Zač...

[milić]

...
                                 

[milić]

Zač ne volin baš jako Đardin?

Đardin, čigovo je današnje "službeno"  ime Park Mlaka, pametin od kad znan za se a si moji su ga zvali baš ovako - Đardin aš mu je ime, kad je otprt na kraje 19. stoleća, bilo  Giardino Pubblico. Dešenj da je storil Filibert Bazarig 1874. leta dok je načelnik Reke bil Giovanni Ciotta. Del na ken je park storen zval se je Cecilinovo a čul san da ga i danaska neki judi zovu Cecilinovo.
Cecilinovo je staro ime ko je nastalo prama crekvice ka je bila posvećena svetoj Cecilije. Crekvica je bila va dolnjemu, zapadnemu delu današnjega parka pul potočića Mlačica. Crekvicu spominju još 1418. a bila je zapušćena i zaprta 1789. leta. Opeta je otprta 1876. ma su joj dali drugo ime po svetemu Andrije. Crekvica je na kraje zrušena va bonbardiranje savezničkeh avijoni 1944. Va to vreme je, skoro na istemu mestu, već zirasla nova, vela crekav Presvetega Otkupitelja. Tu crekav, ka je isto stradala va teh bonbardiranji, su do kraja zrušili "graditelji" kad su delali autostradu, kako su ju zvali, prama Kantride 1948. leta.
A sadahna pušćajmo na mire crekve i homo va vreme čigov san ja živi svedok.
Prvo čega se domislin o temu parku je to da okolo 1960-ega leta sedimo na jednoj klupice mat, otac i ja. Moj otac je delal va luke i taj dan smo mu z Pehina prnesli obed va gamelice aš je delal prekovremena. Jedanput znan da san se va Đardine našal z nonoton pa smo sedeli i ćakulali a i neki soldi mi je dal za oca. Tamo smo se našli aš nan je bilo naredno - on je raznašal mleko po Podmurvicah i Mlake a ja san tuda šal va Tehničku školu.
Va školu san šal tako da bin se z kurjeru dopejal do Mlake a onput zgoru, kroz park do školi. Me par da još ni kurjera z Vežice pejala kroz Čandekovu, morda je počela kašneje, kad san šal va drugi razred. Školu smo imeli zapolne od ure i kvarat. Tako smo jedan dan šli z Vežice D., Š. i ja kroz park va školu kad su pred nas skočili frkalosi stari nekako kot i mi al jih je bilo desetak.
- Daj banku (10 dinari)!
- Nemam!
- Daj cigaru!
- Ne dam!
I počela je matafunada. D. i Š. su dobili par kacoti ma su nekako pobegli a ja san ostal okružen z barufanti. Nikad do tada ni otada nisan dobil tuliko matafuni.
Druga grda stvar z tega parka je bila kada smo se vrnjali z školi i Ž. se je nekako odmaknul od nas nekeh desetak metri a mi smo počeli, prez nekega razloga, hitat kamiki za njin. On se je nebog skril zad jenega debelega dreva a mi smo ga gađali kot da je na streljane. Ja san ćapal jedan veli kamik i pošinul ga prama njemu. Jušto san videl da ta kamičina leti pul dreva i ako Ž. samo pošpija zad tega dreva će ga pogodit. Za velu nesreću, on je pošpijal, kamik ga je zadel va glavu, ćapal se je za oko i zavapil:
- Ajme, oko!
Brzo smo šnjin, onako krvaven, pasali va bolnicu, na hitni, kade nas je duhtor pital kako je to bilo. Mi smo mu se povedali a on nas je grdo ošpotal:
- Dečki, dečki malo ste preveliki da se igrate kamenjem.
Ž. je dobro pasal aš mu je ostal "leh" senjal na obrve i spod oka. A ja od tega dana nisan kamik hitil pa ni onputa kad je more zbonacano kako bin storil ku žabicu.
Okolo 1970. otprli su kuglanu od iNE na dnu parka pa smo saki dan tu prihajali na kafe i biru potla školi. Par puti smo i hitili kugle a najboji med nami je bil D. kemu je par puti i prasica z sirenun zatulila.
Bilo nan je jako zabavno i kad bimo skakali preko potočića, sadahna znan da mu je ime Mlačica. Jedanput je taj isti D. skakal preko potočića i nekako se je podrsnul i počel padat va njega. Vrah zna kako je uspel z drugu nogu se odrinut tako da je samo jenu nogavicu zmočil.
Kad san već delal va 3. maje fanj puti san bil va Sindikalnemu domu ki je nekada, trejseteh let pasanega stoleća kad je storen, bil Casa di fascio. Va njemu su užale bit izložbe, gledali su se filmi a i tancalo se je va njemu.
I danaska volin po Đardine prošećat ma jako na retko aš mi ni naredno a i saki put se domislin oneh matafuni ke san tuka, ni kriv ni dužan, dobil i onega nesretnega kamika ki je mogal Ž.-u oko zbit.

[milić]

...
                             

[milić]

Zač se Baračeva ulica na Mlake ne zove Ulica propale rečke industrije

Neki dan san šal slikat svetionik na Mlake aš ga nisan valda nikada slikal, kad ga nisan našal med mojmi slikami. Sel san na bus broj osan i pasal do kraja, do porte od bivšega Torpeda. Hodeć prama svetioniku mislin ča znan od firmi Torpedo? Malo i puno. Prvi mi je na pamet prišal barba Franić Lucićev, naš sused z Pehina, ki je šezdeseteh bil Torpedov penzijoner. A onputa i mnogi drugi moji prijateli i poznati ki su tuka delali. Došal mi je na pamet, normalno, i Whitehead i moj šef ki je govoril da biva va Vitehedovoj kuće i Lupis i potok Rečice i...
Gren tako daje pa gledan va ki portun se ono zavije nutra kade je bilo skladište bivšega Brodomaterijala na Piope ku mnogi zovu Pod jelšu a mpji Studenjci bi rekli Pod jevšu aš je jelša po hrvackemu standardu - topola. Va ten skladište su, med drugen, držali i vide. Va njemu san bil par puti dok san delal va 3. maje. Nisan već sigur da bin zašal na pravo mesto. Se se neč preuredilo al pravega šušura, kega se domišjan, nisan ni čul ni videl.
Gren ja pomalićo napred i priden do naše slavne a sadahna pokojne rafinerije na Ponsalu. Va njoj je delal i moj pokojni brat a i još nekuliko Studenjci. Prvo, ča se rafinerije tiče, mi je prišlo na pamet kako smo kot dečina na Pehine z pituru premaževali čepi od motornega uja a barba D., ki je tamo delal, je z nekakoven štambijon na njih stavjal novo ime. Sedandeseteh je bila premija va INA-e delat. Kakove plaće su delavci imeli! A i lepi stani su se delili. ROMSA počela a INA nastavila. Ča je neboga dočekala! Pred oko dva leta san bil z drugemi člani Udruge 051 va vižite i nagledal se ruzinaveh rezervari. Mađari dali - Mađari zeli. A tulike familije je odgojila i odškolovala.
Daje, po pute prama svetionike, je bivši hotel Emigranti va ken je mnogi emigrant prespal prvo partence za Meriku. Va njemu je od 1963. bila Tvornica ambalaže 8.mart ka je kašneje nazvana Metalografički kombinat va ken je moja teta Mera delala dok joj nisu škare odsekle kazalac.
Konačno san i do svetionika došal.  Govore za njega da je svetil na tri mesta. Prvo, od kad je zasvetil 1884. leta, mu je bilo na današnjemu Molu Longu ki je onda bil kraći i nosil ime po Marije Terezije, drugo mesto od 1894. mu je bilo  ono kade je i danaska samo ča je bil va razi z zemju a treti put su ga zdignuli vajer 1934. na skoro četrdeset metar. Lepo ga je videt a nadan se da će još ko leto svetit.
I malo-pomalo, korak na korak san došal do Mlake ka je zame baš na toj veloj raskrsnice i sto-dvesto metar okolo nje. Govore da je Mlaka ime dobila po terene (mlake) ki je vavek bil natopjen z vodun od dva jača i dva slabeja zvira. Ta dva jača potočića se spajaju va jenega kemu su ime dali Mlaka ki spod današnje Zvonimirove paseva pod zemju pa daje pul Baračeve i rafinerije finjeva va moru.
Stojin na privremene stanice, čekan kurjeru za doma i mislin kako su se te ulice nekada zvale. Ova ča peja v Reku se je zvala via del Pino pa Corsia Deak pa viale Mussolini pa Ulica G. Duiz pa Kidričeva a danaska je to Krešimirova ulica na ku se nastavja Zvonimirova. Nju pametin kot Bulevar Marksa i Engelsa a kad je storena 1949. se je zvala Autostrada Narodne fronte. Današnja Ulica Milutina Barača, ka gre prama Kantride i dok ni storena Autostrada NF, je bila glavna cesta po koj je i tranvaj pejal je prvo bila via Volosca onput via della Industria, viale Italia, viale Ciano, Ulica JA pa JNA i do 1992. Industrijska ulica. Tu je još i Ulica Podmurvice ka se je nekada zvala via Gelsi.
A i ulica Luki je tu ku zadnju spominjen. Zač? Aš su va njoj bivali oni mulci ki su me zbaketali va Đardine i na ke san još jadan. ta ulica se tako zove od 1949. leta kada je oprta Autostrada Narodne fronte. Najprvo, ča san videl na kartah je bila Via Serpentina do 1910. pa Via dell Istria do 1919. i Via della Santa Entrata, na spomen D´Annunzijotovemu pohodu na Reku.
Va toj ulice je bival moj dragi prijatel i kolega z 3. maja Ž. ki mi je sakakoveh pričic napovedal va oveh četrdesetak let ča se poznamo. I kako je neki lučki delavac pedeseteh let kupil mobiliju ka je koštala si soldi, ma da mu armar ni mogal pasat kroz vrata od stana pa se domislel kako će ga ipak zrivat nutra. Bival je na prvemu podu pa je to mislel storit kroz poneštru. Zamolil je mulariju da mu pomoru kuliko moru zdignut a onputa će on sam z špagon, kega je omotal okolo armara, zdignut daje. Dečica su zdigla a sad je bil on na rede dofinit delo. Ma je nebog lavorator precenil svoje moći. Natezal je a špag mu je sklizal med prsti. Uspel je leh zazijat:
- Bižte dico!- i armar se je rastresal po marćapije. Žena je počela tulit da ča je storil a on joj je odbrusil:
- Ma ča tu cmizdriš za dvi daske.
Ž. mi je povedal i kako je oštar barba F., malo prvo leh će umret, šal duhtoru pa da mu ov govori:
- Barba F. sad morete se normalno jist i pit.
Barba da je samo žalosno promrmjal:
- Znači gotovo je kad mi niš ne branite.
Duhtor da je samo mučal i prehićeval nekakove harti.
Ma lepa je Mlaka pa i ulica Luki va njoj, a bila bi mi još lepša da me onputa nisu oni mulci zbaketali va Đardine.

[milić]

...
     

[milić]

Zač volin Kantridu

Kad sadhna ki spomene Kantridu zajno pomislin ne na 3. maj, va ken san delal, leh na stadion i Reku. Tuliko mi je ta trolist - Kantrida - stadion - Reka povezan jušto kot tri pera  na deteline.
Kako mi čakavci rečemo kantrida za stolicu tako se Kantrida i povezuje z kantridun. Pročital san negdere da je pul zapadnega ulaza va današnji 3. maj bil jedan veli kamičina na kega da su mogle sest tri pršone. Tuka su Kantridarke i Kantridari sedeli, počivali i ćakulali a blizu je i nekuliko potočići, ki se tuka zlevaju va more, moguće da je tu bilo jako živo dok su ženske prale robu.
 Zač volin Kantridu

Kad sadhna ki spomene Kantridu zajno pomislin ne na 3. maj, va ken san delal, leh na stadion i Reku. Tuliko mi je ta trolist - Kantrida - stadion - Reka povezan jušto kot tri pera  na deteline.
Kako mi čakavci, bar onisti ke ja poznan, rečemo kantrida za stolicu tako se Kantrida i povezuje z kantridun. Pročital san negdere da je pul zapadnega ulaza va današnji 3. maj bil jedan veli kamičina na kega da su mogle sest tri pršone. Tuka su Kantridarke i Kantridari sedeli, počivali i ćakulali a blizu je i nekuliko potočići, ki se tuka zlevaju va more, moguće da je tu bilo jako živo dok su ženske prale robu.
Mislel san i da je kantrida po talijanski - stolica i nisan bil dugo od istine. Po venecijanski je kantrida carega pa se oko tega vrtelo - kariga, katriga, katrida pa kantrida.
Kantridu, va svojoj knjige Hrvatsko primorje, D. Hirc opišuje ovako: "Bližnje mjestance zove se Kantrida. Maleno je to seoce zahladjeno visokim pistacijama i lovorikama. Sve su kućice u Kantridi  krčmice, u kojima se toči dobra kapljica, pa zato Riečani simo rado izšeću"
Potla Prvega rata Talijani su prezeli Reku i Kantride dali ime Borgomarina a kada je finil Drugi rat Kantrida je opeta postala Kantrida.
Za mane Kantrida počne od podvožnjaka va današnjoj Liburnijskoj pa nekako do Rečkega zavoja i od pruge nazdolun do mora.
No, homo mi od 3. maja pomalo pul mora prama zapadu.
3. maj je, prama hartah iz 19. stoleća, narasal na terene kega neki zovu Brgud a neki Brgudi. Nekada su Brgudi (tako ga zoven aš mi je Brgud na Učke) bili skroz do fabrike od torpedi a danaska je ostal samo on mići partić na ken je lučica od 3. maja koj i je ime Brgudi.
Da ni samo Brgud ili Brgudi upitno va 3. maje potrudil se je i potok Cerovica kega smo mi trećemajci tako i zvali a neki (npr. šjor Stražičić) ga zove Cerovice aš da se spajaju dva potočića va jednega kega da zarad tega trebe zvat va množine - Cerovice.
Kade je danaska ona vela zgrada od trećemajskega DMP-a nekada je bila tvornica Rade Šupić, a i kemijska fabrika je bila blizu, pul mora.
Pul lučice Brgudi je mića plažica na ke san se par put okupal kad bin z dela šal se propejat z čigovu barku. Nad tun plažu se je rastegnul Sporcki park od 3. maja a malo daje, pul mora je bilo nekada jako popularno kupalište Riviera z kabinami i banjinon. Tuka san kot otrok dohajal z Pehinari a okolo 1963. san počel i plavat. Zmišjan se kako se je, stareji su mi povedali da mu je tako ime, Enzo napuhnjeval na tranpuline i va more skakal. A mi mulci smo jedanput špijali i pravi seks va jenoj kabine.
Pul dečjega vrtića je jena mića plažica, a malo daje je lepa, vela plaža na koj je, pul igrališta, bila vela grota ku su razbili, me par osandeseteh. Kade je sad pomoćno igralište je bila isto plaža pa su celu tu plažu Kantridari zvali Vela plaža. Tu, pul nje, je portić z barčicami i baračicami ke su opiturane saka va svoj veseli kolor.
Zgora Vele plaže je još od 1912. leta igralište, fanj let zvir mojga veseja i žalosti. Va noveje vreme do njega je storena dvorana za atletiku.
Gremo daje, se pomalo, sad po more, i pridemo do mićega brodogradilišta. Škoda da je umrlo.
Onputa pride vila Nora ka da je storena za priležnicu od nekega austrijskega plemića. A tu, pul vile, se puno njih i kupa.
Sad prihajamo do velega kompleksa z bazeni a sprotu je storena i plaža Ploče. Nastavjamo plovit i već je tu Dečja bolnica ka je otprta va nadvojvodske vile 1924. leta  kot dečja kolonija za siromašnu dečicu.
Daje se nisan kupal na kantridarskeh plažah ma san čul da postoji još: Razbojna, Bivio, Skalete a verovatno i još ko mesto za kupat se.
Sada smo na Rečkemu zavoju pa homo hodeć pomalo nazada. Prit ćemo do zadnje stanice linije broj 1 Bivio - Pećine. I prvo je linija broj 1 vozila na Kantridu ma z Trsata a zadnja stanica je bila zgora stadiona, na kraje autostrade Narodne fronte, kako su cestu zvali 1949. kad je finjena.
Starački dom je par-sto metri daje od zadnje stanice na Bivije. Njega san dobro poznal aš mi je mat bila va njemu više od dva leta.
Stotinjak metri zgora mićega brodogradilišta je osnovna škola Kantrida ka je storena 1968. leta od samodoprinosa kot i fanj drugeh rečkeh škol. Prvo je škola, od 1909. leta, bila tamo kade je sada Centar za rehabilitaciju a vadilo se na hrvackemu zajiku do 1923. kad su va škole počeli govorit po talijanski, se do 45. kada je škola opeta postala hrvacka.
Blizu škole je pokojna Riječka industrija odjeće, naš dragi RIO. Čitan va novinah da će se na ten terene, ki je, trebe priznat, na lepen meste, srorit palaci. Samo da se ki ne zmisli pa i školu proda i stori tuka, recimo, hotel.
Kantrida ima i svoju crekvu posvećenu svetemu Antonu Padovanskemu ka je va Bujskoj a ima i samački hotel, popularni Toblerone za čigov projekt je škoda da se ni raširil.
Evo, to je na brzinu Kantrida a ja san duboko š njun povezan. Celi moj radni staž san odelal va 3. maje, proplival na Rivijere, veselil se i plakal na igralište, igral nogomet na trećemajskemu sporckemu parku dok još ni bilo dvorane a i onda kad je storena, prve lignje na žare san pojil va nekadanjoj oštarijice pul igrališta ka se je zvala Arena, jil čvapčiće prvo utakmic va al pred Jadranon ki je sad postal Ribice. Va Miramareu san potla utakmic jil tripice, sastajal se va Mini motele z prijateli, kupal se gol z kunpaniju pul grote...
Puno, puno je lepeh odgovori na pitanje zač volin Kantridu.

[milić]

...
                         

[milić]

Zač obožavan Kastav

Već fanj put san, va društve, rekal da je jedino drugo mesto van Reke va ken bin proval bivat Kastav. I to ne va nekoj veloj kuće leh va centre Grada pa kad ki poznat pasa lepo pokuca na poneštru i pita te kako si a ne uvde kad va lifte gledaš judi ke ni ne poznaš a čuješ da bivaju va zgrade već 5-6 let. Kastavci reku Grad za mesto na bregu visokemu 365 metar i ko je već 1400. imelo statut ki je napisan na glagoljice a puno ime mu je bilo Zakoni grada Kastva zapisani po rojstvu Isusa Krista let gospodnjeh tisuće četira sto. Judi ki bivaju va Grade su Grajani a van nekadašnjeh zidin su Kastavci. Znan da će se neki name jadit zač ne pišen Kastafci ma ja san navadan ovako a kemu pači neka ne čita.
Mislin da ta moja jubav prama Kastve ni nastala slučajno leh to valda saki Kastavac posiše z materinen mlekon. Magari su moji mat i otac Studenjci, ča bi se reklo - nisu pravi Kastavci, vavek su lepo i z puno jubavi govorili od Kastva i Kastavci. Pa i kad su mi, kot mićemu, povedali smešice o temu kako su Kastavci sadili srdelice, kravu na turanj dizali da pobrsti bršjan, crekvu na drugo mesto rivali...
Otac mi je povedal kako je z nonoton a i svojen ocon užal poć va Kastav. Z nonoton najveć puti za Belu nedeju a z ocon po sakidanji dan, kad je ov imel kakov sastanak aš je trejseteh let pasanega stoleća bil odbornik al tako neč va kastavske općine.
I tako san ja najprvo z familiju a kašneje i sam počel prihajat va Kastav. Priden do Šporove jami, kade je oštariju držala moja prerano umrla kujina S., pa pomalo nazgoru do grobja ko rado obajden i poćakulan z poznatemi, najveć trećemajci, ki tuka počivaju. Hitin oko na školu i čuvaricu grobja - crekvicu sv. Lucije. Na križanju za va Grad se domislin da je tu negdere bila i Prašćarija kade su moji prašćiće kupjevali za gojit. Pasan pul Belvedera, pogjedan prama Dukićon i na hodeć pozdravin kastavski trolist ki kot stražari hrvatstva stoje pul Fortice.
Zavijen na Forticu, hitin oko na Opatiju i Lovran pak se zmislin kako su Kastavci z kanula od bazga tukli po Lovrane. Nasmejen se na vas glas va sebe i pomalićo, korak na korak, daje. Zdesna pride crekva sv. Fabijana i Sebastjana a onputa još malo, pa smo pred Ložun. Stojin i mislin kakove su se odluke tu prinašale. I se mislin zač Kastav, ki je bil rasadnik artižani, imel Delavsku školu nikada ni storil zidi na Lože. I, me par da san odgovoril zač. Zato da judi ne ćanpaju ča je je leh da na brzinu reku ča je glavno, odluče ča je trebe i gredu doma al va oštariju kade je tepleje i ne puše bura al pada daž.
Pasan kroz Volticu nad kun da je grb ježuviti od kamika storen.
I tu, nutre, mane počne lepota. Te napeštane kuće ka saka svoju priču poveda i saka svoje živjenje živi. Va jednoj je, va noveje vreme, atelje a va drugoj muzej. I Vilkotova bačvarija je tu negdere. Va njoj za Beli pundejak z društvon kantan i mlado pijen a mlade i stare naslišan kako lepo kantaju i gjedan one z lahkemi petami kako tancaju.
Od tuda trebe daje poć, prama Lokvine kade je na sredine šterna. Tuka da je bila lokva va koj su 1666. utopili zločestega kapitana Frana Morellija. Tuka je i kaštel va ken su kapitani kastavski bivali i z kega su komandali z Kastavsku gospošćijun. Na kantune je stara crekvica Svete Trojice. Malo zgora kaštela je župna crekva svete Jelene spred ke se lepo vidi Kvarner. Zada crekve je Žudika, kula va koj se nekada sudilo za nedela a i štrigan.
Na istočnemu delu Grada su mirine crekve sv. Marije, ostanki vele crekve ku je narod nazval Crekvina ne samo zaradi velikosti leh i zato aš ju je jena sirota dovica prokjela zaradi tega ča je morala pesak na rabotu nosit se od Preluka namesto da doma dečicu redi. Nikad da ni finjena zarad tega prokjestva.
Od Crekvine se daje gre va šumu Lozu i Lužinu po koj je još tragi od Rapalske meje i Šparožna jama ča su moji prijateli z Udruge 051 se previžitali i opisali a ja san par put prošećal po urejeneh šetnic ke su nazvali Puž i Zec, a onu najdaju - Srnu nisan pasal.
Lepi su ti puti za prošećat, jušto da ti počinu oči i duša. Prošećeš, prideš na Vidikovac (zovu ga i Šikićeva fortica) sedeš va kakov kafić, keh je koš i još, popiješ biru i partiš doma z punemi baterijami.
Tako nekako zgjeda pasat po sakidanji dan. Ma kad je Bela nedeja onputa je fanj drugačeje. Na tisuće judi se pešta iščuć neč a nač, potla par žmujići vinića, pozabe. Ma zato ne pozabe srest dragi prijateli, kolege z dela i oniste s kemi su va škole klupi brusili. Mlaji i zatancaju na Fortice al Crekvine a stareji se drže šanka al žmuja da ne padu potloh.
Mane gužva već let ne paše pa ren raje na posajmicu, kako se reče za pundejak potla Bele nedeje. Ta dan zovu i Beli pundejak. Na ta dan moj kompanjo D. i ja gremo Kastve va pohod. Tu nas dočeka V. pa malo obajdemo šanke ke drže naši poznati kastavski vinari, prošećemo semo-tamo, pojimo čagod va Fortice al na Crekvine pul lovci i finimo va Bačvarije pul I. Tamo pridu mnoge grupe kanturi pa i mi šnjimi zakantamo, ako se to tako sme nazvat. Evo na, Bela nedeja je jutra i ni ča leh postoli naluštrat za Beli pundejak.
Lepi moj Kastav, evo me pundejak po navade, kot i sako leto!

[milić]

Zač slabo poznan  Zamet

Trampi, Pužići, Mulci, Tići, Drnjevići, Mamići, Ćiković, Selinari, Starci, Pilepići, Malonji, Lenci, Rude, Pavinići, Dolnji Blečići i Katrida. To su zaselki Županije Zamet ke je nabrojil Matko Laginja va knjige Kastav Grad i obćina ka je štanpana va Trste 1889-ega leta. Još je tu i Zamet ki je va to vreme bil selo aš je cela županija (Zamet i ovi nabrojeni zaselki) brojila 589 stanovniki ki su bivali na 116 kućneh broji. Ja san još čul za Baredice a Jardas va svojoj Kastavština ... je dodal i Marčejevu Dragu. Kad se malo boje pogjeda ta imena vidi se da su malo manje leh sa ohranjena va današnjeh imen ulic, najveć po Mesnemu odboru Zamet. Domaći judi će lahko prepoznat i prezimena ka su nastala va teh zaselki a boje je reć da su zaselki dobili imena po teh prezimeni.
Ime Zamet da je nastalo, kako piše Jardas, aš da je neki halubajski ofčar gnal ofci po snege pak, kad je doma prišal, da je povedal kako su mu ofce, kade je danaska Zamet, zapadale va veli zmet al zamet od snega. I po ten zamete od snega da je Zamet dobil svojo ime.
Uvdeka su dva imena ka su mane interesantna. Mulac se je reklo za muškega a mulica za ženskega otroka kega je mat rodila a da ni bila oženjena. Ti nebogi mulci i mulice nisu bili baš štimani med našemi judi aš kad se kemu reklo mulac to je negda bil veli špot. Pa je trejseteh let pasanega stoleća nekemu z Pletenac i z ten prezimenon bilo dosti tega špota promenil je prezime va Pletenac. Ja poznan jenega z Pletenac, ki je šal smanun va pehinarsku školu, a preziva se Mulac i jenega ki se preziva Pletenac a šal je smanun va srednju školu.
Ča se tiče imena, danaska fanj nastanjenega, MO Marčeljeva Draga o ten se piše va Jardasove Kastavština ... Za onega ki ne voli čitat na brzinu trebe reć da je ta del Reki (a i Brgudi kade je storeno brodogradilište, danaska 3. maj) nekad bil od Antonoveh z Marčeji. Oni su ga kupili od carevini kad je cesar Josip zabranil ježuvitari i zel jin si posesi. Prezime teh Antonoveh, kot i mnoga pul Marčeji, je bilo Marčelja pa ni teško domislet se zač se to zove Marčejeva Draga.
Zamećani se jako diče svojun školun ka je vadila decu pisat i računat još od 1891. Imeli su i Obrtnu školu koj je derehtor bil inžinjer Kopecki i crekvu ku da su Zamećanke z babuji škapulale aš su Talijani 1924., kad je delan kunfin med SHS i Talijun, na silu oteli da crekav bude na njihoj strane.

Zamet je, kad su počele delat fabrika torpedi i Dok, kako su zvali brodogradilište, a i rafinerija, lepo živel aš su Zamećani bili dobri, školovani artižani ki su imeli lepe žurnade. Počel je živet po gracku. Se više judi je prihajalo tuka bivat aš je bilo lepo živjenje. Delale su butege i oštarije, tancalo se je a i sport je počel dihat aš je tu bil Sokol Kantrida - Zamet.
Ja san prvi put čul za Zamet od oca ki je povedal jenu smešicu od jenega Zamećana ki da je Studenu prihajal na fraj.
Doro Lenac da se je zval i da je bival va Zamete, kuća broj 103. Bekar da je bil. Va Studene su bili po nedeje tanci a njemu se siguro jako dopadala ta Studenka aš je dobre dve ure hoda do Studene. A Doro da je, seboj više od Studenke, volel vinićo pak da se je užal grdo napit. Tako, pijuć da je govoril kako mu mat namaja:
- Doro, Doro črni Doro, čuvaj beči za črni dani.
- Tr dan mat. Po dane jih dobijen po noće jih zapijen.
Okolo 1960., dok smo još bivali na Pehine, otprt je Dom pul Drnjevići kamo su moji uževali poć na tanci. Drugi dan su mi povedali kako jin je bilo lepo, kako su jili čvapčići a mane su tekle slini. Zmišjan se i da san okolo 1964. bil va Zamete va školske anbulante, paseval san po Zamete kad san šal na kupanje a za jedan Osmi mart san va non-stope, Žudika mi se čini da mu je bilo ime, kupil mame za dar konplet sakakovega žira, valda od plastiki. Va kine Sloga san z braton šal gjedat Tarzana... I to je se čega se domišjan do 1965. Kašneje, kad san delal, "pol" 3. maja je bivalo na Zamete. Puno san šnjimi ćakulal i čul za rukometni klub, gimnastičari, Zametski koren, Slogu, nogomet, maškare, Saharu, Domaćina, Grka... Ma sega je bilo na Zamete pa ni ni čudo da je danaska zapadni del Reki, potla Drugega rata, dobil ime Općina Zamet. I tako je bilo se do 1962. kad su se općine Zamet, Stari grad i Sušak spojile va Općinu Reku.
Ma sejno san malo put gore zašal. Kad bi ki umrl va Žamariće bin popil biru i doma šal. Moj interes je bil "na pedaj od mora" - od Opatije do Crikvenice. Evo, zato slabo poznan Zamet.

[milić]

...

[milić]

Zač Škurinje a ne Škurinja

Najprvo, kako trebe reć - Škurinje al Škurinja. Već fanj vremena je ime sela, ko je postalo veli del Reki, Škurinje. Ma nekad ni bilo tako. I Laginja i Jardas va svojeh knjigah pišu Škurinja.
Crekvica posvećena Sensove je nekako vavek bila meja zmed Gornjun i Dolnjun Škurinjun a malo zgora nje je, od dvajseteh let pasanega stoleća, bil kunfin med Talijun i Jugoslavijun.
Danaska su dva MO ka pokrivaju nekadanje Škurinje - Škuurinjska Draga i Škurinje. Škurinjska Draga je uglavno on del ki je storen va drage  pul Potoka i ča su nekada zvali Dolnje Škurinje ili Valscurigna, kako biju Talijani rekli. Judi ki tuka bivaju vole reć da su z Rastočin aš je to jedno staro ime ovega dela. Rastočine moremo podelit na, skoro na početke, Zavoj al Cirkul pa kuće po imene Centocelle pul keh je del, danaska ulica, Lipa. Va Rastočinah je i pet neboderi, poznati Eševi, ki su storeni sedandeseteh let 20. stoleća. Najveć na severe je Mihačeva Draga. Ni dugo ni  Bodulovo, danaska radna zona. Jardas lepo opišuje kako je nastalo to ime.
Ivo Grohovac Riječanin (z Grohova) je va novinah zapisal legendu kako su Škurinje (ja od mićeh nog rečen Škurinje) dobile ime. Vrag da je pobiral drenjuli po Drenove i nabral jih je punu vreću. Se tako pobirajuć ćapala ga je noć. Oprtil je vreću i šal pomalo doma. Ma va meste kade je Pajerovo selo razvezala mu se je vreća i se drenjule su popadale potloh. On bi jih bil rad pobral ma je bila vela škurina pa ni mogal aš ni niš videl. Kad je to povedal drugen vražićen (verovatno pul kakovega šanka) oni su rekli da neka se to mesto onda zove Škurinja. Evo, tako su Škurinje dobile ime a znamo i ki jin je bil kumpar.
Jardas pak piše da su Škurinje med visokemi bregi pak sunce kasno dohaja a rano odhaja. Ča bi se reklo više dura škurina leh druguda po Halubje. Zato da su to mesto judi nazvali Škurinja. A muške, ki tuka žive, da zovu Škurinjšćaki a ženske Škurinjšćice. Sad provajte to reć, prez mucanja. Mane ovo Škurinjšćaki gre kako-tako ma ovo Škurinjšćice teže. Zato jih ja zoven Škurinjari i Škurinjke.
Ime Škurinja (Schurigna) se spomenulo, kako je napisala gospa Ekl, va jenemu dokumentu još 1437. Na jene karte z 1800. san našal da na meste Škurinj piše Scrobogna (poznato mi je prezime Škrobonja). Na početke 20. stoleća storene su lepe kući za bivat, med drugemi i poznate Centocelle va današnjoj Porečkoj ulice kade je i moj, prerano umrli, prijatel M. z svojun familijun bival. Tu su Škurinje gubile selski mod živjenja a počele živet po gracku.
Laginja piše da je okolo 1890. cela županija Hosti, va ku su spadale i Škurinje, imela 426 stanovniki ki su bivali va 76 kuć. Moremo lahko reć da je va Škurinje bilo malo judi a još manje kuć. Po popise stanovniki iz 2011. leta MO  Škurinje i Škurinjska Draga skupa imaju preko 10.400 stanovniki.
Pul Škurinj teče Potok kega va noveje vreme zovu Škurinjski Potok. Zvira pul Tibljaš pa teče po Škurinjske drage va otprten koritu do bivše Tvornice konopa, danaska Emmezeta. Od tuda daje teče va pokrivenen koritu, ča bi se reklo ni ga videt, prati Osječku ulicu pa gre daje spod Ulice Potok, ka je po njemu dobila ime. Potok daje teče zdola Završnikove, Cambierijeve i Krešimirove pa finjeva va more kraj Budimpeštanskega mola, pul još jenega poznatega rečkega potoka - Brajde. Šjor Stražičić je va knjige Riječki izvori ... zapisal da je Škurinjski Potok dug oko 5 kilometar. Ma govore judi da je čin daje se manje vodi i da je potok skoro mrtav.
Ja Škurinje slabo poznan. Bila su vremena kada san na gusto tamo zahajal a već fanj vremena niman neke potrebi tamo poć.
Prvo mi na pamet padaju Škurinje kad se domislin prvega razreda na Pehine aš je E. rekla da biva va Škurinjah. Va to vreme su školska deca z Škurinj (verovatno Gornjeh) hodila va pehinarsku školu do 4. razreda.
Spametin se i jedne Sensove kad san videl Perota Radakovića i bil šnjin va društve. To je bilo, sigur san, 1963., potla Čilea i najpoznatejega njegovega gola. Bil je obučen va kožnu jaketu od antilopa a blizu mu je bil parkiran miletrečento svetlo zelene boji registracije RI 60 - 72. Otac i još jedan Pehinar su se ta dan tako napili da su komać do Pogleda zašli, tamo su legli, kantali partizanske i nisu se oteli otamo ni movit. Mat je ponemela šnjimi.
Tatina prva kujina je bivala na Zavoje pa smo užali poć do nje i njeje familije.
Kad san šal va Tehničku školu užali smo pobeć z nastave pa poć va luna-park ki je najveć puti bil na vrhe Ulice 1. maja, na jednoj čistine na levu ruku kad se gre zgorun.
1975. san bil na pire pul Brnčića aš se je ženila moja
kujina M. Brnčićeva oštarija je va to vreme bila jako štimana.
Od 1978. redovito san šal z auton na tehnički pregled, kade je delal Pehinar S. nažalost i on je već pokojni.
Na početke devedeseteh onega veka bil san kupil desetak sadnic va rasadnike od Parkovi i nasadi i posadil jih va Studene. Lepo  su se ćapale ma nikada plod ne uspeje dozret aš san jih posadil preveć va hlade, ča bi se reklo va škurine.
To bi bilo se ča mi pada na pamet a ča se tiče Škurinj. Danaska gren sakeh par meseci do Škurinj ako trebe ča kupit od mobilije al bele tehnike a zadnji put san bil tamo pred 2-3 meseca va jenoj dobroj picerije.

[milić]

Zač se Turnić i ja ne poznamo boje?

Već par dan otežen z oven pisanjen aš je malo kade ča od Turnića zapišeno. Išćen po internete, po društveneh mrežah, vrtin stranice po knjigah i se mi se čini da ono malo ča piše znan i sam. Pak ni ča leh pjunut va prsti, sest za tipkovnicu i zapisat to ča znan dok ne pozabin aš su leta prišla a i neki Njemac da okolo šeće i se čeka kega će zajet.
Šjor Ivo (Ma je mu to pravo ime? Nekako se mislin da je va oveh kraji bil Ivan kega su zvali Ive a ne Ivo.) Grohovac piše o legendi ka se spominjala va oven kraju. Da su neki judi na Turniće z grada ki je pod zemjun skopali rimski soldi i žare a na pol noći, za punega meseca, da se va lokve vodi vidi veli grad ki je tuka bil i čuje se zvonjava zvon, kot va Rime. A zvona su na turne pa od tuda da je zašlo ime Turnić.
Va Bračkoj ulice, nekadanjoj Via della Brazza, je jedna kula a mnogi misle da je po njoj Turnić dobil ime. Mane to ne zgjeda kot turan a još manje kot mići turan pak da bi se moglo reć da je z tega zašlo ime Turnić. Talijani pak za mići turan reku torretta pa je po talijansku Turnić Torretta. Mnogi i danaska Turnić zovu Toreta, kot kako se je nekada zval.
Kad je storena jaka industrija v Reke trebalo je te delavce ki su tu delali nekamo i smestit aš nisu si bili od ovuda. Turnić je moral bit vela rečka periferija na početke 20. stoleća kad su Mađari (Reka je va to vreme bila del Ugarske) rešili da store kući i se drugo ča rabi. Va vreme pred Prvi rat počelo se je delat kuće za delavce, med drugemi i kuće va naselje Torretta. To su kuće na jedan pod a financiralo jih je Društvo za izgradnju pučkih stanova. I danaska su te kuće tamo a va jednoj san i bil na kraje osandeseteh aš je tu bivala mat mojga šefa B.
Kuće su tuka, mladi delavci i njihove ženice imeli su lepo živjenje pa su i dečica prihajala na svet. A kamo šnjimi leh va vrtić i školu.
Projekt škole (današnja OŠ Turnić) je storen va mađarskemu Ministarstvu prosvjete a storili su ga arhitekti Gyula Svab i Carlo Conighi. Škola je storena i počela je delat 1912. leta. Ne dugo od nje i nekako va to vreme storen je i dečji vrtić (danaska je to Dom za odrasle osobe) po projekte arhitekta Svaba.
I tako se živelo 20-30 let dok ni počel Drugi rat. Kad je i on finil Reka je postala jak industrijski, pomorski, lučki i ča ti ga ja znan kakov grad. Va Reku su prišli deca i judi z seh kraj ondašnje državi išćuć uvde koricu kruha. I njih je rabilo nekamo smestit. Poduzeća su počela delat kući kot i prvo. Katnice z, najveć puti, četiri al šest stani. Ma se je to bilo malo za tulike delavce. I počelo se delat neboderi kot moderan ma i najceneji način zidanja stani. Tako je na Turniće storeno prvo naselje potla rata  ko je naraslo vajer. Po urbanističken plane Zdenkota Sile i dešenju Andrije Čičin-Šaina iz 1958. storene su okolo 1960. šesterokatnice z četiri stani na kate. Takoveh kuć je po Reke storeno pun klobuk a va jedne na Podvežice san i ja bival.
Naselja Turnić i ona okolo njega su se više rasla i bilo je se više dece za školu. Jedno vreme je škola Turnić delala va 4 smene pa se šlo storit novu školu. Ta škola je počela delat 1963. leta pod imenon Krnjevo da bi 1975. promenila ime va OŠ Veljko Vlahović a devedeseteh va OŠ Eugen Kumičić ko i danaska ima.
Naselje je raslo pa je nastala i potreba za crekvun. Ma va to vreme se na crekve ni baš lepo gledalo pa je ta ideja ostala va zrake se do 1986. leta kada je nadbiškup Josip Pavlišić blagoslovil temejni kamik za novu crekvu posvećenu svetemu Nikole Taveliću. Crekva i samostan su po projekte Borisa Magaša finjeni 1988. To je bila prva i jedina rečka crekva storena za vreme bivše jugoslavenske državi.
Ja san prvi put bil na Turniće, me par, baš va jednoj od teh šesterokatnic. Mamin kujin M. je od Luki dobil stan i z familijun se je preselil a mi smo jih šli obać. Dok smo živeli na Pehine Turnić se fanj spominjal aš su pehinarski školani, kad bi finili četrti razred, šli va peti va školu Turnić al va OŠ Vitomir Pajo Širola va Viškoven. Moj brat je šal, kot i fanj drugeh z Pehina, va školu Turnić. Jedanput, kad je šal doma z školi, se je tel obesit za skalice na kurjere ka je plazila zgorun po Granice. Ma skale nisu bile blokane pa mu je dolnji del pal na glavu i grdo udril tako da su ga deca morala, onako krvavega, pratit do bolnice.
Moj tata nan je povedal da su po Turniće, on ga je vavek zval Toreta, raspejevali drva a on da jih je va vrećah (na vreći su jih i prodavali) raznašal do stani. Povedal je i kako mu je bilo teško znest drva na peti pod ma, kuliko znan, na Turniće trejseteh let ni bilo tako veleh kuć. Tata je neč pomešal.

Ča se tiče mane i Turnića - ni to neka jaka veza. Tamo mi biva par prijateli, pred čuda let na asvaltiranen igralište va Šibenskoj san igral nogomet z prijateli iz srednje školi a nekoliko put san zabasal va Veseljak, onput poznatu oštariju. I neki dan, kad san bil storit par slik, san šal tamo popit biru i nazdravit Turniće i lepen uspomenan.

[milić]

Zač neki reče Krnjevo a neki Sveti Nikola

Danaska se jedan Mjesni odbor Reki zove Sveti Nikola. Prvo je bila Mjesna zajednica Krnjevo tako da je generacijan ke su rojene potla 2. rata to ime ostalo va uhe a Sveti Nikola jin je više kot ime crekve.
Ime Sveti Nikola već let i let je postalo del našega grada a se po jednoj crekvice ka je bila va južnen dele nekadanje općine Plase, istočno od Rečic a zapadno od Ponsala. Prama knjige Vande Ekl, crekva je tuka bila već va 14. stoleće a spomenuta je va jednen dokumente 1429. leta kot crekva sv. Nikole. Ta crekva je zrušena 1788. leta ma je ime, kot toponim, ostalo. Na ten meste se je odlučilo, potla stoleća i pol, storit novu crekvu posvećenu svetemu Nikole biškupu pa je komać 1940. blagoslovjen teren a već 1942. se počelo mašit va njoj magari ni bila zasen finjena. 1944. je bila još i poškodovana va avijonsken napade da bi ju 1954. leta popravili a 2000. je storen i zvonik pul nje.
Ča se tiče naziva Krnjevo, nigdere nisan našal otkuda je to ime zašlo. Je od krnje al čega drugega - ne bin znal. Ime postoji na jednoj karte iz 1841. leta ča bi reć da i ni tako jako staro.
Na druge karte, ka je storena za vreme talijanske uprave, postoji toponim S. Nicolo severno i istočno od Krnjeva ča me bunilo aš san očekival nać to ime južneje, pul mora. No, kada san pročital stranicu od župi sv. Nikole postalo mi je ćaro zač je to tako. Priča gre ovako! 1923. su v Reke formirane nove župe (do tada je bila leh jedna) a med njimi i župa sv. Nikole. Crekve ni bilo (porušena 1788.) pa su maše delane va zgrade na Turniće ka je prvo tega bila dečji vrtić a danaska Dom za odrasle. Jedino nisan našal kamo su z decun. Sadahna je jasno zač se ime Sveti Nikola a po talijansku San Nicolo našlo na Turniće.
Za mane Krnjevo znači del grada čigov je centar na križanju ulic Zametske i Zvonimirove i od tuda krug polumjera od, recimo, petsto metri.
Za Krnjevo skoro nisan ni znal dok nisan počel delat va 3. maje. Na dele san fanj puti čul za železničku stanicu Krnjevo aš je mnogi delavac prihajal z vlakon na delo, skroz tamo od Bistrca. Jedan, neki Jože, mi je povedal kako va vlake samo nastavi spat a kad pride na Krnjevo se zbudi i naspan gre na delo. Slično jin je bilo i za nazada. Sad se opeta spominje tisti mod prevoza judi tzv. gradski vlak a jedna od stanic da bi bila i ova na Krnjeven ka je sadahna va lošen stanju ča ni niš čudno aš već ni ni vlaki ni delavci . 
Krnjevo je jako popularno postalo osandeseteh pasanega stoleća aš se na veliko delalo Novo naselje. Va Noven liste je sako tuliko zašal kakov članak kako se je predal ov al on objekt. A z brodogradilišta se lepo videlo kako rastu palaci po brežiće po ken je dotada leh trava rasla. Posebe je bilo interesantno gledat va Plavi niz kako raste aš je bil tako dtugačeji i po boje krova a i drugen.
Mane je na Krnjeven bil interesantan market Brodokomerca aš je tamo delala kuma K. pa bin sako tuliko šal je pozdravit. A kad san već bil tuka obavezno bin bil šal ča pojist va Meso, kako smo zvali lokal od Mesokombinata. Va Mesu se moglo pojist recimo jetrica na žaru i popit birica za mići soldi.
Još jedna stvar me, kot brodogradirelja, veže za Krnjevo. To je on spomenik postavan 2005. za 100 let brodogradilišta. Taj spomenik se mane ne pijaža aš mi se čini da je zrivan nekako va stran da se zgubil va ten prostore. Mane zgjeda kot važ za rožice. Verovatno bi bilo boje da ga je drugamo premestit. Pada mi na pamet on kantun ča zapiraju Zametska i Liburnijska ulica, on parkić.
Eko, sad mi je lagje kad san i to napisal.

[milić]

Zač se Srdoči tako zovu

Današnji MO Srdoči je dobil ime, kot i mnoga druga mesta po Kastavšćine, po prezimene. Uvdeka je to bilo Srdoč (Serdoč) tamo su Marčeji, unde su Matuji i se tako naprvo.
Laginja opišuje županiju Serdoči, ka je bila jedna od 32 županij na Kastavšćine. Kašneje jih je bilo 33 aš je županija Brgud podejena na Brgud Veli i Brgud Mali. Serdoči da su bili skroz do mora aš je jedno od sel ka spadaju va ovu županiju bila i Marčeljska Draga kako je on zapisal. Druga sela, ka su bila va županije Serdoči su: Murini, Baćići, Serdoči, Blečići, Markovići, Diraki, Grbci i Šumci. Cela županija je imela na kraju 19. stoleća 575 stanovniki va 80 kuć i staru crekvu sv. Križa.
Barba Ive Matijašev (Ivo Jardas) je, onako po njigovu, zapisal i kako su va oven dele Kastavšćini nastala neka prezimena. Tumači da je prezime Srdoč nastalo od tega ča se je neki rad srdil a Lenac od nekega ki je bil len a Grbac od nekega ki je bil grbav al gobast. On isto nabraja sela Srdoči, Grpci, Šumci, Markovići, Baćići, Blečići, Diračje i još Škaje i Sv. Križ ke ni nabrojil Laginja. Jardas pak ne nabraja Marčeljsku Dragu i Murine ke je Laginja zapisal.
Jardas piše da je nekada pul Srdoč bila malinica na vetar ča me je jako znenadilo aš nisan nikad čul da je na Kastavšćine bilo vetrenjač.
Barba Ive hvali judi z Srdoč aš da su dobri hmeti i artižani a posebe hvali vino, kega da store prek dvesto spudi i da ga je za vreme Austrije konsumala i cesarska familija. 
Ive Blečić Gržićev va knjige Srdoči nekad - Kako se j' živelo pul Srdoč nabraja još neka selca ka Laginja i Jardas nisu spomenuli. To su: Martinkovac i Dražice te 3 morske uvale Razbojnu, Ploče i Šparić ča da je se spadalo pod srdočku županiju.
Srdoči su negda bili selo ko je va vreme med dva rata bilo napredno va puno stvari. Recimo poljoprivreda pa školstvo i kultura. Sadili su pul Srdoča fanj zeleni i rožic pak su jih prodavali na rečkoj place. I od vina se moglo lepo zaslužit. Škola da je bila od 1912. leta va župnen stanu va Sv. Križu a prvi učitej da je bil Fran Gapit. Školani je bilo 114 va šest razredi i se jih je vadil ućitej Gapito va dve smeni. Prva 3 razredi jutro a od 4. do 6. razreda zapolne. Bilo je trejseteh let pasanega stoleća se više školske dece pa je rabilo storit novu školu. Delana je 1937. - 1940. po dišenju arhitekta Marčelje a prvi učitej va nove škole bil je Josip Ćiković, brat budućega poznatega partizanskega borca Ivana Ćikovića Belega. Po Belemu je ime dobila zametska škola va ku su deca z Srdoč hodila od 5. do 8. razreda se do 1986. kada je storena nova škola Srdoči i va njoj počela nastava za seh 8 razredi. Kulturni centar Srdoč je bila Hrvatska pučka čitalnica ka je otprta 1904. a va njoj se je moglo pročitat dnevnu i drugu štampu a tu su prove imeli zbori i muzika. Va čitalnice su bila i predavanja, najveć od poljoprivrede, a i prestave su tu delane.
Živjenje va tipičnen prigradsken sele duralo je nekako do kraja sedandeseteh kad su se više delane nove kući a pomalo se zapušćevala zemja i vinogradi. Nestale su kozi. Srdoči su postajali "satelitsko naselje" Reke. Se više noveh stani se delalo a va njih su prihajali judi z drugačemi načini živjenja od onega kako se je do tada živelo pul Srdoč.
Danaska su Srdoči lepo mesto za živet, pogotovo sad kad je rotor storen. Imaju dosti butig a i, kuliko čujen, nimaju problema z parkirnemi mesti kot drugi deli grada.
Pul Srdoč se lepo gjeda na starinu pa je 2011. osnovana vredna udruga Mavrica ka dela na očuvanje stareh navad i čakavskega zajika. Kroz imena ulic uspelo se je spasit od pozabjevanja imena nekadanjeh selac. To je jako lepo. Čujen da tuka postoji i Udruga vinara, vinogradara i voćara Srdoči ki oživjevaju ono još malo trs od keh se je va pasano vreme delalo vino ko da se je pilo, kako je Jardas zapisal, i na bečkemu dvoru.

[milić]

Zač su Podmurvice va mojen srce

Podmurvice da su ime dobile po murve aš da jih je bilo jako puno tuka kade je danaska, a i nekada bil, taj toponim. Vanda Ekl piše da se va jednoj mape od katastra iz 1841. na južnen dele nekadanje općine Plase vidi ime Pod Murvice. Ja san pak našal na jednoj karte iz 1851. ime Murvicze na istemu mestu. Kroz njih je pasevala cesta ka je spajala Reku z Halubjen i daje prama Ljubljane i Trste. Ta cesta se je prvo zvala via Germania a kašneje via Trieste, kako ju je moj otac celo živjenje zval. Ja je se zmišjan kot Narodnog ustanka a sada je Vukovarska.
Već 1886. je storena zgrada va koj se školuju deca ovega kraja. OŠ Podmurvice je pul sam Đardin i, me par, da je potpala pod današnji MO Mlaka. Škola je dozidana 1970. a 2006. joj je za 120 let vadenja dece dodejen Grb Grada Rijeke. Vidin na njihoveh stranicah da su aktivni va projekte Čitanje bez granica/Branje ne pozna meja ča je za saku pohvalu. Ne more sused pul suseda živet a da ne zna nijednu njegovu besedu.
Škola Podmurvice je jako povezana z školu Gelsi ako niš drugo zarad imena. Va škole Gelsi se dečica vade i na talijanskemu zajiku a obadve škole su ime dobile po murve samo ča Talijani deju za murvu - gelso. Škola Gelsi je va zgrade ka je storena još 1907. kot Gradska osnovna škola za mušku decu. Škola danaska po teritorijalne podele grada Reki spada va MO Banderovo. Ah te granice! No, baren moremo čitat prez granic.
Crekva Marije Pomoćnice, moji ju zovu Salezijanska crekva, je storena 1934. prama projekte arhitekta Enea Roncija. Za mane je važna aš su me va njoj krstili.
Na Podmurvicah je 1914. storen samostan za benediktinke va kega su se preselile z Reki. Do tada jin je samostan bil pul Vele Crekve ma va jako lošen stanju pa su morale brzo pobeć ća otuda. Čin su prišle Podmurvican otprle su internat i školu za žensku decu. Tako je bilo se do početka 2. rata va ken je od bonbi nastradalo zapadno krilo. Potla rata va samostanu su bili domi za školane razneh struk a danaska je tuka učenički dom Podmurvice. 
Del samostana je i crekva sv. Josipa za ku je dišenj storil Eduardo Stipanovich z Lošinja. Posvećena je 30. 10. 1931. i od onputa se judi va njoj mole.
Va pamete mi je ostalo Inino igralište aš san često tamo bil z braton gledat njigove rafinerce kako igraju na balu. To je bilo na početke sedandeseteh a na igralište je bila črna šljaka. Sada je na igralište trava i zove se po Robertu Komenu.
Podmurvice su se skoro saki dan spominjale va mojoj familije. Moji predki su "odvavek" tuda prodavali drva i mleko. Ja se zmišjan da je još sedandeseteh nono File po Podmurvicah i zdolun prama Mlake prodaval mleko svojen aventoron. Otac mi je povedal da je kot mladić, čini mi se pred rat, delal na zidarije kad se delala kuća Casa Rossa, kako ju je on zval. On i još neki Studenjci su va to vreme delali i na rifuđu ki je bil spod samostana. Često mi je spominjal da je va jednoj kuće va današnjoj Vukovarskoj bista ka predstavlja konjsku glavu. Ta kuća je blizu križanja z Čandekovu, ma ja tu glavu nikad nisan videl. Okolo 1955. tatina sestra Mera se je oženila i z mužen su kupili jednu kućicu ka je zrušena kašneje, kad se je delalo križanje cest (ulice A. Barca i Vukovarska) prama Turniće. Još je Studenjci živelo Podmurvice. Lojzo Bavdin je bil postolar a drugi Lojzo - Škajanov je delal va luke. Tatina kujina Marica Lucova je tu bivala i bila vela prijarelica z tetu Meru. Teta Marica Čičkina je tu z mužen storila kuću... Kad smo bivali na Pehine naš sused Milenko Pavinčićev, po kemu san dobil ime, je delal va jednoj mićoj butege zgora oštarije ka se je onda zvala Istra, ako se ne varan. Saki dan kad je šal zdela ja san ga čekal na stanice od kurjere a on bi mi dal va škartociće zlomjeneh bonboni al ča drugega.
Kad san šal va Tehničku školu i potla na faks skoro saki dan san po Podmurvicah pasal tako da san jih dobro upoznal. No, morete videt kuliko me stvari, najveć lepeh, veže za Podmurvice pa ni nikakovo čudo da su mi zavavek ostale va lepoj uspomene.