Frane Pitur alias Frane (morda i Franjo) Pavletić

[milić]

Frane Pitur alias Frane (morda i Franjo) Pavletić. (Pećine, 1891-01-31 – Ičići, 1949-02-28)

     Nan, ki smo već dugo z ove bande Rečini, se je ćaro. Ma i onen ki su z druge strani. Pa i onisten ki su i malićo šire od Rečini. To ime znači smeh.
     Va knjigah da piše (tako mi je šapićal šjor Danijel Kokić z knjigi Frane Pitur…) da je bil rojen na Pećinah, na broje četrnajst. Od matere Santine i oca Antona-Toneta (valda). Otac da je bil sucki službenik ma čagod to značilo. Ma je to, va ono vreme, značilo plaćicu, kakova je da je. Mat je bila domaćica, ča bi rekla mularija – niš ni delala. Va ono vreme nisu banke bile tako nasrtjive pa su mladi i stari morali živet va jenen staniću, i još na fitu. Iz dostupnih podataka, aha sad san na standard pasal, vidljivo je da su na adresi Pećine 14 bili prijavljeni nono i nona, nepozntih imena, Pavletić, zatim Tone i Santina i dečina – Mario, Josip, Vinko, naš Frane i Rozeta. Svega čega - komada devet.
     I tako je naš Franić rasal i narasal najprvo za va pučku školu, ka je onda durala me par tri leta. Pa kad je nju uspešno finil, na velo zadovolstvo učitela, ni bilo druge leh poć vadit se za slikara, u stvari pismo-slikara, u stvari pitura. Tr se je to isto. Pinel ovaj il onaj.
I kad je finil za diplomiranega pitura postal je pitur. Z diplomun.
(Ma tu mane neč ni jasno. Ako je škola durala najprvo tri, ma neka je četira leta, pa neka je zanat dural dva, tri leta, kuliko let je naš Franić imel kad je tobože bil svoj čovek, diplomirani pitur?)
     No, intanto, sad kad je bil svoj čovečić ni bilo druge leh kampanat po nedejah (ja, onda ni bilo weekenda) po pleseh. A mogal je poć samo do tamo do kuda ga je nogobus zapejal. A naš Franić je bil šegav pa je šal blizu. Najveć puti na Podvežicu, va oštariju Pikantin. (A ja nisan šegav aš nikad nisan va njoj bil, a pred noson mi je bila trejsetak let. Ki zna ča bin pak ja tamo ćapal. Morda kakov matafun.) I tuka je on upoznal svoju ženicu, buduću paćenicu, Josipu-Pepicu, a neki ju je zval i Jožica. Bitno va ove ženidbe je to da joj je otac bil neki Mate Šikić, oštar vežički. Ča je Franiću dišalo još, osim Jožice, ki zna. Oženili su se 1913. leta i sretno živeli dok on ni počel pit.
     Al tu  bračnu idilu prekinul je  Veli Rat kako su onda zvali WWI. Vojna mašinerija ni imela rigvarda prama mladencon već je Franića prvega tira pobrala. I on je finil va Galicije. Malićo se prestrašil oneh munjeneh Rusi, ki se nažeru vodki pa jurišaju drito prama našemu Franiću. On je to se skupa pušćal pa šal po svojen pute, ki ga je otpejal va žestoke borbe po Čehinjah, Moravljanki i drugeh ženskinj već raspale države AU monakije. Pred kraj rata prišal je doma, obučen va žensku. Zač? Pitajte pokojnega g. Kokića.
     I onda je došlo njegoveh pet minuti, ki su trajali ohoho let.  Malo dela, puno smeha, a zmed tega jedan al dva reda pijači. I se bi lepo bilo da ni Pepica njurgala i da mu ni umrl jedini sin Milivoj. Va dvajset i prven lete živjenja. To ga je skoro ubilo. Ma ča će njemu hćeri Anđela i Nada kad više ni njegovega ljubimca i pomoćnika Milivoja.     
     Tri leta je naš Frane (pazi, više ni Franić, sad je ozbiljan čovek) bil va žaloste i niki ga ni mogal videt va oštarije, nasmehnjenega, veselega... Žalostan je bil, nebog.
     Pala je Stara Jugoslavija prez spaljenega metka i prišli Talijani. A on da je zajno storil nemotariju. Saobraćajcu, ki je delal red med avuti na trgu pul Kontinentala, da je slučajno zamočil nogu va bujol z pituru. Dok je ovisti šal to prijavit na policiju, Frane je reguliral promet. Dok ga nisu ćapali i oćepali pa va pržun zrivali. I onda, dok su ga va pržun pejali, je on zazijal onu poznatu, globalnu uzrečicu:
-   Vija Roma, nikad doma!
Brzo su ga pušćali, aš ki bi š njin na kraj zašal. A on, nemiran duh božji, kamo će leh va partizani. Va Primorsko-goransku brigadu. Tu da je najviše delal kot bolničar, a i transparenti da je pisal. Ča bi rekli danaska, delal je kot propagandist.
     I tisti rat je finil. A Frane, kot Frane. Ne more držat zaprta usta. Pa je opeta neku nemotariju storil, rekal i va pržun finil. Ni jedan režim ne voli smeh. Ako se nasmeješ, zajdin misle da se smeješ sistemu, kao takvom, ča ne.
     Puno je pušil, a bome i pil, pa je zdravje šlo fuć. (Danaska bi genetika rekla da bi i tako partil.) Finil je va bolnicu v Ičićeh, kade je i umrl od tuberkulozi.

     Franeta već ni šezdeset i više let, al su ostali njegovi vici, šali pak nekada ćutin kot da ni ni umrl. A kad pasan kraj njegovega groba, čini mi se da čujen smeh. Onaj pravi smeh ki leči i najbolneje, ki leči najranjeneju dušu.
Frane dragi, počivaj va smehe! 

- Kuća na Trsate, Glavinićeva 14, va koj je dole, prizemno, bival z svojun familiju Frane


- Grob va ken počiva i smeje se Frane na Trsačken cimitere.


- Jedina njegova fotografija koju sam do sada vidio .

[mušica]

Čitam ovu štoriju o Franetu na balkonu i smejen se sam sa sobun aš sam se domislel štorija o Franetu ke su mi povedale pokojne none. Pita me žena ča sam ponemel da se sam sa sobun smejem...pa sam joj rekal štoriju kad je Fran došal pijan doma. Žena ga čeka i onako jadna hiti padelu kroz poneštru. Frane na to pohita pijati, bešteki, kantridu... Frane ča delaš...Pa mislel sam da gremo va vrte večerat

Pa pituranje kod gazde Radovanija...slikanje vola na reklami za mesnicu...

p.s. nisam znal za kuću u Glavinićevoj, sto put sam na katu bil kod prijatelja

[milić]

Ja san iskal na grobje grob od plovana Račkega i naletel na jednega čoveka, do tada nepoznatega, al je ispalo da je moj kolega po struke, al 14 let stareji. On mi je pokazal grob i još tri. Stvarno sam mu zahvalan za to. Milivoj (pazi slučajnosti, kolege ga zovu Mile!) Vlašić mu je ime.
A ča se tiče kuće šjor Kokić spominje atresu, a na netu san našal točno tu kuću pa je to-to. 

[mikimiki]

ja sam mislila da je Frane Pitur izmišljen lik, a kad ono.....stvaran 

[Kont]

[mikimiki]

po slici mu se na faci vidi da je bio zajebant 

[milić]

Tako nekako izgledaju i tuberani. I pijančići. 
Izgleda da je ovo jedina  njegova slika koja kola.
Meni se nije dalo zafrkavati  pa sam stavio ovu koja je na spomeniku, neobrađenu. Al to je ta.

[mušica]

Evo još jedna (ima više verzija)

Dolazi Frane pijan doma i riva cigaret va bravu.
Nailazi sused (žena) ...Frane pa ne moreš  cigaretom otključat bravu


Jebemti.... pa ja sam valjda ključ popušil

[milić]

- Frane, za majku božju! Past ćete z teh škal.
- Aj neću. Ča ne vidite da se držin za pinel.

[mušica]

Miliću dajmo još ku o Franu Pituru

[mikimiki]

https://books.google.hr/books/about/Frane_Pitur_iliti_%C5%BDivot_shva%C4%87en_kao_ko.html?id=dj6fkgEACAAJ&redir_esc=y

[milić]

O inverziji zraka (vjetru) priča i objašnjava učo. Pa kaže da hladan zrak dolazi iz sjeverne strane tj Gromišćine prema moru, a topli obratno.
- Djeco, što mislite zašto je tomu tako?
- Zato aš su Banska Vrata vavek otprta!- Odmah će Franić.

-------------------------

Prvi dan u školi, učitelj upoznaje djecu s pravilima ponašanja i sl.
- Djeco, ima li netko koje pitanje?
- Gospon učitelj, kad će ferije?

-------------------------

- Ja san čul da ste vi, kot sveučilišni profesor, jako pametan i da puno znate o semu i sačemu. Pa bin vas molil da mi objasnite ka razlika je med senon i slamun?- Frane pita uglednog znanstvenika u uglednoj sušačkoj oštariji.
- Pa, gospodine Frane, ma kako se vama to pitanje čini jednostavnim to je problem koji moramo sagledati...
- Ma dajte, dajte, prosin vas. To zna saki telac, a vi ne.
-----------

Zašto šef željezničke stanice nosi crvenu kapu.
- Da njome pokrije glavu.
--------------

- Neki kočijaš juri osam kilometara u jednom satu. Drugi pak u jednom satu prevali 9 kilometara. Međutim, prvi je odmaknuo od drugoga 3 kilometra. Gdje će se sastati?
- Va oštarije, gospon učitelj.
--------------
Otac Franićev poveda ženi ča je mali rekal da bi otel bit kad bude veli. Kokošji zubar!

 

[mušica]

Ala ja ću jednu po sjećanju a ti me Miliću ispravi.

Pitural Frane natpis na oštariji kod nekog gazde Radovana.
Frane nakon ča nariše pol jednog slova pa nutra na gemišt.
Gazda se razjadi...Frane pa kad ćeš finit ako stalno greš nutra na gemišt.
E vidite šjor..vi ste rado-vani a ja rado- nutri

[zokxy]

1954. žena Frana Pitura posjetila je redakciju Novog lista da bi se požalila na seriju šaljivih natpisa o njemu, evo članka o tome 

[milić]

...ali kad se razbolio skoro su svi na njega zaboravili...

Uf kako mi je to poznato, na primjeru moga brata.

Spominje se u članku i izdavanje nekakve knjižice s Franovim anegdotama od strane NL. Zna li se išta o tome?

I pazi koji naziv - stara Pavletićka! A imala je tek 62 godinice. Prava mladost. Novinari prasci!