Već let na Pusnu nedeju pul M. i njegove familije zbere se veća čreda judi ken je dojadilo dogajanje maškar v Reke. Pun jin je kufer i Obija i Tonija i sega onega ča umetno napuhuju, dok je soldi. Vrag zna otkuda jih već zivlače.
No, i tako je M. nastavil tradiciju svojeh stareh aš su let i let prvo tu se ofermjevali zvončari i maškare od Mučić kako bi se okrepili z kakovun kuhanun kombasicun i malićo vinića. Povedal mi je jedan stari trećemajac, inače zvončar, da su nekada tu dočekani z kablon punen vina i da se je z tega kabla vino pilo, al tako da pravi zvončar neće prolet ni kapić vina. A va ten kable da je bilo i dvajset litar vina. Sadahna se vino, ipak, pije z žmuji. No, povedal mi je i kako se zračuna kubatura zvonca. Ja san neč filozofiral kot površina osnovice puta visina i te monade. On je pak rekal da je to lahko storit. Napuniš zvonac z vinon i zleješ ga va kakovu menzuru i kubatura je ta ku se zmeri. Sad je dve litri, al tri, ne spamećujen se.
Inače va te kuće se vidi da je brodogradnja i brodi va fokuse interesa. Evo par detalji ki se lahko zapaze.
Naprimer ova brodska poneštrica.
Il ova zjevača, ako se dobro spamećujen aš nisan tisti izraz koristil malomanje leh 20 let.
A štokeri su storeni od bitav.
Stol je već vane i čeka da zvončari dojdu.
Dok smo na nje čekali i mi smo se lepo zabavjali. Jedan red pijače, red jidače i red muziki. Pa opet tako ili nekako, kako je već ki otel.
Mane se, nekako, najveć dopala ovista hrana. Jasno bilo je i joti i fažola na padelu, gulaša od srnetini... A kolači da se ni ne poveda. Ni pijači seh sorat, hvala božiću, ni falelo.
Ki to ni prepoznal ja ću mu povedat da su to tripice i palenta kompirica.
I tako na neku dobu su i oni prišli. Ma lepi pa bog. A i ja se više zvončari ne bojin pak san mogal i bliže jin prit. No pogledajte par fotkic. Najprvo muzika.
Pa oni.
Bilo je tu i pasići
i vražić
i četiri nerazdvojna prijatelja, hm, dok se ne razdvoje, bez petega.
On bi dodal idejalno za petting, a ja bin, po šprance, rekal samo ne znan ča dela onaj peti. Nasmeli bimo se i popili još gut vina pa doma, pomalo šli.
A za se ki vole rožice nabral san jedan macić ćuki va vrte.
I se vas najlepče pozdravjan i sen nan želin ča više ovakoveg druženj z dobremi judi.
