemo gjedat i uživat va šare lepote. Na oven banku su jabuke, krušve, naranče na onen je salata, blitva, špinača, radić, na onemu je uje, mendule, orehi... Ma sega je na našoj place samo je se manje kupci a vezano na to i prodavači. No, rekli smo da nećemo niš kupjevat leh ćemo gjedat. Pa gjedajmo!
S place ne moreš ne videt kazalište. Naše lepo kazalište ko je storeno 1885. samo dva leta potla kako se je odlučilo da će se delat aš ono Adamićevo, kako su ga nazvali, ni moglo već delat zarad vele opasnosti da se važge i zgore si ki su nutre. Projekt su storili poznati arhitekti z Beča Helmer i Fellner a tu su dela imeli i vrhunski slikari braća Klimt i kipar Volkel a i fanj drugeh. Na se se mislelo pa je tako tu zasvetlilo prvo svetlo v Reke i postavan prvi telefon. To se skupa je poskupelo kazalište ko je od planiraneh 313.000 fjorini na kraje prišlo koštat 514.214,09 fjorini. Ma intanto kazalište je storeno a otprto je z operami Aida i La Gioconda.  Kazalište se je najprvo zvalo Teatro Comunale pa su mu 1913. doštukali još Giuseppe Verdi. Potla Drugega rata je postalo Narodno kazalište a kašneje su mu nadodali Ivana Zajca a na kraje još i ono plemenitog.
Moj odnos prama kazalištu je imel vršiće i dolčiće. Va osnovne škole bili smo člani Muzičke omladine pa smo imeli pretplate na predstave ke su bile, čini mi se, po nedejah okolo polna. Rad san šal na drame i kumedije a na opere i balet baš i ne. Zmišjan se da smo ja i dva prijatela raje ostali va jednen parkiće med štreku i Kumičićevun ulicu igrat karte i pušit leh poć gjedat i poslušat Erota. Saki put kad pasan pul tega parkića zmislin se tega pa mi se usnice rastegnu va smešić. Tako je bilo i va srednje škole ma 1970. kazalište je zarad veleh popravki, aš je voda zašla va njega, preselilo va Sušački neboder i tamo "privremeno" bilo do 1981. kada se je vrnulo doma. Va Sušačkemu neboderu san volel pogjedat sako leto reviju mjuzikli a kad su se predstave vrnule va zgradu teatra ja san već delal i šal san na predstave samo kad je 3. maj častil aš san raje va to vreme hojeval va kino i na tanci leh va kazalište. Kad san se oženil opeta san imel pretplatu pa san gjedal i opere a i balet. Ma kako je žena umrla ni me voja poć ča pogjedat a i ne da mi se samemu bit tamo kot Pać. Od seh predstav ke san pogjedal prve mi na pamet padaju Vježbanje života i Mišolovka pa i Ero ča će reć da su mi baš one ostale najdubje va pamete.
Do kazališta je park. Mane je ov sadašnji puno lepji leh on ki je bil prvo. Ovako je urejen od 2005. leta po ideje Dragutina Kiša. Volin va njemu sest na klupicu i pojist kakovu jabuku al krušvu ku operen na onoj špine ča je pul cesti, va kantune parka. Užan pojist i burek al tako da ne mrvin kako ne biju golubi a i galebi postali napasni. Sedin, jin i gledan kako judi pasevaju tamo s praznemi boršami a nazad s punemi. Va parke je postavan kip našega slavnega Rečana Ivana Zajca. Taj kip je storil naš Dražan Belizar Bahorić okolo 1980. Va knjižice-kataloge M. Grgurića Riječke fontane... je članak ki opišuje fontanu ka je bila postavna 1873. kad se je ustvari i formiral Kazališni park. Škice da je storil F. Bazarig a fontana je bila va parke pul marćapije današnje ulice I. Zajca. Malo daje, prama prven paviljonu, nekad je bil i javni zahod ki bi i danas tamo rabil.
Pred kazališten, ne more se reć va parke, je jedna vela ruzinava boća po koj se razleva voda. Nju je storil poznati kipar Dušan Džamonja a postavna je 1999. Ni mi baš lepa ma mi se čini da se je lepo smestila na oven meste.
Z parka se lepo vidi južna facada od Palaca Modello. Taj palac je storila Riječka štedionica 1883. a arhitekti su bili Fellner i Helmer, oni isti ča su zaslužni da je naše kazalište ovako lepo. Palazzo Modello je storen na meste kade je od 1805. do 1883. bilo Adamićevo kazalište. Palac se i mane, staremu grintavcu, pijaža. Stručnjaki govore da je palac storen va baroknen i renesansnen neostile i da je bogat sa skulpturalnemi reljefnemi ukrasi. Danaska su va njemu smešćene Gradska knjižnica, službe HNK-a Ivana pl. Zajca i Zajednica Talijani - Circolo.
Z parka se lepo vidi, ki zna kamo trebe gjedat, i Turska kuća al palac Bartolich-Gelletich-Nicolaides. Ova prva dva prezimena pripadaju gospe Antonije ka se je oženila za dvajset i dva leta mlajega turskega i grčkega konzula Nikolaidesa pa su tako i Antonija i palac dobili i ovo trećo prezime. Inače kuća je storena 1879. al je 1906. zdignjen četrti kat i šufit a i facada je urejena va orijentalnen stile a na njoj su i nadpisi na arapsken. Se to da je dokaz da je Reka i va to vreme bila multikulturalan i tolerantan grad. Vezano za konzulati, Reka je va to vreme imela 22 konzulata.
Okolo rečke place se more videt još lepeh kuć ke su storene okolo 1900. na nasipanen dele a po zamisli gradonačelnika Ciotte trebale su bit za bivanje rečke elite. Med njimi je i Crvena kuća i Gorupove kuće va Verdijevoj i Zagrebačkoj a i palac Baccich bivše Transadrije.
Placa se more podelit na otprti del i na tri zaprta dela - paviljone. Ja volin kad je lepo vreme prošećat po vanjsken dele. Nekako mi se čini da tu najveć doživin placu. On del ki je va zaprten već mi ne dava ta doživjaj ma sigur san da bi placarice ke delaju na otprten kad puše bura i pada daž ipak raje bile va zaprten dele. Va teh zaprteh deli place - paviljoni more se kupit va prven kruh, mlečne proizvode, a i neke butežice su va njemu z drugun robun. Va drugen paviljone je meso friško al predelano va salam i konbasice. Va trećen je ribarnica kade se more kupit friška riba. Neki moji prijateli uživaju pasevat po ribarnice a mane tamo smrdi i vavek je tarac mokar pa me strah da ne paden. Ipak san ja Studenjac ki voli ribu ma parićanu i na pijate.
Prvi dva paviljoni su delani 1880. - 1881. po projekte inženjera Izidora Wauchniga iz Gradskega tehničkega ureda. Na početke su bili storeni kot vele i visoke dvorane prez pregrad i kati ma su 1971. i 1974. va obadva storeni kati i nutarnji skalini. Ča se tiče ribarnice šnjun je priča malo drugačeja. Prva ribarnica storena je 1865. na meste kade je i današnja s ten ča je more onput bilo skoro do nje. Na početke 20. stoleća ta ribarnica ni već bila dobra zarad slabe higijene pa je odlučeno da je se zruši i stori nova. Projekt je storil Rečan Carlo Pergoli 1904. a sama zgrada je finjena komać 1916. aš je zgleda bilo, kako smo nekad užali reć, subjektivnih a i objektivnih (rat!) razlogi za kašneji finitak.
I tako smo mi, lepi moji, obašli placu al pjacu al tržnicu kako neki reku. Ja san ipak kupil malo srdel za pofrigat, pol kila blitvi, dve glavice česna, pol kila kapuli, pol dobrega črnega kruha (ne smen napisat kade da ne bude skrivena reklama!) šest banan, tri kvarti krušav i dvajset dek očišćeneh oreh. A rekal san da danaska neću niš kupjevat!

[milić]

Zač trebe šećat po Korze

Danaska ćemo prošećat po Korze al Korše, kako ga je zval moj otac. To je odvavek bila najlepja, najurejeneja i, ča biju rekli, najreprezentativnija ulica a šetnica Reke je postala nekako od sredine šezdeseteh pasanega stoleća kad su prestali avuti pejat po njemu. A Korzo je postal Korzo ovako nekako.
1750. leta Reku je stresal i fanj porušil potres. Va to vreme carica je bila Marija Tereza pa je ona 1753. odlučila da se Reke pomore z neč beči (viš, morda se zarad Beča reče za soldi beči!?) i, ča je još važneje, pušćala je da se stori projekt ki će pomoć širenje grada na prostor spreda gracke ure i to tako da se zahita more sa zemjun. 1773. va Reku je z Trsta došal inženjer Anton Gnamb ki je storil plan kako storit ta Novi Grad (Civitatis novae). 1780. car Josip II. je dozvolil da se zruše gracki zidi i tvrđave. Zatrpalo se je i kanal, rov okolo bivšeh zidin tako da je i to prišlo kot naručeno da se store kuće od keh su neke i danaska žive. Gradski toranj i ura su ustali pa je to bila točka okolo ke se je se vrtelo. Toranj je se do druge polovice 17. stoleća bil prez uri a prvi put se ona vidi na grafike rečkega kirurga G. Genove iz 1671. leta. I se od onda se rendes zakaževalo pod urun:
- Ćo, vidimo se na pet i pol pod urun!
Osim ča je nosil uru i do kraja 18. stoleća vrata, ka su se zvala Vrata od mora aš su bila i Gornja vrata a kašneje i Istočna i Zapadna, toranj je nosil figure i ploče od kamika na keh su se rečki odličniki falili kad jin je ki car bil va vižite, ki ga je dočekal i temu slično. Nisu oni bili kot moderneji grafiteri ki su napisali na zide al pošpricali W Duce, Živijo Tito al ŽAP pa pobegli. Ovi su svoje pozdrave va kamike zapisali. Ma ni to ni se! Kakov bi to toranj bil da na njegoven vrhe ne visi kakova bandera al čepi kakov orlić, magari i karvan. Tako je i naš toranj menjal zastave kako se je ki semo dovukal. A ča se orla tiče zmislimo se samo kuliko je dima i blatne robi zašlo vanka dok ni postavan ov naš novi/stari oral ki ima dve glave ke da gledaju prama Sušake.
Od naše ure se je počelo delat kuće, sad kad ni već bilo zidin, na levo i desno a široko tnalo med kućami ke su delane na strane kade je ura i kućami ke te se delat s druge strani nazvali su Korzo.
Najprvo je okolo 1783. leta s istočne strani ure storena kuća Michaela Wohinza va koj san ja zapametil da je bila butega od Jugoplastiki a prvo da je bila apoteka od Cattijeveh. Z druge strani ure par let za ten kuću si je storil Giuseppe Troyer. Na istočnen kraje tega bloka kuć 1801. je storena kuća Vuković ku je naručil Jovan Vuković ki je v Reku prišal z Sarajeva. To je znači kuća va koj je butega ku zovemo Stari Kraš. Ta kuća je poznata i po ten ča je va njoj kot merikanski konzul živel i delal Fiorello la Guardia al Cvetko, kako ga zove jedan moj prijatel. I još neč o toj kuće! Storena je na meste na ken je prvo nje bila najveća tvrđava v Reke - Sokol kula.
Od tega dela Korza homo sad pomalo prama Jadransken trge. Do kuće Vuković bila je se do Drugega rata kuća Valentinota Bolfa, trgovca z robun ki da je prišal z Gorice. Kuća je bila storena na početke 19. stoleća a zrušena od bonbardiranja va Drugen rate pa je na njejen meste storena nova ma po noveh idejah i nacrti.
Desetak koraki daje, al sada na levu stran, je palac va ken su župan i uredi od naše županije. Palac je po projekte Emilijota Ambrosinija storen 1906. na meste jedne manje kuće a naručil ga je Francesco Rauschel. Tuka je dugo let bil hotel Royal a potla Drugega rata hotel Zagreb. Osandeseteh je va njemu bila smešćena Zajednica općin Reki, ča bi se reklo, županija prvo ove današnje. Ulaz va hotel, kot i danaska va županiju, je bil z Adamićeve ulice. Šjor Rauschel, ki je bil trgovac z robun, je del kega mi stareji poznamo kot Namu a mlaji po H&M bil dal va najam konkurentu, firme Umberto & Demetrio Papetti ki su prodavali robu.
Va zadnje kuće va ten nize je sedandeseteh bila knjižara Mladost va koj san fanj knjig kupil a zmišjan se da san se va njoj bil pretplatil na časopis National Geographic. Sad je nutre vrag zna ča a nadozidana je 2011. tako da je na vrhe bil Skv bar ki ni dugo dural.
Na istoj strane je i naša draga pošta ka je, grde li istine, postala butega Zara. Palac pošti je storen još 1887. kot poslovna zgrada Kraljevske mađarske financijske uprave. Autor projekta ni poznat a delalo ju je rečko poduzeće Burger & Matković. Mane je ta zgrada najpoznateja po prizemlje kade san užal plaćat računi a i tuka je delala moja kujina M. A lepo je bila urejena ta naša pošta, ča bi rekli - svecki. Pa još on prelepi mozaik Edota Murtića kega su obećali ponovo posložit. Samo nisu rekli kad ni ki!
Med poštu i RK Ri stisnula se je od 1996. jedna fontana ku su prozvali Korzo a projektiral ju je poznati arhitekt Ninoslav Kučan.
Na desnu ruku sad nan pride Robna kuća Korzo ka je storena 1973. po projekte Ade Felice Rošić. Ta robna kuća, koj je vlasnik bil tadašnji trgovački div Brodokomerc, ni storila tako velu pomutnju kot ča ju je storila RK Ri leto dan za ten. Ne pametin je jako osim ča san imel Diplomski rad na fakultete s temu Sekundarna raspodjela u RK Korzo.
Na iste strane je zgrada va koj su smešćeni gradonačelnik, vijećnica i neki uredi Grada Reki. Tu kuću je, kad je finjena 1914. koristila Gradska štedionica a kašneja Banco di Roma.
Malo daje je zgrada Radija Reki. Storena je 1848. kot Domoljubni kazino (majko mila!) za Domoljubno društvo a po voje dvanajst člani ki su bili puni soldi, kot brod. Glavni va ten je bil barun Gjuro Vranyczany. Projekt za zgradu je storil mladi arhitekt Antonio Deseppi. Va to vreme po celoj Evrope su se fanj širili vali nacijonalneh osjećaji pa tako i v Reke. Zato su zgradu 1889. otkupili člani Hrvatske čitaonice na nagovor dr. Erazmota Barčića. I onputa se je z te zgradi se jače čul glas hrvackega čoveka ki se se daje širil. Tuka je 1905. proglašena Rečka rezolucija. Potla Prvega rata 1918. tu se je Nacijonalno vijeće odlučilo za pripojenje Reki Države SHS. Ma jih mnogi nisu poslušali tako da je Reka potla velega natezanja pripala Talije. Sada videjte malo kakovu ulogu va povjeste Reki je imela ovista zgrada ka je bila poznata i prvo leh su va nju prišli Ferlin i Krmpotić. Radijo Reka je tuka još od 1951. a 1970-teh tu je urejen i televizijski studijo.
Sada trebe pogledat, ni levo ni desno, leh dole. Dole su prave črjenkaste ploče od granita z Finske ke su po Korze postavne 1991. - 1992. i nisu radijoaktivne tuliko da bi bile opasne za zdravje, kot ča su neki pisali. Njih još ni bilo kad san ja, mlad i pun života, prihajal okolo 1975. na Korzo i obično zasel va Učku (nekadanja Roma, sadanji McDonald's), va to vreme lepo sređenu kavanu kot i neke druge al mlečni restorani (Šestica, Zora, Premier...). Va to vreme smo šli recimo i po traperice va Trst pa smo mogli usporedit naše i triještinske kafiće. Sigur san da bite se i vi složili smanun da su rečki bili - prva liga prama njihovemi. Tu va Učke san valda saki dan sedel z četiri-pet prijateli i ćakulal o semu i sačemu.
Preko puta je bila Slavica ka je bila prava konkurencija Učke sa svojen lepen teracon a i Paprika je bila popularna va to vreme. Inače, zgrada va koj je bila Slavica je nekada bila poznati hotel Lloyd na trge Adamić. Hotel je storen 1873. za brati Bakarčić Andriju i Dragomira. Va njemu je 1919. neko vreme bival Filippo Tommaso Marinetti veli D'Annunzijotov prijatel ma i mlada učitelica Marija Bartowski z Našic ka je 1912. tuka čekala brod da ju otpeja va Meriku a kad se je vrnjevala z slavnen brodon Carpathiju bila je svedok spaševanja brodolomci z Titanica.
Preko je današnji Tisak a mi smo nekada tu zgradu zvali Vjesnik po butege va prizemlje. Imeli su tu novine, cigareti i druge prčkarije ma i neč ča druge butege tega tipa nisu imele. Tuka si mogal kupit stranu štanpu. Pa san ja, prama fazah ke su me držale, tuka kupjeval časopise od jedrenja al od motori. A još jednu stvar ću van napisat. Gore, na kate je potla rata živel Anton Raspor Španac, poznati revolucijonar z Klane. Bil je jako dobar prijatel s Andreton Rebičinen z Klane pa kad je Andre prihajal v Reku obavezno bi ga poiskal. Tako je bilo i jednega dana va novenbre 1961. kad mu je nesal vrećicu konpira ma mu je ni dal aš mu niki ni otprl vrata. Kašneje je doznal da je taj dan Tone nutre mrtav ležal. Tone je pak mane ostal va uspomene po temu ča je bil na pire kada se Andretova kćer Venka ženila za mojga ujca Vlatkota pa se med drugemi pjesmami kantalo i partizanske. Ja, onputa san imel pet let, san jih fanj znal i kantal šnjimi a Toneta je to jako razveselilo pa me je postavil nasred stola da mu kantan Po šumama i gorama. Nagrada je bila 500 dinari, ča je va to vreme bil veli solad.
Homo daje! To Korzo je tuliko interesantno da se čini daje leh ča je. Evo nas pred Filodramatikun na atrese Korzo 28. Tu je prvo bila kuća Struppi ku je odkupilo Filharmonijsko dramsko društvo pa je po projekte arhitekta Giacomota Zammattija 1890. storilo ov prelep palac. Nisan puno puti bil va njemu aš je tu, va vreme kad san okolo hludil, bilo kino Dom JNA a va njega, čini mi se, su mogli zać samo soldati. Već devedeseteh san bil par puti va njemu va dvorane kade je dramska skupina KPD Bazovica imela neke predstave va keh je i moja punica imela prsti.
Na sred Korza od 2010. raskrečen stoji jedan visoki srebreni čovek kega je storil Ivan Kožarić i dal mu je ime Hodač. Njega ne moru zapalit ma ga moru zrušit.
Malo daje od Hodača na desno je jedan uzak prolaz z kega se širi lep dih morskeh delicij ma i pice. To je Zlatna školjka ka se hvali da ima najdaju tradiciju med rečkemi restorani a ka gre skroz do pisaneh dokumenti o otpiranju tratorije-restorana na Viliju Božju 1885. od strani Leopolda Zwettija. Prolaz va ken je ta restoran i uska uličica va ku z njega zajdemo se zovu Kružna ulica va koj je kultno omladinsko okupjalište Palach a ko ja pametin da se je prvo zvalo Omladinski klub Ivo Lola Ribar i va ki nisan volel zahajat ni kad se zval onako a ni ovako.
I tako, dragi moji, korak na korak, malo gledaj levo malo desno prišli smo do Jadranskega trga. I ča sadahna? A niš, gremo nazad do Fijumere kot moj prijatel Pave kad je šezdeseteh kupil novi veštid i šećal po Korze semo-tamo da si vide kako on ima lep veštid. A Korzo je stvoren za to da vidiš i da te vide. Uživajte va šetnje i to delajte čin više!

[milić]

Zač je tako lep naš Bulevard

Kad želin malo protegnut nogi ja se z Vojaka kalan do Pariza pa po jedneh skalah, ke su pul joga, spustin se pul Sušačke gimnazije pa opet po skalah pul rektorata do Sušačkega nebodera, pasan Križanićevu i priden na most za dvajsetak minuti. Kada želin malo više protegnut nogi onputa se prošećen po Bulevaru. Boulevard je inače francuska beseda i znači široka ulica, avenija. To je morda bilo tako kad se je Bulevar delal ma danas ni aš kad kurjera paseva po oneh treh oštreh zavoji šofer mora sakrabojski pazit kako će to storit.
MO Bulevard je jedan od manjeh deli Reki čigove granice gredu na sever do Vidikovca na vrhe Trsatskeh skal, na istok do Pariza a na jug do nadvožnjaka va Kumičićeve od kuda granica gre na zapad do Trsatskeh skal s ten da su i one, osim mićega komada pri dnu, va MO Bulevard. Glavna ulica MO Bulevard je Bulevar oslobođenja ka počne tamo kade finjeva Križanićeva - pul Sušačkega nebodera i gre do Trga braće Mažuranić otkuda se nastavja Šetalište I. G. Kovačića. Ta ulica se na Parize spaja s ulicu Joakima Rakovca ma to za mane već ni Bulevard magari se tako piše. A i dolnji del Trsatskega parka da spada pod MO Bulevard nač bi malo ki Trsaćan pristal.
Ovako je Josip Srećko Vrignanin va knjižice Sušak-Trsat iz 1932. leta opisal bulevar: "Na trgu bana Jelačića, pokraj kavane i hotela Kontinental je glavno stajalište lokalnih i vanjskih autobusa, te autotaksa… Od Jelačićevog trga se počinje dizati prema Trsatu i gornjem dijelu grada Boulevard, koji se u najdonjem dijelu zove ulica kralja Zvonimira. Ta lijepa cesta se diže i zavija kroz nizove lijepih zgrada i vila, te se sa nje pruža sa više mjesta prekrasan vidik na more… Između ulice Grgura Ninskog i trga, koji se nalazi kod trećeg zavoja Boulevarda, se diže bijela, vrlo lijepa, nova palača Gradskog  načelstva (Rektorat)." Eko sada znamo kako se je bulevar zval va to vreme. A još se je zval: Boulevard Kralja Petra, Viale Giulio Cesare, Biskupa Dobrile, 21. aprila 1945. da bi danaska bil Bulevar Oslobođenja. Samu cestu su počeli delat 1894. zarad čega je zrušena kapela sv. Lovrota.
Palača Gradskog načelstva, kako je šjor Vrignanin nazval današnji Rektorat, storena je 1928. prama nacrti zagrebačkega arhitekta Jurja Denzlera, a storene su i neke promene va njih od strane Gradskega građevinskega ureda kemu je šef bil Zlatko Prikril. Va njoj je 1930. otprta knjižnica ku je vodil Nikola Polić brat poznatejega Jankota. Ja se zmišjan da je se do 1991. tu bila anbolanta i stacijonar pokojne JNA.
Pred severnen ulaze va Rektorat veli je trg nazvan po braće Mažuranić. Leta 1935. na ten trge, ki se je va to vreme zval Sokolski trg, je bil postavan veli spomenik Kralju Aleksandru I. Ujedinitelju. Spomenik je bil delo vrhunskeh umetniki onega vremena Franjota Kršinića i Antuna Augustinčića. Ma ni dugo dural aš su ga Talijani 1941. zrušili. Potla Drugega rata tu su školani iz gimnazije pod saton fiskulture igrali na balu. Na ten igralište, ko je od opreme imelo kamiki namesto stativ, su se igrale napete nogometne utakmice med poznatemi dečki z onega vreme ki su bivali blizu trga kot ča su Dalibor Brun, Ssša Sablić, Sanjin Mandekić...
Na Bulevardu je fanj lepeh stareh kuć ke stručnjaki hvale. Jedna od njih je kuća na atrese Bulevar oslobođenja 23 va koj je sad Hrvatska gospodarska komora a kada je storena 1912. leta va njoj je bil Kraljevski šumarski ured pa ju judi popularno zovu Šumarija.
        Druga ka se mane jako pijaža je vila storena za Kuzmeta Cuculića. Postavna je na onen velen zavoje na zapadne strane Trga braće Mažuranić a storena je 1897. po projekte arhitekta Giovannija Randicha. Va prizemlje je nekada bila butega a pred malo je bil kafić s domaćen imenon Zanzibar. 
Tu je još jedna kuća ka se mnogen zamerila. To je kuća Hrvatskega zavoda za zapošljavanje. Mnogi nezaposleni ujdu nutra s nadun a vanka shajaju s grčon va želuce aš dela ni a dečica doma plaču.
Na najlepjen meste Bulevarda je i zgrada ka je od seh sušačkeh najveć dobra donesla ovemu kraju. To je Sušačka gimnazija, škola va koj se je vadil mnogi naš i svecki stručnjak. 1896. je storena po nacrteh arhitekti Ludwiga i Hülssnera i najprvo se je zvala Kraljevska gimnazija na Sušake. Storena je, hvala mu budi, s velen zalaganjen Izidora Kršnjavega ki je va strašno tešken vremene uspel prorivat ovako velu stvar za hrvacki narod na oven terene. Osandeseteh 20. stoleća je nosila ime Gimnazija Mirko Lenac, da bi se danas zvala Prva sušačka hrvatska gimnazija v Reke.
Od Piramide do gimnazije more se prit po Gimnazijskeh skalah ke da su storene 1925. od kastavskega kamika. Skale su opasne aš se mora pasat preko pruge a judi su rastrešeni i ne paze jako. Kad san već to spomenul... Malo daje prama Reke, zgora Sušačkega nebodera, je još jedan prelaz preko štreke. Tu je malo potla Drugega rata jedna mlada Trsaćanka šla preko i, za zlo, noga joj se je nekako zaglavila med šinu i prolazon a vlak gre. Vlak tuli, se je bliže, ona zvlači nogu a noga neće ni maknut. A ona, šegavica jedna, se je na brzinu zula z postola i skočila na stran i tako se spasila od sigure smrti. Ma kad je doma prišla jih je čula aš je vlak rovinal postol. 
Na Bulevardu su, kuliko znan, tri crekve. Prva je župna crekva sveteh Ćirila i Metoda ka se je preuredila z kapelice Sestar Milosrdnic va crekvu Presvetega Srca Isusovega 1931. po projekta Davida Bunette. 1938. je storena župa sv. Ćirila i Metoda po ordine biškupa Viktora Burića a za prvega župnika je postavan vlč. Martin Bubanj ki je pred kraj rata strejan va Kostrene. Ta crekva je teh let već bila mića za se veći rast Sušaka pa se je mislelo storit novu, veću crekvu. Već 1931. su storeni neki projekti za novu crekvu kot npr. Josipa Pičmana ki je crekvu smestil kade je bilo namenjeno - na meste današnjega parka A. Cesarca na Pećinah. Vreme je pasevalo, storil se i novi Regulacijski plan Sušaka ki poziciju crekve premešća i postavja va one, i danaska neobdelane, vrte na dnu Kumičićeve. Taj projekt je storil slavni kipar Ivan Meštrović. A onda je prišal rat pa je Sušak ostal prez te crekve.
Druga crekva je Kršćanska adventistička crekva va ulice Lj. Gaja na broje 5. Vavek kad pasujen kraj nje gjedan kako su neke škuje na njeje severne facade kot od metki. Morda još od Drugega rata!?
Treta je mane najlepja. To je pravoslavna crekva svetega Đorđa. Smešćena je na Parize, med ulice J. Rakovca i I.G. Kovačića.Kad je Reka potpala pod Taliju pravoslavnen vernikon s ovega terena je crekva ostala va druge države. Zato je storena parohija na ovoj strane Rečini a prvi paroh je bil Simeon Omčikus (hm, Zdenka Omčikus je krajen šezdeseteh 20. stoleća bila pedagog va škole na Vojake. Morda mu je bila kćer?). Storili su odbor za gradnju nove crekve čigov precednik je bil Špiro Marčeta, vlasnik hotela Kontinental. Po projekte arhitekta Momira Korunovića z Beograda poduzeće Borena Emilija storilo je crekvu i predalo ju pravoslavnoj zajednice va setenbre 1939.
Lep je Bulevard a najlepji njegov partić je vodosprema - vidikovac okolo kega je storen parkić pa se se skupa zove, nisan mogal verovat kad san to videl, Park Lole Ribara. Vodosprema je storena pred Prvi svecki rat kad je sušačka općina odlučila storit svoj vodovod i vodu Sušačanon pripejat skroz od zvira Rečine spod Kičelja. Va parke je i jedno mićo, slabo održavano, jezero va ken se sako tuliko dave kornjačice i zlatne ribice. Škoda, aš ov parkić bi mogal bit studenton ki se misle bavit građevinarstvon primer kako trebe delat makar i objekti za industriju.
Još je jedan majhani park, samo mrvicu južneje od vodospreme. To je Park Franjota Paravića Bobija va ken je spomen ploča poginulen partizanon. Nekada se tako zvala osnovna škola ka je bila va zgrade Gimnazije pa se počela pomalo gasit. Najprvo krajen šezdeseteh su ostali samo nižji razredi a od 1992. je zasen zaprta pa deca gredu najveć na Vojak va školu Vladimir Gortan ča je za decu fanj dugo a, da se ne zazova vraga, i opasno.
Drugi, veli problem Bulevarda je ča fali mesta za parkirat avuti. Još osandeseteh je to bil problem ovega dela Reki a kako je danaska motoriziranen stanaron moren samo mislet.
Još je jedan veli problem Bulevarda, pogotovo staren juden a tamo je takoveh ohoho. Kurjera broj 8 vozi tako na retko da se judi raje spuste hodeć do grada nego nju čekat. Ja, ma se rabi i vrnut a na zgoru je puno teže.
I to bi bilo to ča se tiče elitnega dela Reki - Bulevarda ki je lep ma ima, kot i se, i slabeh stran.

[milić]

Zač je nekad Sušak bil lepji

Ovako šjora Larisa Grčic-Simeunović va stručnen rade Suvremena toponimija k. o. Sušak nabraja deli Sušaka (uži del a ne bivši grad Sušak!): Baroš, Delta, Brajdica, Rečina, Donji Bulevard, Bobijevo, Kartera, Banska vrata, Vidikovac, Gornji Bulevard, Derenčinovo i Piramida. Pa homo malićo zbliza pogjedat neke od oveh deli.
Kad se spustiš po Kumičićevoj ulice i pasaš podvožnjak zgora kega je pruga prišal si na Sušak, baren je mane tako. Nažalost prvo ča moreš videt je 13 črjeneh tub ka su rastegnjena zmed dve kuće. To je spomenik mladićen strejanen na 10 marča 1945. jušto na teh skalah. Najstareji od njih je imel 35 let a drugi skoro si dvajsetak. Pred pet let je va Noven liste va rubrike Sjećanja zašal oglas kade se je Dušan Perhat spametil brata Josipa ki je tu strejan prvo 70 let.
Sada smo na dele grada ki zovemo Piramida. To ime je došlo od vele piramide od kamika ka je tamo postavna 1728. na početke/kraje Karolinske cesti kot miljokaz. Na njemu piše da je od Reki do Karlovca 60.000 koraki ča bi bilo oko 89 kilometri. Kad je 1833. storena Dorotejska cesta na piramide se je dodal zapis, neč kot va čast i slavu kraja Franjota I., nadvojvode Josipa i guvernera Ürmenyja. Napisano je još i da je cesta dobila ime po Marije Doroteje, žene od nadvojvode Josipa. Po  Dototeje, kako su ju nazvali, si s koli mogal prit do Martinšćice kade je bil lazaret sv. Franjota. Piramida je dvaput premešćana zarad širenja cesti. Prvi put trejseteh let pasanega stoleća a drugi put 1978. (Istočni izlaz!) da bi 1982. bila postavna pul kuće Gaber, na mesto kade je i danaska.
Piramida je blizu kuće Ružić. Prelepa kuća ka je zgubila fanj od lepote zarad dveh cest ke pasevaju pul nje a po keh je jak promet. Storena je 1888. po nacrteh arhitekta Julijota Stanisavljevića. Va vreme kad je delana bila je nad plažu.
Okolo te kuće se je svil Istočni izlaz, jedan projekat od vele potrebi. On  je, nažalost, šundral ovu kuću al je odčepil cesti po grade. Promet je bil tuliko začepjen, pogotovo va vreme turističke sezone, da se je po pol ure vozilo kroz grad. Istočni izlaz je  26. 7. 1979.  službeno pušćen va promet potla veleh problemi od keh je najveći bil kad se je zrušil vijadukt ki je bil skoro finjen. Negdere san pročital, a i neki filmić postoji, da je ovo križanje pul kuće Ružić najnaredneje za storit karambol v Reke. Avuti se bubaju i po dane i po noće i po suhen i po mokren.
Gremo daje po Strossmayerovoj. Tu je jedna noveja zgrada. Po načine gradnje bi reć da je storena negdere okolo 1960. i va njoj je bilo poduzeće Konstruktor. Va prizemlje je pak bila butega od Torpeda. Majko mila, se pokojni!
Daje, na istoj strane, je kuća Rudan. Tuka, va njoj, na prven kate su bile prostorije od Aero-kluba Krila Kvarnera kade san 1975. šal na tečaj za zračnega jedriličara. Nisan nikad letel aš san proglašen od strane duhtora kot nesposoban za letet zarad zdravstvenega stanja (povišen tlak!).
Sada još malo naprvo i već se vidi Hrvatski kulturni dom al Hotel Neboder al Sušački neboder, kako ga judi najraje zovu. Kad je delan to je bil veli korak, morda i preveli, za Sušak va ono vreme. Čini mi se da je sušačka elita otela pokazat onen Fijumanon preko Rečine kako imaju i moreju. Projekt je storil Josip Pičman ki da se je ubil dan prvo leh ča će mu prit telegram da je njigov rad pobedil na natječaje. Dom je imel kulturni, javni i turistički značaj, se ono ča je Sušake va to vreme falelo. Delan je od 1936. pa do 1947. a smiron je kljaštren, med drugen ni storen ni bazen ki je bil va Pičmanoven projekte.
Malo mislin ča je mane Neboder značil? Okolo 1972. smo tamo užali poć na pijaču va popularnu Četrnajsticu - kafić na 14. kate nebodera. Kašneje je ozada bil disko klub Stereo va ken san bil par puti. Ča se tiče kina, ko je nekada bilo tu i zvalo se je Neboder, ne znan san pet puti bil va njemu. Kad je kazalište bilo tu preseljeno volel san pogledat kakov mjuzikl al dramu a već devedeseteh san užal pogjedat ku i ku predstavu na Festivale malih scen.
Od HKD-a smo se spušćali po skalah i videt je na desnu stran školu Centar. Ta škola je storena 1887. po objedinjenen projekte arhitekti Mateta Glavana i Julijota Stanisavljevića. Škola je važna aš je to prva zgrada škole na terene današnjega Grada Reki va koj se je vadilo na hrvacken zajike magari je škola delala od 1875. al po privatneh kućah.
Preko puta je još jedna škola ku su pasali mnogi moji prijateli. To je Građevinska škola storena 1909.
Zmed teh dveh škol je 1938. postavan spomenik Kralju Petru I. Velikom Oslobodiocu, kako su ga nazvali. Autor tega spomenika je bil naš, sušački kipar Vinko Matković, isti on ki je storil i veli Spomenik oslobođenja na Delte 1955.
Blizu teh škol va ulice Milana Smokvine Tvrdog je bila dječja knjižnica va ku san rad zahajal okolo 1966. se do jenega dana kad su me neki mulci okružili, skacotali i zeli novu baretu s frontinon ku mi je mama kupila za rojendan. Od onda san raji posujeval knjigi va školskoj biblioteke.
Malo daje, prama istoke, je već pozabjena i napušćena od seh, sušačka placa ka je počela delat okolo 1926., kuliko san uspel nać, i delala se dok je ni Istočni izlaz pojil. Va ono vreme je bilo normalno da je otprta kad je Sušak bil va druge države. Povedal mi je jedan prijatel Trsaćan kako je na kraju šezdeseteh pomagal none ka je prodavala na toj place. Sako jutro je na jednen karetiće pejal verduru a i črešnje kad jih je bilo na placu. Od Trsata preko bulevara do place. Otac mi je povedal da su na toj place Gromičani prodavali i drva a Kastavcen je naredneja bila Žabica.
I tako, malo-pomalo prišli smo do Titovega trga, kako se danaska zove nekadanji Jelačićev trg, srce Sušaka. Na trge se je lepo smestil hotel Kontinental, naš dragi Kont pun lepote i uspomen. Hinko Bačić, načelnik Sušaka va ono vreme, je naručil od domaćega arhitekta Mateta Glavana projekat za tisti hotel. A Mate se je fanjski potrudil i storil projekat kega se ne bi posramili nigdere na svete. Hotel je finjen 1888. i od onda se okolo njega vrte lepe i manje lepe priče. Ja ga baš i nisan volel ma okolo 1975. se je moje društvo počelo skupjat pred njin a onda i sest nutra, va kavane ka je bila desno kad se ujde na zapadni ulaz, a slastičarna je bila levo. Bil je i restoran va prizemlje ma va njega se je šlo kroz vrata ka su na strane prama Rečine. Kamare od hotela su bile gore, na kate. Va prizemlje su bile butege Akvarij a kasneje i Rafaela ka je bila specijalist za kožne jakete. Pul Strossmayerove je bila butega od Vodosprema ka je devedeseteh zaprta a i danaska je tako. Na tarace, pod kostanji bilo je lepo sedet kad su bile vele sparine po lete i jist đelato Amerikano al pit ajs-kafe.
Trejseteh let 20. stoleća Sušak da je bil pun života, butege i oštarije su veselo delale. To je bil gradić va ken je škerci delal famozni Frane Pitur. Kuliko je prič o lepen predratnen Sušake ni niš čudno da ga doživjevamo lepšen leh je morda i bil.
Danaska je Sušak zapušćen, butege zaprte, izlogi blatni... Ma jedna vela žalost je postal naš dragi Sušak.

[milić]

Zač Rečina ni Rečica

Ležin na kauče, gjedan va štuk i razmišjan. Zač Rečinu, Ričinu al po službenen Rječinu ne zoveju Rečica, Ričica al Rječica? Ako ti je neč drago, lepo, sinpatično reć ćeš to va deminutive, kako se za takove besede reče va hrvacken zajike. Ma ne, mi rečemo za miću reku va augmentative - rečina kot da je to Dunav al Sava. Mislin da je to zato aš su se judi bali te reki ka je va prošloste delala dosti problemi i potekovanja. Tr i va Klane za potok reku Ričina aš se je i ona dosta put zlela van korita. Zadnji put je to bilo 10. 9. 2017. Da ne gledaju va štuk i razmišjaju od bedastoć Talijani su Rečinu zvali Fiumara al Eneo.
Homo obać Rečinu od zvira do mesta kade se uleva va Jadran po točkah ke su mane poznate.
Rečina zvire spod brda Kičej a zvir je ograjen aš se otuda voda šaje va Sušak. Ta zvir da je tuka od 1870. aš prvo da je bil spod susednega brda Podjavorja. Prvo selo ko je do zvira zove se Kukujani a i Studena ni niš daje. Od zvira Rečina leno teče a pul nje se je rastegnulo nekuliko ravnic kamo smo s kolegami od dela užali doć igrat nogomet i roštiljat. Na ceste, ka gre od Zoretići do Kukujani, je jedan most preko Rečine. Taj del Rečini san dosta dobro upoznal aš, dok san bil frkalos, san sako leto bil po mesec dan va Studene pa smo se užali čez Jurišin spustit kupat i ribe lovit na Rečine. Po lete Rečina presuši i ostanu samo kalići a kade i kade malo dubja voda. Va teh kalići ostane i riba - pastrva ku moreš i z rukami ćapat. Pomalo zavučeš ruku pod kamik kamo se je riba skrila, našlataš je i ćapaš za škrge i zivučeš vanka. Jedanput je prijatel J. zvukal jednu ribu od tri kvarti kila.
Na Trnovice je most o kemu mi je mat povedala kako ju je bilo strah kad je s kurjeru šla za Sušak. Tuda je pasevala glavna cesta do Kastva dok ni storen most na Pašce. Va Trnovice da je bil malin va kega su ženske, pa tako i Studenke, nesle frmentu mlet.
Zdolu Rečina zavojito teče i pride va Martinovo selo kade je jedini mlin ki još dela na Rečine. To je Gašparov mlin kega je se do smrti, pred malo više od leto dan, držal moj kujin Bruno Kukujan. Na ceste ka gre prama Lopače je most na meste kade cesta paseva preko reki.
Pul Grohova, istočno od Petrolejske ceste, Rečina je zarobjena. Tuka je 1966. storeno akumulacijslo jezero (i potopjeno selo) Valići za potrebe hidroelektrane Rijeka. Otuda daje je korito Rečina prez vodi se do ispusta z HE osim kada je jezero puno pa pušćevaju višak. Pul Grohova je 1554. bil most kega se najprvo spominje va knjigah.
Pul Pašca je most storen 1960. aš je on ki je bil tu od 1932 zrušen,  kot i drugeh 14, kad su se Njemci 1945. povlačili.
Na Rečine, pul Orehovice, su bila dva vela malina. Gornji je bil Matešićev a niže je bil malin va Žaklju. Još malo niže je jedno mićo, kot da bi, jezero va ken su se Trsaćani užali kupat.
Sad prihajamo do mosti Rečke obilaznice, siguro najzahtevneji objekti obilaznice. Severni most storen je 1984. al je ta del cesti otprt 1988. a južni 2009.
Rečina prihaja pul pokojne Hartere, ka neka počiva va mire. Kako piše šjora Matejčić Rimska cesta, ka je šla od Trsta do Senja, pasevala je pul Tarsatice a preko Rečine se je šlo z barkun pa daje prama Senje. To mesto kade se je šlo preko je na današnjen Titoven trge.
Rečina je kraška reka i kad se je topil sneg al su bili jaki dažji ona dobije jako puno vodi i forci tako da sobun nosi i kamene i pesak z Gromišćine. To se pomalo slaže pa si je ona, malićo s pomoću judi, produževala korito i delala novi tereni. Ma užala je storit i velu škodu pa se je odlučilo storit joj novo, širo korito. Novo korito je storeno 1855. a staro je ostalo, va njega je zašlo more i dobilo je ime Mrtvi kanal. Zmed Mrtvega kanala i novega korita Rečini storen je jedan veli teren kega su nazvali, zarad tega ča sliči na grčko slovo, Delta.
Pred jedno četira leta bil san na jednen predavanje kade je profesorica s Građevinskega fakulteta Ivana Štimac Grandić govorila o Rečine i mosti ki su storeni (i zrušeni) na njoj. Pokazala nan je i jako dobar diplomski rad Lucije Kuželički na tu temu kega san uspel fanj poslikat. Profa je rekla da je Rečina duga 17,3 kilometri (videl san i drugeh podatki ma si su manji od 20 kilometri). Prvi most, za kega se zna da je bil na današnjen Titoven trge, je storen 1640. magari Andrija Rački spominje da je bil i jedan kega je dal storit trsatski kapetan Gašpar Knežić 1601. ma da je kratko dural. Most kega je spomenula profesorica je bil drveni i više puti je popravjan a 1753. je zamenjen s noven ki se je mogal obrnut kako bi brodi mogli doć skroz do Školjića. Rečina je, znači, va to vreme bila i luka. Kad je Rečina 1855. dobila novo korito storen je novi most ki je bil prvi od železa. On je dural dok ga arditi nisu zrušili za Božić 1920. Već 1921. malo zgora ovega zrušenega Talijani su storili provizorni drveni most a preko Rečine je storen i drveni most med Sušakon i Deltu ma po njemu se je moglo pasat samo hodeć. Novi pogranični most storili su Talijani na račun Nettunskeh konvencij a pušćan je na korišćenje za Staro leto 1926. Taj je dural do 1943. kad su ga va Rečinu zbatili partizani po kapitulacije Talije. Za silu je popravan da bi ga Njemci zrušili na kraje Drugega rata.
Potla tega rata pala je vela odluka - most ki će spojit Reku i Sušak mora se storit čin prvo i to ne samo zarad pasevanja semo-tamo. I most se je delal na ho-ruk. Projektant Kruno Tonković uz pomoć Božidara Rašice i Zdenkota Strižića predvidel je dva mosta - jedan cestovni a drugi za pešaki. Mosti su storeni i predani za promet 23. 10. 1946. od strane, va ono doba pršone broj 1 va Jugoslavije, Titota. Ti mosti su još tamo i nadan se da će trajat još dugo aš i fizički povežuju Sušak i Reku.
Spomenul bin još samo tri mosti. Prvi je ov od železnice storen 1873. a rušen 1920. od D'Annunzijotoveh soldati i na kraje Drugega rata od Njemci. Popravan je 1947.
Pokretni most na ulaze va  Mrtvi kanal, ki je storen 1896. omogućeval je velen jedrenjakon da moru doć duboko na Fijumeru. Morda bi se i danas vrtel da ga 1972. ni pokvaril brod Branco kad je bubnul va njega. Obećano je da će ga popravit aš je osiguranje platilo škodu a i konzervatori ga drže kot zaštićeno kulturno dobro. Ma od tega ni niš! Zato se moran, kad me prijatel Ž. peja z barku na foto izlet, vas zgobit da ne šviknen s glavun va njega. Dajte judi - popravite tisti most! 
I treći most kega bin spomenul je Most hrvackeh braniteji z Domovinskega rata. Most ki je preko Mrtvega kanala spojil Jelačićev trg i Deltu s ke su braniteji šli branit Hrvacku. Osim ča je lep va mane, saki put kad pasan preko njega, probudi uspomene na dane kad je rečka mladost šla va obranu naše Hrvacke a mnogi se nisu vrnuli čigova imena su zapisana na velen bloke od granita. Projekt je storil arhitektonski studio 3LHD a samu čeličnu konstrukciju i montažu načinil je 3. maj 2001. Ov projekt mosta je dobil fanj nagrad od struke magari neki nisu bili kuntenti š njin.
Mosti va užen dele Reki je pun klobuk, kako bi rekal moj nono. Smiron se delaju novi i nikad jih dosti. Za kraj ću van prepisat si mosti v Reke na Rečine i Mrtven kanale a kako jih je 2011. nabrojila mlada inženjerka Lucija Kuželički: Pokretni most na ušću Mrtvog kanala, Most na Mrtvom kanalu u sklopu Istočnog izlaza, Most hrvatskih branitelja, Željeznički most na ušću Rječine veći, Željeznički most na ušću Rječine manji, Željeznički most, Most u sklopu ceste D-404, Most na Rječini u sklopu Istočnog izlaza, Južni most, Pješački most simbioznih mostova, Cestovni most simbioznih mostova, Sjeverni most, Željeznički most Rijeka - Zagreb, cijev, Hartera, vodozaštitno područje, Hartera viseći mali, Hartera, cijev, Južni kolnik riječke zaobilaznice, Sjeverni kolnik riječke zaobilaznice. Se skupa 21 komad.
Pa drugi put kad pasate preko kega mosta na Rečine zmislite se kakoveh muk je bilo za storit ga. Mosti su storeni da povežuju jude a ne da jih razdvajaju.