ZAVJETNA KAPELICA MAJKE BOŽJE PUL KUĆEL
Na žalost nisan arival još skopat podatak kega leta je ova kapelica storena, ali sigurno je da je to bilo krajen 19. ale početkon 20. stoleća, a storil ju je Mate Sušanj čigova kuća j bila leh malo niže od kapelice. Va vreme "zlatne groznice"Mate j šal na Antarktiku zlato iskat i zavećal se je da ako ga najde da će na čast Majke božjoj kapelicu storit. I našal ga je i to ne baš malo. Svoj zavet ni pozabil, a va to vreme se ni ni juden ni Bogu obećevalo z figami va žepe! Kapelicu je uzidal, kako i velu kuću va centre Matuj. Ma to j već druga štorija. Ostanimo na kapelice. Kapelica je jednostavna, jednobrodna z lopicun spreda. Kad se je renovirala, zaprte su stranice od lopice, a vidi se da j kapelica lepo održavana i z nutri z vani. Moje mišljenje je da je morda prlikon pituranja ale pak drugeh zahvati pokriven natpis kada i ki je zavjetnu kapelicu storil. Zvon je na preslice i na njin je zleven natpis S. Antonio. Nutre na desnoj strane postoji i kipić Svetega Antona, a to nan govori da su judi va vreme kad je kapelica storena odlučili slavit i Svetega Antona, a znamo da j on bil zaštitnik domaćega blaga, a juden ki su živeli od ovac, a pokla tega i od krav bil je potreban zaštitnik kemu te teć kad je potreba isto onako kako mi tečemo vetrinaru kad nan se pasić al mačak razboli. Maša va kapelice je jedanput na leto i to na Miću stomorinu (Mala Gospa) ka se slavi na 8. setembra. Mašu drži rukavački pop, a kapelicu održavaju vredni Kućelci. Nadan se da je Mate Sušanj pošteno spunil svoj zavet i da ga je Majčica božja pripejala drito pred Boga.
Mate Sušanj je nakon sega bogatstva umrl relativno siromašan va Australije, ali ča je danaska skoro pa za ne verovat, umrl je bez jednega dolara duga nikemu. Njegovi potomki su postavili i spomen ploču njemu na čast:
Ovo je njegova rodna kuća pul Kućel:
A ovo vila pul Matuj ku je uzidal nakon pronalaska zlatne žili:
Nakon bankrota kuću je kupila fašistička stranka za svoje sjedište:
